NURIS بيزنەس-ينكۋباتسيالاۋ جانە اكسەلەراتسيا باعدارلاماسىنىڭ تۇلەكتەرى جەتىستىكتەرىن كورسەتتى. اتاپ ايتقاندا, E-Commerce, Education & HR, AgriTech جانە HealthTech سالالارىنداعى ماسەلەلەردىڭ شەشىمدەرىن 23 ستارتاپ ارقىلى ۇسىندى. سونداي-اق Demo Day جاڭا بايلانىستاردى تابۋعا جانە سەرىكتەستىك ورناتۋعا باعىتتالعان 100-دەن استام قاتىسۋشىنى بىرىكتىرگەن ءتيىمدى كوممۋنيكاتسيا الاڭىنا اينالدى. ءىس-شاراعا 50-گە جۋىق ۇيىم, ونىڭ ىشىندە ۇلتتىق كومپانيالار, ۆەنچۋرلىق قورلار, حالىقارالىق كونسالتينگتىك ۇيىمدار, بانكتەر, ۋنيۆەرسيتەتتەر, بيزنەس-قاۋىمداستىقتار, ءىرى كومپانيالار قاتىستى.
«ينكۋباتسيا – ەرتە كەزەڭدەگى ستارتاپتارعا قولداۋ جاسايتىن باعدارلاما, ال اكسەلەراتسيا ءوسۋ, ءارى قاراي دامۋ, شەتەلدەرگە شىعۋ, ينۆەستيتسيالاۋ قاجەت بولعان ستارتاپتارعا قولداۋ كورسەتۋدى قامتيدى. بىزگە يدەيامەن كەلىپ, 3 اي ىشىندە بەلگىلى ءبىر بيزنەس تۋرالى ترەنينگتەرگە قاتىسىپ, ەكسپەرتتەردىڭ, نازارباەۆ ۋنيۆەرسيتەتىنىڭ پروفەسسورلارىنان اقىل-كەڭەس الادى. سونىمەن قاتار بيزنەس ماماندارىمەن جەكە كەزدەسۋ ۇيىمداستىرۋ ارقىلى ءوز جوبالارىن جەتىلدىرىپ, دامىتادى. بۇگىندە مىنە, كەيبىرەۋلەرى العاشقى ساتىلىمعا جەتتى, ال كەيبىرەۋلەرى وزدەرىنىڭ پروتوتيپتەرىن جاساپ, ينۆەستورلارعا جانە ءوزىنىڭ سەرىكتەستەرىنە ۇسىنىپ وتىر. ينكۋباتسيا جوباسى اياسىندا ەڭ ۇلكەن جەتىستىكتەرگە جەتكەن ۇزدىك ستارتاپتارعا NURIS ءوز اتىنان 2 ملن تەڭگەگە دەيىن قارجىلاي قولداۋ كورسەتتى», دەدى NURIS بيزنەس-ينكۋباتورىنىڭ مەنەدجەرى ارناگۇل قابىكەن.
گرانت ۇتىپ العانداردىڭ قاتارىندا ەلنۇر قايناربەك, دميتري نام جانە التىنگۇل تايباساروۆا بار. ە.قايناربەك ويلاپ تاپقان GoDays قوسىمشاسى پايدالانۋشىلاردىڭ ونىمدىلىگىن ارتتىرۋعا كومەكتەسەدى. ال د.نام جەتەكشىلىگىمەن جاسالعان B2B نارىعى – ا2optics ستارتاپى وپتيكاعا ارنالعان.
ءۇشىنشى جەڭىمپاز, BALAM ءموبيلدى قوسىمشاسىن جاساعان ا.تايباساروۆانى سوزگە تارتقان ەدىك. ول ەكى بالانىڭ اناسى, مەكتەپكە دەيىنگى ءبىلىم بەرۋ سالاسىندا ەڭبەك ەتەدى. التىنگۇل بالاباقشادان العان تاجىريبەسى ارقىلى بالاباقشا اكىمشىلىگى مەن تاربيەشىلەردىڭ, اتا-انالاردىڭ كەز بولاتىن ماسەلەلەرىمەن تانىس. وسى ماسەلەلەردىڭ يننوۆاتسيالىق شەشىمى رەتىندە التىنگۇل جانە ونىڭ توبى BALAM ءموبيلدى قوسىمشاسىن ويلاپ تاپتى.
«بۇل ءموبيلدى قوسىمشا قازىرگى بارلىق بالاباقشا ماسەلەسىن شەشەدى. بىرىنشىدەن, بالاباقشادا ىستەيتىن ءاربىر قىزمەتكەر كۇنىنە 2 ساعاتىن تەك قانا اتا-انالارمەن الەۋمەتتىك جەلىدە حات الماسۋ ءۇشىن, سونىمەن قاتار قاعاز جۇمىستارىنا جۇمسايدى. وسىلايشا, بالاعا ءتيىستى كوڭىل بولىنبەيدى. ەكىنشىدەن, وتە كوپ بالانىڭ اللەرگياسى بار. بالاباقشادا بۇل اقپارات ءارتۇرلى جەردە ساقتالادى جانە تاربيەشى نازارىنان تىس قالۋى دا مۇمكىن. سونىڭ سالدارىنان بالا دەنساۋلىعىنا زيان كەلەدى. ال مەكتەپكە دەيىنگى ۇيىمنىڭ بەدەلىنە تەرىس اسەر ەتەدى. ءبىزدىڭ ءموبيلدى قوسىمشا وسى ماسەلەنىڭ ءبارىن شەشىپ, بالاباقشاعا: اتا-انالارمەن قارىم-قاتىناستى جاقسارتۋعا; اتا-انالاردىڭ قاناعاتتانۋ دەڭگەيىن ەكى ەسە ارتتىرۋعا; وقۋشىلار تۋرالى بارلىق ماڭىزدى اقپاراتتى ءبىر جەردە ساقتاۋعا مۇمكىندىك بەرەدى. وسى كۇنى ءبىز نۇر-سۇلتاننىڭ 3 بالاباقشاسىندا قوسىمشانىڭ جوبالىق نۇسقاسىن ىسكە قوستىق, تاعى 5 بالاباقشا قوسىمشانىڭ جۇرگىزىلۋىن كۇتىپ وتىر. بولاشاقتا بۇدان دا كوپ مەكەمە بىزگە قوسىلادى دەپ ۇمىتتەنەمىز», دەپ ءبولىستى ا.تايباساروۆا.
بۇدان بولەك تاعى 3 ستارتاپ «ەڭ ۇزدىك يننوۆاتسيالىق شەشىم», «ەڭ ۇزدىك پيتچەر» جانە «ەڭ ۇزدىك ديزاين» اتالىمى بويىنشا ىنتالاندىرۋ سىيلىعىن يەلەندى.
ارۋجان ناعاشىباي,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى
