«وسىدان التى اپتا بۇرىن ددۇ ۇلىبريتانيادا مايمىل شەشەگى اۋرۋىنىڭ ءۇش جاعدايى تۋرالى حابارلاما الدى. سودان بەرى بىزگە اۋرۋدىڭ راستالعان 3200-دەن استام جاعدايى جانە 48 ەلدەن ءبىر ءولىم جاعدايى تۋرالى حابارلامالار كەلىپ ءتۇستى», دەدى ددۇ باس ديرەكتورى تەدروس ادان گەبرەيۋس.
ددۇ باسشىسىنىڭ ايتۋىنشا, جاقىندا زارداپ شەككەن ەلدەردە اۋرۋ جاعدايلارى نەگىزىنەن ەر ادامدار اراسىندا كەزدەسەدى.
الايدا, ول ينفەكتسيانىڭ جۇقتىرعان ادامنان كەز-كەلگەن ادامعا بەرىلۋى دە جالعاسىپ جاتقانىن اتاپ ءوتتى.
وسىعان بايلانىستى ددۇ باسشىسى نيگەريادا مايمىل شەشەگى اۋرۋىنىڭ تارالۋ مەحانيزمىن زەرتتەۋگە شاقىردى, وندا جۇقتىرعان ايەلدەردىڭ ۇلەسى باسقا ەلدەرگە قاراعاندا الدەقايدا جوعارى.
مايمىل شەشەگى - ادامدار اراسىندا تارالاتىن سيرەك كەزدەسەتىن ۆيرۋستىق ينفەكتسيا. ناۋقاستاردىڭ كوپشىلىگى بىرنەشە اپتا ىشىندە قالپىنا كەلەدى, بىراق كەيبىرەۋلەرىندە اسقىنۋلار بولۋى مۇمكىن.
مايمىل شەشەگىنىڭ العاشقى بەلگىلەرىنە قىزبا, باس اۋرۋى, بۇلشىقەت اۋرۋى, ارقاداعى اۋىرسىنۋ, ليمفا تۇيىندەرىنىڭ ۇلعايۋى, قالتىراۋ جاتادى. بورتپە پايدا بولۋى مۇمكىن, كوبىنەسە بەتتەن باستالىپ, سودان كەيىن دەنەنىڭ باسقا بولىكتەرىنە دە تارالادى. بورتپە وزگەرىپ, قىشىما پايدا بولعانعا دەيىن ءارتۇرلى ساتىلاردان ءوتىپ, كەيىنىرەك جوعالادى.
