قىتاي دەلەگاتسياسى ەلىمىزدىڭ مەملەكەتتىك قىزمەت مودەلىمەن تانىسادى

استانا. 24 ءساۋىر. بۇگىن استانادا مەملەكەتتىك قىزمەت ىستەرى جونىندەگى اگەنتتىك توراعاسى ءاليحان بايمەنوۆ پەن قىتاي حالىق رەسپۋبليكاسى ادام رەسۋرستارى جانە الەۋمەتتىك ساقتاندىرۋ ءمينيسترىنىڭ ورىنباسارى يان ششيتسيۋ كەزدەسەدى. بۇل تۋرالى مەملەكەتتىك قىزمەت ىستەر جونىندەگى اگەنتتىكتىڭ ءباسپاسوز قىزمەتى حابارلادى. كەزدەسۋ بارىسىندا قازاقستان تاراپىنان مەملەكەتتىك قىزمەت سالاسىنداعى جاڭا مودەلدىڭ جاي-جاپسارى ۇسىنىلماق. دالىرەگى, قىتاي دەلەگاتسياسى «ا» كورپۋسىنىڭ قالاي قالىپتاسقانىمەن, مەملەكەتتىك قىزمەتكەرلەرگە قويىلاتىن تالاپ دەڭگەيىمەن, ولاردىڭ جۇمىس ىستەۋ مانەرىمەن, سونداي-اق, وسى باعىتتا قۇرىلعان اقپاراتتىق-تالداۋ پورتالىنىڭ, ەلەكتروندى كىتاپحانا مەن ايماقتىق جۋرنالدىڭ جۇمىسىمەن تانىس بولادى. ەكى جاقتى كەزدەسۋ سوڭىندا مەملەكەتتىك قىزمەت ىستەرى جونىندەگى اگەنتتىك پەن قىتاي حالىق رەسپۋبليكاسى ادام رەسۋرستارى جانە الەۋمەتتىك ساقتاندىرۋ مينيسترلىگى اراسىندا ءوزارا كەلىسىم مەموراندۋمىنا قول قويىلادى. بۇل قۇجاتتا ەكى ەلدىڭ مەملەكەتتىك قىزمەتكەرلەرىنىڭ تاجىريبە الماسۋى, ارنايى باعدارلاما بويىنشا كاسىبي وقىتۋ ءىسىن جولعا قويۋ سىندى ماسەلەلەر قامتىلادى دەپ كۇتىلۋدە. سونىمەن قاتار, قىتاي دەلەگاتسياسىنىڭ رەسمي ساپارى بارىسىندا مەملەكەتتىك قىزمەت ىستەرى اگەنتتىگى مەن مەملەكەتتىك ورگانداردىڭ كادرلىق قىزمەتىن اۆتوماتتاندىرۋ, حالىقارالىق تاجىريبەگە سايكەستەندىرۋ ءۇشىن قۇرىلعان«ە-قىزمەت» جۇيەسىنىڭ ماقساتى جانە مەملەكەتتىك قىزمەت اياسىندا ورنىققان ايماقتىق حابتىڭ بۇگىنگى دەڭگەيى اڭگىمە ارقاۋىنا اينالماق. جولدىباي بازار. دەرەككوز: مەملەكەتتىك قىزمەت ىستەر جونىندەگى اگەنتتىكتىڭ ءباسپاسوز قىزمەتى. فوتو: Liter.kz.