وقىس وقيعا ورىن العان ۋاقىتتا شاھاردى نۇرجان اشىمبەتوۆ باسقارىپ وتىرعان-دى. اكىم شۇعىل جينالىس اشىپ, اتالعان جايتقا قاتىسى بار مەكەمە باسشىلارى گالستۋكتارىن تاعۋعا ۇلگەرمەي اسىعىس اكىمدىكتى بەتكە الدى. تەك كارىز قۇدىقتارىنىڭ قاقپاسىن اشىق كۇيىندە قالدىرعان «دالا» جشس-ءنىڭ وكىلدەرى توبە كورسەتپەدى. سەرىكتەستىك وزدەرىن «بانكروتپىز» دەپ جاريالاپتى.
بەلگىلى بولعانداي, «دالا» سەرىكتەستىگى اقسۋ قالاسىنا 2018 جىلى كەلگەن. ياعني پاۆلودارلىق مەردىگەر ەمەس. سول جىلى توزىعى جەتكەن سۋ قۇبىرى جەلىلەرىن قايتا جاڭعىرتۋعا كونكۋرس جاريالانىپ, اتالعان مەكەمە جەڭىمپاز اتانىپتى. جوبا اۋقىمدى. اقسۋ قالاسىنداعى 20 شاقىرىم سۋ قۇبىرلارى اۋىستىرىلۋى كەرەك-ءتىن. ءىرى جوبا بولعاندىقتان, بۇل ىسكە بولىنگەن قاراجات تا قوماقتى ەكەنىن اڭعارا بەرىڭىز. قىسقاسى, «دالالىقتار» 3 جىلعا سوزىلعان جوبانىڭ استان-كەستەڭىن شىعارىپ, 10 شاقىرىم جەرگە عانا قۇبىر توسەپتى. ال 2020 جىلدىڭ قاراشا ايىندا شاھاردان تايىپ تۇرعان.
كەيىن انىقتالعانداي, اتالعان مەردىگەردىڭ بۇعان دەيىن قارجىلىق پروبلەمالارى بولعان ەكەن. ەسەپشوتتارى بۇعاتتالىپ, سايكەسىنشە اقسۋ قالاسىنداعى جوبانى اياقتاي الماعان. سونىڭ كەسىرىنەن, بىلتىر قىس بويى قازىلعان ۋچاسكەلەر اشىق كۇيىندە جاتىپ, كوكتەمدە ەرىگەن قاردىڭ سالدارىنان اپاتتى كۇيگە اينالدى. ەسكى قۇبىرلاردىڭ كەسىرىنەن قىس بويى سۋ قۇبىرلارى ءجيى جارىلىپ, اپاتتى جاعدايلار ورىن الدى. سوراقىسى سول, 50 كارىز قۇدىعىنىڭ قاقپاعى اشىق كۇيىندە قالعان. سولاردىڭ بىرىنە وقۋشى قىز قۇلاپ كەتكەن.
بۇل ماسەلەنى وسى ۋاقىتقا دەيىن قۇقىق قورعاۋ ورگاندارى مايشاممەن قاراپ, اقىرى مەملەكەت قارجىسىنىڭ جىمقىرىلعانىن انىقتادى. اقسۋ قالاسىنىڭ قۇرىلىس ءبولىمىنىڭ باسشىسى ت.مۇزدىباەۆ, «دالا» جشس-ءنىڭ ديرەكتورى ب.رىسبەكوۆ جانە تەحنيكالىق قاداعالاۋ مامانى ج.نۇرتازين ءتيىستى جۇمىستار اتقارىلماسا دا شارۋانىڭ اياقتالعانى تۋرالى قۇجاتتارعا قول قويىپ, مەملەكەتكە 340 ملن تەڭگە شىعىن كەلتىرگەن. سوتتىڭ شەشىمىمەن ت.مۇزدىباەۆ جانە ج.نۇرتازين 7 جىلعا باس بوستاندىعىنان ايىرىلسا, ب.رىسبەكوۆ 9 جىلعا سوتتالدى. ايتپاقشى, ت.مۇزدىباەۆ «ەرەن ەڭبەگى ءۇشىن» مەدالىمەن دە قوش ايتىستى.
وسىلايشا, وسىدان 4-5 جىل بۇرىن قولعا الىنعان سۋ قۇبىرى جۇيەسىن جاڭعىرتۋ جۇمىستارىنىڭ استان-كەستەڭى شىقتى. كىنالىلەر سوتتالعانىمەن, بيۋدجەت شىعىنىنىڭ ورنى تولتىرىلا ما؟ جەرگىلىكتى اكىمدىك اياقسىز قالعان شارۋانى ءويتىپ-ءبۇيتىپ اياقتاعانىمەن, ءاۋ باستا جوسپارلانعان جاڭعىرتۋ جۇمىستارىنىڭ جۇزەگە اسقانى ەكىتالاي. سەبەبى «دالالىقتار» اقشانى دالاعا شاشتى ەكەن دەپ رەسپۋبليكالىق قازىنادان قوماقتى قاراجات قايتادان بولىنگەن جوق. وبلىستىق بيۋدجەت تە ساۋىن سيىر ەمەس. ابىروي بولعاندا بيىل قىس جايلى ءوتتى. ايتپەسە, ءتۇرلى اقاۋلار تابىلىپ, سۋ قۇبىرلارى جارىلىپ, اكىمدىكتى اياعىنان تىك تۇرعىزار ما ەدى؟ جالپى, وتكەن قىسقا اقسۋلىق بيلىكتىڭ وكپەسى جوق شىعار. شاھارداعى جىلۋ جۇيەسىنىڭ وڭىپ تۇرعانى دا شامالى. الداعى قىس قانداي توسىن سىي دايىنداپ وتىرعانى بەلگىسىز. سوندىقتان دا جەرگىلىكتى اكىمدىك كوممۋنالدىق پروبلەمالاردى ۋاقتىلى رەتتەيدى دەگەن سەنىم مول.
جوعارىدا بۇرىنعى قالا اكىمى نۇرجان اشىمبەتوۆتى بەكەر ءسوز ەتكەنىمىز جوق. ول شاھارعا باسشى بولىپ كەلگەننەن كەيىن از ۋاقىتتىڭ ىشىندە نەبىر زاڭبۇزۋشىلىقتار انىقتالا باستادى. قولاستىنداعى قىزمەتكەرلەرىنىڭ مەردىگەرلەرمەن ىم-جىمى ءبىر ەكەنى دە ايتىلدى. بۇرىنعى ءتاتتى ومىردەن قول ۇزگەن اكىمدىك قىزمەتكەرلەرى اقىرى قول جيناپ, نۇرجان اشىمبەتوۆتى جۇمىسىنان كەتىرىپ تىندى. بۇگىندە شاھار بيلىگى وزگەرگەن. بىراق پروبلەمالار سول قالپى...
پاۆلودار وبلىسى,
اقسۋ قالاسى
