ونىڭ تاڭداعان ماماندىعىنا ادالدىعى قاڭتارداعى وقيعا كەزىندە تانىلدى. سول ءبىر قيىن كۇندەردە اق حالاتىنا داق تۇسىرمەي, كومەك سۇراعان جاننىڭ بارىنە قول ۇشىن سوزۋعا ۇمتىلدى. ويتكەنى بۇلىكشىلەردەن زارداپ شەككەندەر الدىمەن جەدەل جاردەم قىزمەتىنە جۇگىندى.
– قاڭتارداعى قاقتىعىسقا تولى وقيعا بارشانىڭ ەسىنەن قاپەلىمدە ۇمىتىلا قويمايتىن شىعار. ب ۇلىكشىلەر ساربازدار مەن پوليتسيا قىزمەتكەرلەرىن اۆتوكولىكتەن شىعارىپ الىپ, سوققىعا جىقتى. دەنساۋلىعىنا زاقىم كەلتىردى. سول كەزدە ولارعا كۇندىزگى اۋىسىم-
داعى فەلدشەرلەرىمىز كومەك كورسەتتى. ال مەن كەزەكشىلىگىمدى كەشكى اۋىسىمدا اتقاردىم. زارداپ شەككەن ساربازداردى مەديتسينالىق كومەك كورسەتىلگەننەن كەيىن كازارماعا جەتكىزۋدى ويلادىق, – دەيدى قاڭتارداعى وقيعانى ەسىنە العان نۇرلان سالاۋات ۇلى.
بىراق وزگە تۇگىلى جەدەل جاردەم بريگاداسىنىڭ قىزمەتكەرلەرىنە كوشەدە ءجۇرۋ قاۋىپتى ەدى. ال ۇيىنەن جىراقتا بورىشىن وتەپ جۇرگەن ساربازداردى كازارماعا جىبەرە سالۋ تىپتەن مۇمكىن ەمەس. سول سەبەپتەن, ساربازدارعا قاۋىپسىزدىك ءۇشىن جەدەل جاردەم قىزمەتكەرىنىڭ كيىمىن كيگىزىپ, ارنايى كولىكپەن جەتكىزۋگە شەشىم قابىلداندى. ساربازداردى نۇرلانمەن ءبىر بريگاداداعى جۇرگىزۋشى تالعات پەن فەلدشەر نۇرگۇل «ۆودنيكوۆ» شاعىن اۋدانىندا ورنالاسقان اسكەري بولىمگە جەتكىزدى.
– ءبىزدىڭ مىندەتىمىز – جاراقات العان, نە سىرقاتتانعان ءار ادامعا العاشقى مەديتسينالىق كورسەتۋ. ارينە, ساربازداردى وتاندى قورعاۋشى دەسەك تە, الايدا بىزگە ولاردىڭ تاعدىرىن قورعاۋعا تۋرا كەلدى. قازىر سونىڭ ءبارى جەڭىل اتقارىلعان سياقتى كورىنۋى مۇمكىن. بىراق ءوز ومىرىمىزگە قاۋىپ تۋىنداسا دا مىندەتىمىزدى ادال اتقارۋدى عانا ويلادىق. سول ساتتە ادام تاعدىرىنا اراشا تۇرۋدى عانا ماقسات ەتتىك, – دەپ اعىنان جارىلا اڭگىمەلەدى فەلدشەر.
نۇرلان سالاۋات ۇلىنىڭ كىندىك قانى يندەر اۋدانىندا تامعان. وتباسىنداعى ءۇش بالانىڭ ءبىرى بولعانىمەن, قازىر ءوزى ەكى ۇلدىڭ اكەسى اتانىپ وتىر. كەزىندە ەسەپشى بولعان اكەسى مال شارۋاشىلىعىن وركەندەتۋدى قولعا العان. ال اناسى بالاباقشادا جۇمىس ىستەيدى.
– اجەمنىڭ, اكە-شەشەمنىڭ ۇلاعاتتى اڭگىمەسىنە قانىق بولىپ ءوستىم. ۇلكەندەر ۇنەمى اماندىعىمىزدى تىلەپ, ومىرلىك باعىت-باعدار بەرىپ وتىرادى. قينالعان جانعا كومەك بەرۋگە ۇمتىلىپ, مەيىرىمدىلىك تانىتسام, سونىڭ ءبارى – ۇلكەندەردىڭ تاربيەسى. ويتكەنى مەديتسينا سالاسى ماماندارىنىڭ جۇرەگى مەيىرىم مەن قايىرىمعا تولى دەپ ەسەپتەيمىن. ناۋقاستىڭ سىرقاتىنا ءدارى-دارمەك شيپا بولسا, ال جانىن جادىراتاتىن مەيىرىمگە ەشتەڭە جەتپەيدى, – دەيدى كاسىبىنە ادالدىعىنان تايماعان ن.سالاۋات ۇلى.
فەلدشەر جىگىت بيىلعى ناۋرىز مەرەكەسى قارساڭىندا «شاپاعات» مەدالىمەن ماراپاتتالدى. ونى وبلىستىق جەدەل جاردەم ۇجىمى مەملەكەتتىك ماراپاتقا ۇسىنعان. «ەلورداعا كەلىڭىز, پرەزيدەنت سىزگە ماراپات تاپسىرادى» دەگەن جاڭالىقتى ەستىگەندە, ابدىراپ قالعانىن جاسىرمايدى.
– مەن ماماندىعىمدى پرەزيدەنتتىڭ قولىنان ماراپات الۋ ءۇشىن تاڭداعان جوق ەدىم. فەلدشەر بولۋ – جۇرەگىمنىڭ قالاۋى. جۇمىسىمدى مۇمكىندىگىمشە ادال اتقارۋعا تىرىسامىن. ويتكەنى سىرقاتتانعان, ءتۇرلى قيىندىققا تاپ بولىپ, جانى قينالعان جاندار الدىمەن جەدەل جاردەم قىزمەتكەرلەرىنەن كومەك كۇتەدى. قاڭتارداعى وقيعا كەزىندە دە سولاي بولدى. تەلەفون ارقىلى حابارلاسىپ, «سىزگە پرەزيدەنت مەملەكەتتىك ماراپات تاپسىرادى» دەگەندە, كوڭىلىم الاي-دۇلەي كۇيگە تۇسكەنىن جاسىرمايمىن. «مەملەكەتتىك ماراپاتقا لايىقپىن با؟» دەگەن ويعا بەرىلدىم. ەلورداداعى سالتاناتتى ءىس-شاراعا بارعاندا, ودان سايىن قوبالجىعانىم راس. بۇل بالكىم مەملەكەتتىك ماراپات الۋدىڭ جاۋاپكەرشىلىگىن سەزىنگەننەن بولار. مەملەكەت باسشىسى «شاپاعات» مەدالىن تاعىپ, «قۇتتى بولسىن!» دەپ قولىمدى العاندا, مۇنى مەن سەكىلدى جاس مامانعا ۇلكەن سەنىم, قولداۋ رەتىندە ۇعىندىم, – دەيدى كەزەكتى شاقىرتۋعا اسىققان فەلدشەر جىگىت.
اتىراۋ وبلىسى
