اقتوبەدە مەشىتتىڭ بۇرىنعى باس يمامى ابايسىزدا كىسى ءولتىردى

اقتوبە. 24 ءساۋىر. اقتوبە وبلىسىندا ءبىر مەشىتتىڭ بۇرىنعى باس يمامى بولعان ازامات ءوزىنىڭ جاقىن تۋىسىن كۇرەكپەن ۇرىپ, مۇنىڭ سوڭى كىسى ولىمىمەن اياقتالدى. بۇل تۋرالى Bnews.kz حابارلادى. اتالعان وقيعانى تاراتا ايتار بولساق, 34 جاستاعى مارقۇم ەرنۇر اتىراۋباەۆ ويىلداعى كوكجار مەشىتىنىڭ بۇرىنعى يمامىن ءجيى مازالاپ, تىنىشىن الادى ەكەن. سودان شىدامى شەگىنە جەتكەن يمام التىنبەك كاكيەۆ جاقىن اعايىنى بولىپ كەلەتىن ونى كۇرەك سابىمەن بىرنەشە مارتە ۇرادى. سونىڭ سالدارىنان ەرنۇر اتىراۋباەۆ وقيعا ورنىندا تىلگە كەلمەي قايتىس بولادى. وسى جايتكە بايلانىستى ويىل اۋداندىق ورتالىق اۋرۋحاناسىنىڭ باس دارىگەرى ساندىبەك نۇرباەۆ: «ەرنۇر اتىراۋباەۆ اۋرۋحاناعا اكەلگەندە جانى شىعىپ كەتكەن. ونىڭ كوز جۇمعاندىعىن عانا راستادىق. سوسىن ءتارتىپ ساقشىلارىنا ءتۇسىندىرىپ, ءتيىستى قۇجاتتاردى تولتىرىپ بەردىك», – دەپتى. قازىر التىنبەك كاكيەۆ تەرگەۋ اباقتىسىنا جابىلدى. ءوز قولىمەن ىستەگەنىن مويىندادى. اقتوبە وبلىستىق ءىىد ءباسپاسوز قىزمەتىنىڭ مالىمدەۋىنشە, 1972 جىلى تۋعان التىنبەك كاكيەۆتىڭ ۇستىنەن قىلمىستىق كودەكستىڭ 109-بابى 3-ءبولىمى بويىنشا ءىس قوزعالدى. جولدىباي بازار. دەرەككوز: Bnews.kz. فوتو: Slando.ua.