استانا. 24 ءساۋىر. قازىرگى تاڭدا ەل تۇرعىندارىنىڭ باسىم بولىگى وزدەرىن الدىمەن قازاقستاندىقپىز دەپ ەسەپتەيدى, ال سودان كەيىن بارىپ ءوز تەكتەرىن ايتادى. بۇل تۋرالى Kazakhstan Today حابارلادى.
الەۋمەتتانۋشى بەك ارعىنوۆ «ادامعا وتان تاڭداۋ قۇقى بەرىلمەيدى» اتتى ماقالاسىندا: «بۇگىندە ەلىمىزدىڭ حالقىنىڭ باسىم بولىگى وزدەرىن قازاقستاندىقپىز دەپ سانايدى. ولار سودان كەيىن بارىپ ءوز ۇلتتارىن ءسوز ەتەدى. قازاقستاندا ءبىر عانا ۇلت تۇرمايدى, بىراق وتانىمىز جالعىز, بىزدە تۇتىنىلاتىن ءدىن ءارتۇرلى, الايدا, ماقساتىمىز بىرەۋ, ول – دامىعان مەملەكەتتەردىڭ قاتارىندا تۇرۋ. قازاقستانداعى ءتۇرلى ەتنوستىڭ ارقايسىسىنىڭ ءوز تاريحي وتاندارى بار. ادام دۇنيەگە كەلگەندە ونىڭ وتان تاڭداۋعا مۇمكىندىگى بولمايدى...
بۇرىنعى كەزەڭدى بىلاي قويعاندا, قازىرگى تاۋەلسىزدىك جىلدارى «مەنىڭ وتانىم قازاقستان» دەپ ماقتاناتىن, ەلىنىڭ بولاشاعى ءۇشىن ۋايىم جەيتىن ۇرپاق ءوسىپ-ءونىپ شىقتى», – دەپ جازادى.
ماقالا اۆتور قازاقستان حالقىنىڭ تاتۋلىعى مەن بىرلىگى تالاي سىن تەزىنەن وتكەنىنە دە مىسالدار كەلتىرگەن.
«ەلىمىزدە كەلىسىم مەن تاتۋلىق جايدان-جاي ورنىققان جوق. ول حالىقتىڭ, مەملەكەتتىڭ كۇش-جىگەرىمەن قالىپتاستى», – دەيدى بەك ارعىنوۆ.
اۆتور ءوز ماقالاسىندا مەملەكەت باسشىسىنىڭ: «ءبىز بىرلەسە, تىزە قوسا وتىرىپ, وتانعا دەگەن سۇيىسپەنشىلىكتى وياتار سەنىمدى تۇعىرناما تۇزە بىلدىك. ءبىز قۇرعان قوعامدا ەتنوسارالىق كەلىسپەۋشىلىك جوق, بارلىعى زاڭ الدىندا بىردەي» دەگەن سوزىنە ەرەكشە ءمان بەرگەن.
بەك ارعىنوۆ ءوز ماقالاسىندا: «بارلىق قازاقستاندىقتار – تۋعان جەرىمىزدىڭ سۇيىكتى پەرزەنتتەرى. بىرلىك پەن تاتۋلىق – ءبىزدىڭ قوعامنىڭ باستى بايلىعى. ءبىزدىڭ ەكونوميكامىز دامىدى, ازاماتتاردىڭ ءال-اۋقاتى جاقساردى. ەندى الدىمىزدا «قازاقستان-2050» ستراتەگياسىن جۇزەگە اسىرۋ مىندەتى تۇر», – دەي كەلە وسى اۋقىمدى باعدارلامانىڭ تالابىن ورىنداۋدا بىرلىك پەن تاتۋلىقتىڭ ماڭىزدى ءرول اتقاراتىنىن ايتادى.
سونداي-اق, اۆتور قازاقستان حالقى اسسامبلەياسىن ەلىمىزدەگى رۋحاني جانە مادەني كەلىسىمنىڭ نەگىزگى تىرەگى دەپ سانايدى.
ەلىمىز بويىنشا 820 ەتنومادەني بىرلەستىكتىڭ باسىن بىرىكتىرىپ وتىرعان قازاقستان حالقى اسسامبلەياسى تاراپىنان الەم نازارىنا ۇسىنىلعان قازاقستاندىق مودەلدى بەك ارعىنوۆ جوعارى باعالايدى. ول اتالعان قۇرىلىمنىڭ اياسىندا اتقارىلىپ جاتقان جۇمىستاردىڭ جاستاردى وتانسۇيگىشتىككە تاربيەلەۋدە ماڭىزى زور ەكەنىن جەتكىزگەن.
جولدىباي بازار.
دەرەككوز: Kazakhstan Today.
فوتو: Altaynews.kz.
