تاريحي جيىنعا 12 دەپۋتاتتىڭ 11-ءى قاتىسىپ, ءماسليحات حاتشىسىن سايلادى. ۇلكەن جاۋاپكەرشىلىك جۇكتەلەتىن لاۋازىمعا ءبىراۋىزدان «Amanat» پارتياسىنان سايلانعان حالىق قالاۋلىسى باۋىرجان شىڭعىسوۆ تاعايىندالدى.
باۋىرجان شىڭعىسوۆتىڭ كوپ جىلدار بويى مەملەكەتتىك, ونىڭ ىشىندە جاۋاپتى قىزمەتتەردە, جەزقازعان جانە ساتباەۆ قالالارىنىڭ اكىمى بولىپ ەڭبەك ەتكەن ءبىلىمدى, تاجىريبەلى, ەلىنە جاناشىر ازامات ەكەندىگى اتالىپ, دەپۋتاتتار تاراپىنان زور سەنىم ءبىلدىرىلدى.
سەسسيادا كۇن تارتىبىندە بولعان تۇراقتى كوميسسيالار قۇرامىن بەكىتۋ, ءماسليحات اپپاراتىن قۇرۋ سياقتى ۇيىمداستىرۋ ماسەلەلەرى ورتاعا سالىندى.
وسىلايشا, ۇلىتاۋ وبلىسىنىڭ العاشقى قۇرىلعان ۇيىمىنىڭ ءبىرىنشى شەشىمى قابىلداندى.
ەسكە سالا كەتسەك, قر پرەزيدەنتى 2022 جىلعى 16 ناۋرىزدا حالىققا جولداۋىندا ەلىمىزدە ءۇش جاڭا وبلىس قۇرۋ تۋرالى ۇسىنىس ءبىلدىرىپ, 4 ماۋسىمدا جاڭا وڭىرلەردى قۇرۋ تۋرالى جارلىققا قول قويعان ەدى.
جاڭادان قۇرىلعان ۇلىتاۋ وبلىسىنىڭ ورتالىعى جەزقازعان قالاسى بولادى. وڭىرگە 3 قالا – جەزقازعان, ساتباەۆ, قاراجال, سونداي-اق 2 اۋدان – ۇلىتاۋ جانە جاڭاارقا قارايدى..
