الماتىداعى قىزدار مەملەكەتتىك ۋنيۆەرسيتەتى الدىنداعى سۋبۇرقاق وسىلاي اتالادى
ءساۋىر كەلىپ, كۇن رايى تاۋىرلەنە باستاعاننان-اق, بارشا بايىرعى وقۋ ورىندار كەزەگىمەن ۇلىستىڭ ۇلى كۇنىن اتاپ وتۋدە. وسىلاردىڭ ىشىندەگى وزگەشەسى – قازاق مەملەكەتتىك قىزدار پەداگوگيكالىق ۋنيۆەرسيتەتىندە «قازاق ارۋى» ەسكەرتكىش-سۋبۇرقاعى اشىلىپ, وعان الماتى قالاسىنىڭ اكىمى احمەتجان ەسىموۆ ارنايى قاتىستى.
بيىل 70 جىلدىعىن اتاپ وتۋگە جان-جاقتى دايىندالىپ وتىرعان قىزدار ۋنيۆەرسيتەتىندەگى تاعى ءبىر جاعىمدى جاڭالىقتىڭ ءبىرى – 9 قاباتتى, 450 ورىندىق جاتاقحانا بوي كوتەرمەك. قالا اكىمى وسى وقيعاعا دا ورتاقتاسىپ, ءوز قولىمەن جاتاقحانا ىرگەتاسىنداعى قۇرىلىس تاعانىنا «دۇنيەنىڭ تىرەگى – تەكتى تاربيە, تەرەڭ ءبىلىم» دەگەن تاعىلىم تىلەك جازىلعان قۇتىنى ورنالاستىردى.
ال ۋنيۆەرسيتەتتىڭ وقۋ-جاتاقحانالارى ورنالاسقان عيماراتتارىنىڭ ءدال ورتاسىندا ۇلتتىق كيىمدەگى قازاق قىزىنىڭ ءمۇسىنى بوي كوتەردى. قىزدار ۋنيۆەرسيتەتىنىڭ كورىگىنە كورىك قوسقان سۋبۇرقاقتىڭ بيىكتىگى 5 مەتردەن اسادى. سۋبۇرقاق اينالاسىنا قازاق جانە الەم ويشىلدارىنىڭ دانالىق سوزدەرى جازىلعان 12 كىتاپ ورناتىلعان. ەسكەرتكىش تۇعىرى بىلەزىك پىشىنىمەن اياقتالادى. ۇلتتىق ناقىشتا, ستۋدەنتتەر بويىندا رۋحاني ادەمىلىك پەن رۋحاني قۇندىلىقتارعا دەگەن ىنتىزارلىقتى ارتتىرۋ ماقساتىندا سالىنعان سۋبۇرقاق ءمارماردان جاسالعان.
سۋبۇرقاق-ەسكەرتكىشتىڭ اۆتورى – ءمۇسىنشى نۇرلان بۇحارباەۆ ەسكەرتكىشتە قازاق قىزىنىڭ بولاشاققا دەگەن ۇمتىلىسىن بەينەلەۋگە ونەرىن سالىپتى.
الماتى قالاسى اكىمىنىڭ ناۋرىز مەرەكەسىندە قىزدارعا تاعى ءبىر سىيى – سۋبۇرقاق اينالاسىنا شىرشا اعاشتارىن ەكتى. تال ەگۋدىڭ سوڭى تويعا ۇلاسىپ, سالتاناتتى جيىندا احمەتجان ەسىموۆ:
– ...وسى ۋنيۆەرسيتەتكە كەلگەن ساپارىندا ەلباسى ن.ءا.نازارباەۆ «ءبىر قىزدى تاربيەلەۋ – ءبىر ۇلتتى تاربيەلەۋمەن بىردەي» دەگەن بولاتىن. بۇل – قىزدار ۋنيۆەرسيتەتىنە بەرىلگەن ۇلكەن باعا.
قازاق مەملەكەتتىك قىزدار پەداگوگيكالىق ۋنيۆەرسيتەتى – ءتاۋەلسىز قازاقستانىمىز بەن تمد اۋماعىنداعى تەك ارۋلارعا جوعارى ءبىلىم بەرەتىن وقۋ ورداسى بولىپ تابىلادى. 70 جىلدىق تاريحى بار, وزىندىك دارا بىتىمىمەن ەرەكشەلەنەتىن ءبىلىم وشاعى جوعارى ساپالى پەداگوگ دايىنداپ قانا قويماي, وقۋ ورنىن ءبىتىرىپ شىققان ءار قازاق قىزىنا ونەگەلى ءتاربيە بەرىپ, قىزداردىڭ باعىت الار باعدارشامى بولىپ كەلە جاتقان كيەلى شاڭىراعىنا اينالدى.
قالا اكىمى بۇگىندە تۇلەكتەرىنىڭ سانى 60 مىڭعا جۋىق ۋنيۆەرسيتەتتەن شىققان ەلگە بەلگىلى تۇلعالاردىڭ ەسىمدەرىن اتاپ, ءوز جارىنىڭ دا قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ تۇلەگى ەكەندىگىن ايتىپ ءوتتى.
ۇلىستىڭ ۇلى كۇنىنە وراي ۇيىمداستىرىلعان شارا مەرەكەگە ۇلاسىپ, كونتسەرتتىك باعدارلامادا ۋنيۆەرسيتەتتىڭ ماقتانىشتارىنا اينالعان حالىقارالىق جانە رەسپۋبليكالىق بايقاۋلاردىڭ لاۋرەاتى «توميريس» بي ءانسامبلى, ەلىمىزگە ايگىلى «ايگۇل» ءانسامبلى, رەسپۋبليكاعا تانىمال «ۇلار» فولكلورلى-ەتنوگرافيالىق انسامبلى جانە تاعى باسقا جاس ونەرپازدار ونەر كورسەتتى.
ايناش ەسالي,
«ەگەمەن قازاقستان».
الماتى.
