ول بىرگە ىشىمدىك ىشكەن تانىستارىنىڭ قولىنان قازا تاپقانى انىقتالدى. وڭىردە بيىلعى 5 ايدا كىسى قولىنان 11 ادام كوز جۇمدى. وسى ءىس بويىنشا 26 كۇدىكتى انىقتالدى. ولاردىڭ جارتىسى جۇمىسسىزدار, بۇرىن سوتتى بولعاندار مەن ماساڭ كۇيدە ءوز ارەكەتىنە جاۋاپ بەرە الماعاندار. وقيعانىڭ كوبىسى قوعامدىق ورىنداردا بولعان.
وبلىستىق پروكۋراتۋرا تاراپىنان جۇرگىزىلگەن تالداۋ-زەردەلەۋ جۇمىستارىنىڭ ناتيجەسىندە اۋىر جانە اسا اۋىر قىلمىستاردىڭ باستى سەبەبى انىقتالدى. بۇل قىلمىستىڭ باسىم كوپشىلىگى وتباسىنداعى داۋ, كيكىلجىڭ, تۇسىنبەۋشىلىك, جۇمىسسىزدىق, ىشىمدىككە سالىنۋ, ءبىر-بىرىنە اۋىر ءسوز ايتۋ, ار-نامىسىن قورلاۋ سەكىلدى جاعدايلاردان تۋىنداعان.
«قالا تۇرعىنى سپيرتتىك ىشىمدىككە سالىنىپ كەتكەن اكەسىن ىزدەپ پوليتسياعا حابارلاعان. تەرگەپ-تەكسەرۋ بارىسىندا قالا شەتىنەن اكەسىنىڭ زورلىق-زومبىلىق بەلگىسى بار ءمايىتى تابىلدى. بۇل وقيعاعا قاتىستى اكەسىنىڭ بوتەلكەلەس تانىستارى ۇستالدى. ولار قىلمىستىق ارەكەتىن جاسىرۋ ءۇشىن مۇردەنى قالا شەتىنە اپارىپ كومىپ تاستاعان», دەپ ءمالىم ەتتى قىزىلوردا وبلىستىق پروكۋراتۋراسىنان.
ەسكە سالساق, بۇدان بۇرىن وڭتۇستىك كورەياعا ۆيزا جاساپ بەرەم دەپ 5 ادامدى الداعان قىزىلوردالىق ايەل ۇستالدى.
