قوعام • 22 ماۋسىم، 2022

سپورت سەكتسيالارىن قارجىلاندىرۋعا قوسىمشا 97 ملرد تەڭگە قاجەت

16 رەت كورسەتىلدى

شىعارماشىلىق ۇيىرمەلەر مەن سپورت سەكتسيالارىن قارجىلاندىرۋعا قوسىمشا 97 ملرد تەڭگە قاجەت. بۇل تۋرالى مادەنيەت جانە سپورت ءمينيسترى داۋرەن اباەۆ ايتتى، دەپ حابارلايدى Egemen.kz.

«بۇگىن وسى جەرگە ەل ازاماتتارىن تولعاندىرىپ جۇرگەن اسا ماڭىزدى سۇراقتى تالقىلاۋ ءۇشىن جينالىپ وتىرمىز. اڭگىمە شىعارماشىلىق ۇيىرمەلەر مەن سپورت سەكتسيالارىن جان باسىنا شاققانداعى قارجىلاندىرۋ جۇيەسىنىڭ ءارى قارايعى جۇمىسى تۋرالى بولادى. قازىر 495 مىڭ بالا 15 مىڭ ۇيىرمە مەن سەكتسياعا بارادى. وعان 32 ميلليارد تەڭگەدەن اسا قاراجات ءبولىندى. جىل سوڭىنا دەيىن قوسىمشا 97 ملرد تەڭگە قاجەت. ايتىلاتىن سىن مەن قويىلاتىن سۇراقتاردىڭ الدىندا ءبىر عانا دۇنيەنى ايتقىم كەلەدى: ارتسپورت – بۇقارالىق سپورتتى دامىتۋدىڭ جالعىز مەحانيزمى ەمەس»، دەدى داۋرەن اباەۆ ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا.

ونىڭ دەرەگىنشە، بۇگىنگە دەيىن 41 دەنە شىنىقتىرۋ-ساۋىقتىرۋ كەشەنىن ىسكە قوسۋ ارقىلى جاقسى ناتيجەگە قول جەتكىزىلدى. ونىڭ 32-ءسى اۋدان ورتالىقتارى مەن اۋىلدىق جەرلەردە اشىلدى.

«سونىمەن قاتار اۋىلدىق جەرلەردە سپورتتىق ءىس-شارالار مەن سەكتسيالاردى ۇيىمداستىرۋعا جاۋاپتى 3 064 جاتتىقتىرۋشى جۇمىسقا الىندى. جاستاردى سپورتقا تارتۋ ءۇشىن وتكەن جىلى باسكەتبول، ۆولەيبول، فۋتزال، قازاقشا كۇرەس، ۇستەل تەننيسى سياقتى سپورت تۇرلەرىنەن مەكتەپىشىلىك جانە ستۋدەنتتەر اراسىندا ۇلتتىق ليگالار وتكىزىلدى. ءبىلىم بەرۋ جۇيەسىنىڭ بارلىق دەڭگەيىندە دەنە شىنىقتىرۋ ءپانىنىڭ ۇستازدارىنا ساباقتان تىس ءىس-شارالاردى وتكىزگەنى ءۇشىن قوسىمشا اقى تاعايىندالدى. ياعني، بۇل رەتتە 30 مىڭنان استام دەنە تاربيەسىنىڭ مۇعالىمى قامتىلدى. 2022-2024 جىلدارى اتالعان ماقساتتا ايماقتارعا قوسىمشا 21 ملرد تەڭگە بولىنەدى»، دەدى ول.

ءمينيستردىڭ دەرەگىنشە، بۇگىنگە دەيىن بالالاردى قوسىمشا سپورت سەكتسيالارىمەن، ۇيىرمەلەرمەن قامتۋ 73 پايىزدى قۇراپ وتىر.

«جان باسىنا شاققانداعى قارجىلاندىرۋ جۇيەسى مەن ءبىلىم بەرۋ ۇيىمدارىنداعى سەكتسيالاردان بولەك، بالالار مەن جاسوسپىرىمدەردى وقىتاتىن سپورت مەكتەپتەرىندە تاعى 386 مىڭ بالا ءبىلىم الۋدا. 2022 جىلى قارجىلاندىرۋدىڭ جالپى كولەمى 123،7 ملرد تەڭگەنى قۇرايدى»، دەدى داۋرەن اباەۆ.

ايانا توعانبەك

سوڭعى جاڭالىقتار

ۇقساس جاڭالىقتار