اق قاعاز بەتىندە كومىر مەن سوۋستى قولدانۋ ارقىلى كەسكىندەمە ونەرىنەن قۇپيا ىزدەگەن جاس سۋرەتشى اسەمقۇل بەيبىتتىڭ شىعارماشىلىعى ەرەكشە. قاراپايىم تاسىلمەن ورىندالعانىنا قاراماستان, گرافيكا پاراقتارىندا قىلقالام يەسىنىڭ ەموتسيونالدىق كۇيزەلىسى مەن ىشكى جان-تەبىرەنىسى بايقالىپ تۇرادى.
سۋرەتكەر كومپوزيتسيانى ۇتىمدى شەشۋ ءۇشىن, فورمانى قالىپتاستىرۋعا ەرەكشە ءمان بەرەدى. 2015 جىلى جازىلعان «قارا تون» تۋىندىسى سوزىمىزگە دالەل. شىعارمادا قارا تون جامىلىپ, ۇيىقتاپ جاتقان ايەل ادام بەينەلەنگەن. مۇندا ءومىردىڭ ازابى اۋىر ۇيقىمەن استاسىپ جاتىر. انانىڭ قارا توندى جامىلىپ سىرتقى دۇنيەدەن وقشاۋلانۋى, ءوزىن شەكتەۋى, قورعانۋى, سونىمەن بىرگە دارمەنسىزدىگى بايقالادى.
قارا تون – شارشاپ-شالدىعۋدىڭ بەلگىسى. ۇيقى – بۇل كەز كەلگەن ادامنىڭ ءبىر ۋاقىتقا تۇيىقتالۋى, قۇپيالانۋى. سۋرەتشى كومپوزيتسيانى جوعارعى نۇكتەدەن الىپ جازعان. ياعني كەڭىستىكتە تەرەڭدىك قالىپتاسپاي, كەرىسىنشە, جازىقتىق بەتىندەگى فورمالار اق قاعاز بەتىندە ويناپ, كولەم قالىپتاستىرا تۇسكەن. مىسالى, توننىڭ استىنداعى ادامنىڭ دەنە ءپىشىنى, توننىڭ جەڭدەرىن جازۋى. بار-جوعى قوس ءتۇس ءارى ءتۇرلى شتريحتىڭ ءوزارا كۇردەلى بايلانىسى ارقىلى ءار زاتتىڭ, فورمانىڭ كولەمى نانىمدى بەينەلەنگەن. باقساڭىز, كومپوزيتسياداعى كىشىگىرىم دەتالدار دا قاراپايىم شەشىلگەن. جەرگە توسەلگەن الاشا جانە جاستىقتار بىرنەشە جولاقپەن ورىلگەن. شاركەيى – بۇل ءۇيدىڭ جايلىلىعىن بىلدىرەدى. ول ءوزىنىڭ الەمى, ايەل ادامنىڭ جەكە كەڭىستىگى.
اۆتور بۇل جۇمىستى جىلدام تاماشالاۋعا ەمەس, اسىقپاي سۋرەتشىنىڭ قيمىلىمەن, ويىمەن شارپىسىپ, ونىڭ بوياۋمەن باياندالعان قاراپايىم سيۋجەتىن كورۋگە اسىعادى. قانشا جەردەن قاراپايىم بولسا دا, مەيىرىمدىلىك, ماحاببات سەزىمدەرى ارقاۋ بولعان شىعارما ەلەڭ ەتكىزبەي قويمايدى. سۋرەتشى ءوزىنىڭ جەكە الەمىن جاساۋ ارقىلى, جالپى, ءومىردىڭ فيلوسوفياسىن ۇعىنۋعا تىرىسادى.
