جەتىنشى شاقىرىلعان سقو ءماسليحاتىنىڭ كەزەكتەن تىس XVII سەسسياسىندا وبلىستىق بيۋدجەتتىڭ ورىندالۋ جاعدايى باياندالدى. جيىن بارىسىندا سقو بويىنشا رەۆيزيالىق كوميسسيا توراعاسى تىلەگەن قاسكين كوميسسيا قىزمەتىنىڭ نەگىزگى كورسەتكىشتەرىنە توقتالدى.
ونىڭ ايتۋىنشا, وتكەن جىلى 55 نىساندا 15 اۋديتورلىق جانە 6 ساراپتامالىق-تالداۋ ءىس-شارالارى جۇرگىزىلىپ, 99 ملرد تەڭگە قامتىلدى. سونىڭ 6,2 ملرد تەڭگەسى بويىنشا بىرقاتار زاڭبۇزۋشىلىق انىقتالدى. ونىڭ ىشىندە 4,9 ملرد تەڭگە قارجىلىق زاڭبۇزۋشىلىقتار بولسا, 716,2 ملن تەڭگە بيۋدجەت قاراجاتى ءتيىمسىز پايدالانىلعانى انىقتالدى.
بۇدان باسقا 33,7 ملن تەڭگە سوماسىندا بيۋدجەتتىڭ تىكەلەي شىعىندارى, 314 راسىمدىك بۇزۋشىلىقتار, 4 جۇيەلىك بۇزۋشىلىقتار انىقتالدى.
«بيۋدجەت قاراجاتىن جۇمساۋعا قاتىستى زاڭبۇزۋشىلىقتاردىڭ نەگىزگى سوماسى 5,9 ملرد تەڭگەنى قۇراعان. بۇگىنگى كۇنى 4,6 ملرد تەڭگە نەمەسە 95%-ى بيۋدجەتكە قايتارىلدى. ماماندار نەگىزىنەن بۋحگالتەرلىك ەسەپ جۇرگىزۋ كەزىندە زاڭبۇزۋشىلىقتارعا جول بەرگەن», دەدى رەۆيزيالىق كوميسسيا توراعاسى.
رەۆيزيالىق كوميسسياسى وتكىزگەن اۋديتورلىق ءىس-شارالاردىڭ قورىتىندىسى بويىنشا 86 ۇسىنىم مەن تاپسىرما بەرىلگەن. اۋديت قورىتىندىسى بويىنشا 284 تۇلعا جاۋاپقا تارتىلدى, ونىڭ ىشىندە 170-ءى اكىمشىلىك جاۋاپكەرشىلىككە, 114-ءى تارتىپتىك جاۋاپكەرشىلىككە تارتىلسا, 69-ى ەسكەرتۋ, 38-ءى سوگىس, 6-ۋى قاتاڭ سوگىس الىپ, 1 ادام جۇمىستان بوساتىلدى.
