10 ەلدەن 8 كينوتۋىندى قاتىسقان بۇل باعدارلاما شەڭبەرىندە دۇنيەجۇزىندە تۇسىرىلگەن جاڭا كارتينالار مەن باسقا فەستيۆالدەردە ۇزدىك ناتيجە كورسەتكەن فيلمدەر كورسەتىلەدى.
«اقىن» ءفيلمى قازاقستاننان تىس جەرلەردە, سوناۋ برازيليادا كورسەتىلىپ, جىلى قابىلدانىپ جاتقانىنا قۋانىشتىمىن. ءفيلمدى تۇسىرگەندە بار كۇشىڭدى سالىپ, ءوز ماقساتىڭا ادال بولساڭ عانا كورەرمەننىڭ كوڭىلىنەن شىعۋعا بولادى دەگەن ويدى تاعى دا ءبىر دالەلدەي تۇسكەندەي. وسى ءفيلمنىڭ تۇسىرىلۋىنە اتسالىسقان بارلىق جانداردى قۇتتىقتايمىن. جاڭا كورسەتىلىمدەر مەن جاڭا جۇلدەلەردى اسىعا كۇتەمىز», دەدى دارەجان ومىرباەۆ.
سونىمەن قاتار پاريجدەگى «جورج پومپيدۋ ورتالىعى» زاماناۋي ونەر مۋزەيىندە حالىقارالىق بەرلين كينوفەستيۆالىنىڭ ۇزدىك فيلمدەر كورسەتىلىمى ۇيىمداستىرىلىپ, ولاردىڭ قاتارىندا كورەرمەن نازارىنا «اقىن» ءفيلمى دە ۇسىنىلادى. بۇل تۋرالى كينوتۋىندىنىڭ پروديۋسەرى يۋليا كيم حابارلادى. ايتا كەتسەك, La Berlinale à Paris باعدارلاماسىن بەرلين كينوفەستيۆالىنىڭ ارت-ديرەكتورى كارلو شاترين جانە پومپيدۋ مۋزەيىنىڭ ديرەكتسياسى قۇراستىرعان. كورسەتىلىمدەر ماۋسىمنىڭ 10 مەن 26 ارالىعىندا وتەدى.
مادەنيەت جانە سپورت مينيسترلىگى تاپسىرىسى بويىنشا تۇسىرىلگەن «اقىن» ءفيلمى 18 ماۋسىم كۇنى جەرگىلىكتى ۋاقىت بويىنشا ساعات 17:00-دە كورسەتىلەدى. بيلەتتەردى La Berlinale à Paris سايتىندا ساتىپ الۋعا بولادى.
