قازاقستان مەن ليۋكسەمبۋرگ ءسىم باسشىلارى ەكىجاقتى جانە كوپجاقتى, ونىڭ ىشىندە قر-ەو, ەو-ورتالىق ازيا فورماتىنداعى ىنتىماقتاستىقتىڭ پەرسپەكتيۆالارىن تالقىلادى. تاراپتار ىنتىماقتاستىقتىڭ بارلىق وزەكتى ماسەلەلەرى مەن حالىقارالىق كۇن تارتىبىندەگى ماسەلەلەرگە توقتالدى. سونداي-اق ۇكىمەتارالىق جانە پارلامەنتارالىق بايلانىستاردى ودان ءارى دامىتۋعا جاردەمدەسۋ تۋرالى ۋاعدالاستى.
قر كونستيتۋتسياسىنا وزگەرىستەر ەنگىزۋ بويىنشا وتكەن جالپىۇلتتىق رەفەرەندۋمعا ەرەكشە كوڭىل ءبولىندى. ليۋكسەمبۋرگ تاراپى قازاقستان پرەزيدەنتىنىڭ رەفورمالارىنا قولداۋ ءبىلدىرىپ, ولاردىڭ يمپلەمەنتاتسياسى ەلىمىزدىڭ ساياسي جاڭعىرۋىنا ىقپال ەتەتىنىن اتاپ ءوتتى.
ەكى ەلدىڭ سىرتقى ساياسي ۆەدومستۆولارىنىڭ باسشىلارى قازاقستان مەن ليۋكسەمبۋرگ اراسىندا ديپلوماتيالىق قارىم-قاتىناستاردىڭ 30 جىلدىعىنا بايلانىستى بىرلەسكەن كومميۋنيكە قابىلداۋ تۋرالى ۋاعدالاستى.
كەزدەسۋ ليۋكسەمبۋرگ ۇلتتىق كۇنى قارساڭىندا ءوتتى. وسىعان وراي, قر ءسىم باسشىسى قازاقستان پرەزيدەنتى قاسىم-جومارت توقاەۆتىڭ ليۋكسەمبۋرگ ۇلى گەرتسوگى انريگە جولداعان قۇتتىقتاۋىن جەتكىزدى.
فرانتسيانىڭ سىرتقى ساياسي ۆەدومستۆوسىنىڭ باسشىسى كاترين كولوننامەن كەزدەسۋ بارىسىندا ءوزارا قىزىعۋشىلىق تۋدىراتىن كەڭ اۋقىمدى ماسەلەلەر بويىنشا پاريجبەن ستراتەگيالىق ارىپتەستىكتى تەرەڭدەتۋ جونىندەگى ودان ارعى قادامدار تالقىلاندى.
مينيستر م.تىلەۋبەردى فرانتسۋز ارىپتەسىن بيىلعى ەۋروپالىق وداقتاعى توراعالىعىنىڭ تابىستى اياقتالۋىمەن قۇتتىقتاپ, قازاقستاننىڭ كەڭەيتىلگەن ارىپتەستىك پەن ىنتىماقتاستىق تۋرالى كەلىسىمدە, سونداي-اق ەو-نىڭ ورتالىق ازياعا ارنالعان ستراتەگياسىندا بەلگىلەنگەن بارلىق سالالاردا ىنتىماقتى ارتتىرۋدى جالعاستىرۋعا دەگەن نيەتىن اتاپ ءوتتى. فرانتسيا قازاقستاننىڭ نەگىزگى سەرىكتەستەرىنىڭ ءبىرى جانە ەلىمىزدىڭ ەۋرووداقپەن ءوزارا ءىس-قيمىلىنىڭ دانەكەرى.
تاراپتار جوعارى جانە اسا جوعارى دەڭگەيدەگى الداعى ءىس-شارالار كەستەسىن قاراپ, سىرتقى ساياسي ۆەدومستۆولار اراسىنداعى تۇراقتى بايلانىستى جالعاستىرۋعا كەلىستى.
ساۋدا-ەكونوميكالىق جانە ينۆەستيتسيالىق ىنتىماقتاستىقتى, اتاپ ايتقاندا ەنەرگەتيكا, اۋىل شارۋاشىلىعى, كولىك جانە ينفراقۇرىلىم, تسيفرلىق تەحنولوگيالار سياقتى سالالاردى دامىتۋعا ەرەكشە نازار اۋدارىلدى.
قازاقستاندىق تاراپ ءبىلىم, دەنساۋلىق ساقتاۋ, عىلىم جانە مادەنيەت سالاسىنداعى ەكىجاقتى بايلانىستاردى نىعايتۋعا قىزىعۋشىلىق ءبىلدىردى.
سونداي-اق مينيسترلەر 17 ماۋسىمدا پاريجدە وتكەن قازاقستان-فرانتسۋز ساياسي كونسۋلتاتسيالارىنىڭ 9-شى راۋندىنىڭ تابىستى وتكەنىن قۇپتادى.
