ءبىلىم جانە عىلىم مينيسترلىگىنىڭ مالىمەتىنشە, ۇمىتكەرلەر ءبىلىم بەرۋ باعدارلامالارى توبى, ۇمىتكەرلەردىڭ تەستىلەۋدى وتكىزۋ ءتىلى مەن ورنىنا وتىنىمدەردى قابىلداۋ مەرزىمى اياقتالعانعا دەيىن وزگەرىستەر ەنگىزە الادى. تەستىلەۋ كۇنى تۋرالى اقپارات ۇمىتكەردىڭ جەكە كابينەتىندە قولجەتىمدى بولادى. ال كەشەندى تەستىلەۋ 20 شىلدەدە باستالىپ, 10 تامىزعا دەيىن جالعاسادى.
«كەشەندى تەستىلەۋ ەلەكتروندى فورماتتا وتكىزىلەدى جانە ءۇش بولىكتەن تۇرادى: شەت ءتىلى, وقۋعا دايىندىقتى انىقتاۋ جانە ءبىلىم بەرۋ باعدارلامالارى توبىنىڭ بەيىنى بويىنشا تەست. وعان 4 ساعات بەرىلەدى. شەت ءتىلىن ءبىلۋ دەڭگەيىن راستايتىن حالىقارالىق سەرتيفيكاتتارى بولسا, ۇمىتكەرلەر شەت تىلىنەن تەست تاپسىرۋدان بوساتىلادى», دەپ ءتۇسىندىردى قر بعم ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ.
تالاپكەرلەرگە ماگيستراتۋراعا ءتۇسۋ ءۇشىن ءبىلىم بەرۋ باعىتتارىنىڭ سايكەستىگىن انىقتاۋ بويىنشا نۇسقاۋلىقتار ەنگىزىلدى. بۇل ءبىلىم بەرۋ باعدارلامالارىنىڭ ساباقتاستىعىن, ۇزدىكسىزدىگىن ساقتاۋ جانە باكالاۆريات ماماندارىن دايارلاۋ ساپاسىن ارتتىرۋ ءۇشىن قاجەت. سوندىقتان بەلگىلى ءبىر ءبىلىم بەرۋ باعدارلاماسىنا قۇجاتتاردى تاپسىرار الدىندا تالاپكەرلەر ۋنيۆەرسيتەتتىڭ قابىلداۋ كوميسسياسىمەن كەشەندى تەستىلەۋدىڭ فورماتى جانە تاڭدالعان ءبىلىم بەرۋ باعدارلاماسى توبىنىڭ تالاپكەر العان ماماندىققا سايكەستىگى تۋرالى كەڭەسۋى قاجەت. كەڭەستى ۋنيۆەرسيتەتتىڭ ۆيرتۋالدى قابىلداۋ كوميسسياسىنان دا الۋعا بولادى.
بيىل عىلىمي-پەداگوگيكالىق ماگيستراتۋراعا ءتۇسۋ ءۇشىن شەكتى بالل – 75, مامانداندىرىلعان ماگيستراتۋراعا ءتۇسۋ ءۇشىن – 50 بالل.
كەشەندى تەستىلەۋ ناتيجەلەرىمەن كەلىسپەگەن جاعدايدا, ۇمىتكەرلەر تەستىلەۋدەن وتكەننەن كەيىن ونلاين اپەللياتسياعا بەرە الادى.
2022-2023 وقۋ جىلىنا ارنالعان ماگيستراتۋراعا مەملەكەتتىك ءبىلىم بەرۋ تاپسىرىسى 13 مىڭنان استام گرانت ەكەنىن ەسكە سالا كەتەيىك.
