جازعى تىلدىك لاگەردىڭ قاتىسۋشىلارىنىڭ العاشقى لەگى – 31 بالا. ولار نازارباەۆ زياتكەرلىك مەكتەبىندە قازاق تىلىندە ساۋاتتى جازۋعا جانە وقۋعا ۇيرەنىپ, ۇلتىمىزدىڭ سالت-ءداستۇرى, تاريحى مەن مادەنيەتىنەن تاعىلىمدى دارىستەر الىپ, اۋىز ادەبيەتىنىڭ جاۋھارلارى – ەپوستىق شىعارمالاردى تىڭدايدى. سونداي-اق وقۋشىلار ساباقتان بوس كەزدە Yurta park, Green land دەمالىس ورىندارى مەن Tree Of Life اكۆاپاركىندە, «كوكجايلاۋ اقتوبە» اگروتۋريستىك كەشەنىندە دەمالادى. اقتوبە وبلىسىنىڭ تاريحي ورىندارىنا ەكسكۋرسيالار دا ۇيىمداستىرىلدى. بالالار العا اۋدانىنداعى ەسەت كوكى ۇلى كەسەنەسىنە, قوبدا اۋدانىنداعى ابات بايتاق مەموريالدى كەشەنىنە, وبلىستىق تاريحي-ولكەتانۋ مۋزەيىنە بارىپ, وتكەن زاماننىڭ تاريحي وقيعالارى وتكەن جەرلەرى تۋرالى ماعلۇمات الادى.
جازعى لاگەردە تەوريالىق دارىستەردەن وزگە, ۇلتتىق مۋزىكا, قولونەر ساباقتارى دا جوسپارعا ەنگىزىلگەن. بۇل جەردە احمەت جۇبانوۆ اتىنداعى مۋزىكا كوللەدجىنىڭ وقىتۋشىلارى رەسەيلىك قازاق بالالارىنا دومبىرا تارتۋدى ۇيرەتىپ قانا قويماي, كۇي, تەرمە جانرلارى تۋرالى دارىستەر وقيدى. قولونەرشىلەر قازاقتىڭ ۇلتتىق بۇيىمدارىنىڭ جاسالۋ ەرەكشەلىكتەرىن, سەرۆيس كوللەدجى وقىتۋشىلارى قازاقتىڭ ۇلتتىق تاعامدارىن ازىرلەۋدى ۇيرەتەتىن بولادى.
ءوڭىر باسشىسى وڭداسىن ءورازاليننىڭ باستاماسىمەن شەتەلدىك قازاق بالالارى ءۇشىن تۇڭعىش رەت ۇيىمداستىرىلىپ وتىرعان وسى ەتنوگرافيالىق-تىلدىك لاگەردىڭ باعدارلامالارى وقۋشىلارعا وتە پايدالى بولاتىنىنا سەنىم مول. اقتوبە وبلىسى اكىمىنىڭ باستاماسىن رف ورىنبور قالاسىنداعى «قازاق ءتىلى» ورتالىعىنىڭ جەتەكشىسى ساۋلە تايكەشوۆا ەڭ ءبىرىنشى قولداپ, بالالاردىڭ اقتوبەگە كەلۋىن ۇيىمداستىردى.
اقتوبەگە بالالارىمەن بىرگە كەلگەن اتا-انالار جازعى دەمالىستىڭ قىزىقتى دا مازمۇندى ەتىپ ۇيىمداستىرىلعانىن كورىپ, قۋانىشتارىن جاسىرا المادى.
اقتوبە وبلىسى
