«جالپى, ەلىمىزدە فارماتسەۆتيكا سالاسىندا ءوندىرىس كولەمىنىڭ وسكەنىن اتاپ وتكەن ءجون. 2021 جىلى فارماتسەۆتيكا ونەركاسىبى وڭ سەرپىن كورسەتتى, بۇل رەتتە فارماتسەۆتيكالىق ءونىمنىڭ كولەمى 2020 جىلمەن سالىستىرعاندا 124%-دى قۇرايدى. بيىلعى قاڭتار-ءساۋىر ايلارىندا فارماتسەۆتيكالىق ءونىم كولەمى وتكەن جىلدىڭ وسى كەزەڭىمەن سالىستىرعاندا 5% ءوستى», دەدى اجار عينيات ۇكىمەتتىڭ كەزەكتى وتىرىسىندا.
ونىڭ ايتۋىنشا, بۇل ءوسىم «حيمفارم» اق, «نوبەل افف» اق, «ابدي يبراگيم گلوبالفارم» جشس, «كەلۋن-كازفارم» جشس وندىرىستىك الاڭدارىندا ءدارى ءوندىرىسى كولەمىنىڭ وسۋىمەن بايلانىستى.
«قازاقستاندا فارماتسەۆتيكا ونەركاسىبى مەملەكەتتىك قولداۋدىڭ ارقاسىندا ءتيىمدى ينۆەستيتسيانىڭ ۇلكەن الەۋەتىنە يە بولدى. وسىلايشا, وتاندىق تاۋار وندىرۋشىلەرمەن مەملەكەتتىك قولداۋدىڭ ارقاسىندا 10 جىلعا ۇزاقمەرزىمدى شارتتار جاسالدى. ول ساتىپ الۋ ۇلەسىن اقشالاي ماندە 2010 جىلى 15%-دان 2021 جىلى 41%-عا دەيىن ۇلعايتۋعا مۇمكىندىك بەردى», دەدى دەنساۋلىق ساقتاۋ ءمينيسترى.
دەنساۋلىق ساقتاۋ مينيسترلىگى وتاندىق وندىرۋشىلەرگە قولداۋ كورسەتۋ ءۇشىن بىرقاتار شارا قابىلداعان. پاندەميا كەزىندە وتاندىق دارىلىك زاتتار مەن مەديتسينالىق بۇيىمداردىڭ قاۋىپسىزدىگى مەن ساپاسىنا باعالاۋ جۇرگىزۋ جانە وتاندىق دارىلىك زاتتار مەن مەديتسينالىق بۇيىمداردىڭ تىركەۋ ساراپتاماسى جەدەلدەتىلدى. ۇزاقمەرزىمدى شارتتار جاساسۋعا ءونىم بەرۋشىلەردى ىرىكتەۋ ولشەمشارتتارى قايتا قارالدى. ۇزاقمەرزىمدى شارتتاردى ورىنداۋعا مونيتورينگ جۇرگىزىلەدى.
بىرىڭعاي ديستريبيۋتور 37 وتاندىق تاۋار وندىرۋشىمەن 5 مىڭنان دارىلىك زاتتار مەن مەديتسينالىق بۇيىمداردى (811 دارىلىك زات جانە 4 196 مەديتسينالىق بۇيىم) جەتكىزۋگە 96 ۇزاقمەرزىمدى شارت جاسادى.
ونىڭ ىشىندە دارىلىك زاتتارعا - 43, مەديتسينالىق بۇيىمدارعا - 53 ۇزاقمەرزىمدى شارت جاسادى.
«قازىر جاسالعان شارتتار شەڭبەرىندە 37 ينۆەستيتسيالىق جوبا ىسكە اسىپ جاتىر. ونىڭ ىشىندە 127 ملرد تەڭگەگە دارىلىك زاتتار بويىنشا 12 جوبا, 34 ملرد تەڭگە سوماسىنا مەديتسينالىق بۇيىمدار بويىنشا 23 جوبا بار. فارماتسەۆتيكا كاسىپورىندارى نەگىزىنەن الماتى, قاراعاندى وبلىستارىندا, شىمكەنت جانە الماتى قالالارىندا شوعىرلانعان», دەدى اجار عينيات.
