نۇر-سۇلتان قالالىق ءماسليحاتتىڭ كەزەكتى وتىرىسىندا 2021 جىلعى قالالىق بيۋدجەتتىڭ يگەرىلۋ ماسەلەسى سارالاندى.
«وتكەن جىلى قالالىق بيۋدجەتكە 720 ملرد 378 ملن تەڭگە قارجى ءتۇستى. وسىلايشا جوسپار 43 ملرد 156 ملن تەڭگەگە ارتىعىمەن ورىندالدى. ونىڭ ىشىندە جەكە تابىس 496 ملرد 264 ملن تەڭگەنى قۇرايدى. سونىمەن قاتار 2021 جىلى سالىقتان 455 ملرد 273 ملن تەڭگە قارجى ءتۇستى. بيۋدجەت شىعىسىنا كەلسەك وتكەن جىلدىڭ قورىتىندىسى بويىنشا 699 ملرد 900 ملن تەڭگەنى قۇرادى», دەدى نۇر-سۇلتان قالاسى قارجى باسقارماسىنىڭ باسشىسى ءالىبي جۇماەۆ ءوز بايانداماسىندا.
كورسەتىلگەن اقپاراتقا سايكەس, وتكەن جىلى نۇر-سۇلتان قالاسىنىڭ بيۋدجەتىن يگەرۋ كورسەتكىشى 97,2%-دى قۇراعان.
«وتكەن جىلى قۇرىلىس باسقارماسى قارجىنىڭ 53,8%-ىن يگەرمەگەن, وتىن-ەنەرگەتيكا كەشەنى جانە كوممۋنالدىق شارۋاشىلىق باسقارماسى - 38,4%, ءبىلىم باسقارماسى - 1,5%, پوليتسيا دەپارتامەنتى - 1,4%, سول سياقتى دەنە شىنىقتىرۋ جانە سپورت باسقارماسى - 1,2%-عا قارجىنى يگەرمەي وتىر. وسىعان سايكەس, 2021 جىلدىڭ قورىتىندىسى بويىنشا بيۋدجەت قاراجاتى ۋاقىتىلى يگەرىلمەگەنى ءۇشىن 15 لاۋازىمدى تۇلعا جاۋاپكەرشىلىككە تارتىلدى», دەيدى ول.
