بەلگىلى رەجيسسەر ابدۋللا قارساقباەۆ تۋرالى فيلم كورسەتىلەدى

استانا. 25 ءساۋىر. قازاق كينوسى تاريحىنداعى ءىرى تۇلعا, بەلگىلى رەجيسسەر ابدۋللا قارساقباەۆتىڭ ءومىرى مەن قىزمەتى جونىندەگى فيلم كورەرمەنگە ۇسىنىلادى. بۇل تۋرالى «ەكسپرەسس ك» حابارلادى. ەڭبەكتەرى ۇلتتىق كينومىزدىڭ التىن قورىنان ويىپ ورىن العان ابدۋللا قارساقباەۆتى تالايلار قازاق كينەماتوگرافياسىنىڭ اكەسى دەپ سانايدى. ول الماتى وبلىسى جامبىل اۋدانىندا تۋعان. ۇلى وتان سوعىسى جىلدارىندا ەلمەن بىرگە كوپتەگەن قيىنشىلىقتاردى باسىنان وتكەرەدى. تالاپتى جاس 1950 جىلى بۇكىلوداقتىق كينەماتوگرافيا ينستيتۋتىنا وقۋعا تۇسەدى. قازىرگى كەزدە ابدۋللا قارساقباەۆتىڭ تۇسىرگەن فيلمدەرى جۇرتشىلىققا كەڭىنەن تانىس. ارينە, بۇل جونىندە شاعىن اقپاراتقا ءبارىن سىيدىرىپ ايتۋ مۇمكىن ەمەس. ول العاشقى جۇمىسىن دەرەكتى فيلمدەر تۇسىرۋدەن باستاعانىن بىرەۋ بىلسە, بىرەۋ بىلمەيدى. ا.قارساقباەۆتىڭ «قازاق حالقىنىڭ قولونەرى» اتتى دەرەكتى ءفيلمى كەزىندە كانادادا وتكەن بايقاۋدا ارنايى سىيلىققا يە بولىپتى. اتالعان شىعارمانى 40-تان استام ەل اسقان قىزىعۋشىلىقپەن ساتىپ العانىن دا ايتا كەتەيىك. بۇگىندە ابدۋللا قارساقباەۆتىڭ ءىسىن ۇلى توقتار جالعاستىرۋدا. توقتار قارساقباەۆ جوعارىدا ايتىپ وتكەنىمىزدەي, اكەسى جونىندە دەرەكتى فيلم ءتۇسىردى. ول بۇل ەڭبەگىندە اكەسىنىڭ رەجيسسەرلىك قىزمەتى مەن ۇستازدىق قاسيەتىن مولىراق قامتىعان. سونداي-اق, ايتۋلى تۇلعا تۋرالى زامانداستارىنىڭ تولعاعا ەستەلىكتەرى دە فيلمگە ارقاۋ بولعان. جولدىباي بازار. دەرەككوز: «ەكسپرەسس ك». فوتو: Qaznews.kz.