«زاڭ جوباسىمەن بەس باعىت بويىنشا مىندەتتەردى جۇزەگە اسىرۋ قاراستىرىلادى. بۇل باعىتتار: ەكونوميكا سەكتورلارىنىڭ ەنەرگيا تيىمدىلىگىن ارتتىرۋ جانە جالپى ىشكى ءونىمنىڭ ەنەرگيا سىيىمدىلىعىن تومەندەتۋ, ەلەكتر ستانتسيالارىندا گاز قوندىرعىلارىن سالۋ بويىنشا ينۆەستيتسيالىق جوبالاردى ىسكە اسىرۋ, الماتى قالاسىن دامىتۋ شەڭبەرىندە قوعامدىق قاتىناستاردى رەتتەۋدى جەتىلدىرۋ, ءداستۇرلى ەمەس كومىرسۋتەكتەردى ءوندىرۋدى دامىتۋ, سونداي-اق شەكارا بولىمشەلەرى مەن مەملەكەتتىك شەكارا ارقىلى وتكىزۋ پۋنكتتەرىن سالۋ جونىندەگى ماسەلەلەردى شەشۋ بولىپ تابىلادى. اتالعان زاڭ جوباسى جۇمىس توبىنىڭ وتىرىستارىندا, تۇراقتى كوميتەتتەردە, كوميتەتتىڭ كەڭەيتىلگەن وتىرىسىندا جان-جاقتى تالقىلانىپ قارالدى», دەدى سەنات دەپۋتاتى ەرىك سۇلتانوۆ بۇگىنگى جالپى وتىرىستا.
ونىڭ ايتۋىنشا, زاڭ جوباسىن تالقىلاۋ بارىسىندا سەنات دەپۋتاتتارى بىرقاتار وزگەرىس پەن تولىقتىرۋ ەنگىزدى. «ونىڭ ىشىندە جىلجىمايتىن م ۇلىكتى راسىمدەۋ ماسەلەلەرىن قاراۋ جونىندەگى كوميسسيانىڭ قىزمەتى مەن قۇزىرەتى بويىنشا نورمالاردى ناقتىلاۋ («الماتى قالاسىنىڭ ەرەكشە مارتەبەسى تۋرالى» قر زاڭىنا تۇزەتۋلەر).
كوپپاتەرلى تۇرعىن ۇيلەردىڭ كوندومينيۋم وبەكتىسىن باسقارۋدىڭ جاڭا نىساندارىنا كوشۋ مەرزىمدەرىن 2023 جىلعى 1 شىلدەگە دەيىن ۇزارتۋ («قر كەيبىر زاڭنامالىق اكتىلەرىنە تۇرعىن ءۇي-كوممۋنالدىق شارۋاشىلىق ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قر زاڭىنا تۇزەتۋلەر).
قر ۇلتتىق عىلىم اكادەمياسىنىڭ ۇيىمدىق-قۇقىقتىق نىسانىن وزگەرتۋ جانە ونىڭ نەگىزگى وكىلەتتىكتەرىن ايقىنداۋ, سونداي-اق ۇلتتىق عىلىم اكادەمياسىنىڭ اكادەميگى ۇعىمىن بەكىتۋ جانە زەينەت جاسىنا جەتكەن كەزدە وعان ءومىر بويعى اي سايىنعى ستيپەنديا بەلگىلەۋدى ەنگىزۋ قۇقىعىن بەرەتىن نورمالار قاراستىرىلعان («عىلىم تۋرالى» قر زاڭىنا تۇزەتۋلەر)», دەدى ە. سۇلتانوۆ.
بارلىق ەسكەرتپەلەر مەن ۇسىنىستار سالىستىرمالى كەستەگە ەنگىزىلگەن جانە جيناقتالعان.
«باياندالعاندى ەسكەرە كەلە, ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتى پارلامەنت ءماجىلىسى ماقۇلداعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەلەكتر ەنەرگەتيكاسى, ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ, جەر قويناۋىن پايدالانۋ, جەرگىلىكتى مەملەكەتتىك باسقارۋ جانە مەملەكەتتىك شەكارا ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قر زاڭىنىڭ جوباسىنا وزگەرىستەر مەن تولىقتىرۋلاردى قازاقستان رەسپۋبليكاسى كونستيتۋتسياسى 61-بابىنىڭ 5-تارماعىنا سايكەس پارلامەنت ماجىلىسىنە جىبەرۋدى ۇسىنادى», دەدى ە. سۇلتانوۆ.
دەپۋتاتتاردىڭ داۋىس بەرۋ ناتيجەسىندە زاڭ جوباسىنا سەنات ەنگىزگەن 6 تۇزەتۋ ماجىلىسكە قايتا جىبەرىلدى.
