كوزگە تۇرتسە كورىنبەيتىن قويۋ ءتۇتىن پاتەر ىشىنە كەپتەلىپ قالىپتى. تۇرتپەكتەپ ءجۇرىپ جول تاپقان. دالىزدە ادام قاراسى بايقالمادى. ىلگەرى وزعان. ءبىر كەزدە اس ۇيدەگى گاز باللونى قولىنا ىلىكتى. سۋماڭداعان جالىن ءتىلى ءسال كەشىكسە, باللوندى شارپيتىنداي. وت تيىسىمەن جارىلۋى ابدەن مۇمكىن. جالما-جان اعىتىپ, تەرەزەدەن شىعاردى. وقيعا ورنىن مۇقيات زەرتتەگەنى ابىروي بولىپتى. جاتىن بولمەدە ەس-ءتۇسسىز, س ۇلىق جاتقان ادام بار ەكەن. قولقانى قاپقان قويۋ اششى تۇتىنگە ۋلانىپ قالعان. ءوز بەتىمەن شىعا الار ءتۇرى جوق.
كوكشەتاۋ قالالىق №10 ءورت ءسوندىرۋ بولىمشەسىنىڭ قاراۋىل باستىعى ادىلەت سەرىك كەزەكشى بولىمگە حابار تۇسكەننەن كەيىن گاستەللو كوشەسىندەگى №6 ۇيگە اتتانعان. وسى وقيعانىڭ ءوربۋى جادىندا جاتتالىپ قالىپتى.
– ءبىر ءورت ءسوندىرۋ ەسەبىمەن وقيعا ورنىنا لەزدە جەتتىم, – دەيدى ادىلەت التىنبەك ۇلى. – كەلسەك, ءۇي جانىپ جاتىر ەكەن. تەمىر ەسىكتى بۇزۋ ۇزاق ۋاقىت الار ەدى, تەرەزەدەن كىرگەن جىلدامداۋ. جەكە قۇرامعا ءورتتىڭ جايىلىپ كەتپەۋىن قاداعالاۋ تۋرالى تاپسىرما بەردىم دە, پاتەرگە تەرەزەدەن ەندىك. ورتەنگەن ءۇي ىشىندە ادام بولۋى دا ىقتيمال. الدىمەن, قاۋىپكە دۋشار بولعانداردى قۇتقارعان ءلازىم. تىنىستاۋ اپپاراتىن كيگەننىڭ وزىندە قويۋ قارا ءتۇتىن تۇك كورسەتپەيدى. قارمانىپ ءجۇرىپ تاپتىق. جانىمداعى قۇتقارۋ قىزمەتىنىڭ اعا سەرجانتى ءالىمجان مۇستافين ەكەۋمىز ەس-ءتۇسسىز جاتقان ادامدى دالاعا الىپ شىقتىق. كورەر جارىعى بار ەكەن, امان قالدى.
وقيعا ورنىنا شاقىرىلعان جەدەل جاردەم قىزمەتى ىلە جەتىپ, تۇتىنگە تۇنشىعىپ, ەندى بولماعاندا وتقا ورانا جازداعان ادامدى اۋرۋحاناعا جەتكىزگەن. وسىلايشا, ءورت سوندىرۋشىلەر ادام ءومىرىن ساقتاپ قالدى. قىزىل جالىننىڭ قۇربانى بولعان دۇنيە-م ۇلىك ساداقا. ەڭ باستىسى, ادامنىڭ امان قالعانى.
تاعى ءبىر جولى بوروۆسكوي شاعىن اۋدانىنداعى №56 ۇيدە ءورت شىقتى دەگەن سۋىق حابار تۇسكەن. بۇل كەز ءساۋىر ايى ەدى. وقىس وقيعا كوپقاباتتى ءۇيدىڭ ءبىرىنشى قاباتىندا ورىن الىپتى. بۇل جولى دا تەمىر ەسىكتىڭ توپساسىن بۇزۋعا ۋاقىت كوپ كەتەدى دەپ ەسەپتەگەن. جالما-جان ءۇيدى اينالىپ كورسە, ءبىرىنشى قاباتتاعى بالكوننان سىزدىقتاپ ءتۇتىن شىعىپ تۇر. قول ساتىمەن كوتەرىلگەن. سۋ شاشار وقپاندى الىپ, قىزىل جالىننان قورعايتىن ارنايى جەڭدەردى كيىپ, تەرەزەنى سىندىرعان كەزدە پاتەردىڭ ىشىندە كەپتەلىپ تۇرعان قويۋ قارا تۇتىنمەن جالعاسا ىستىق جالىن لاپ ەتە ءتۇستى. ىشكى تۇيسىك الدەبىر قاۋىپتەن حابار بەرگەندەي. ىشتە ادام بولۋى ابدەن مۇمكىن. اعا سەرجانت ولجاس وقاپوۆ ەكەۋى لەزدە تاپقان. كەرەۋەتتىڭ جانىندا باسىن كوتەرە الماي بۇك ءتۇسىپ جاتىر ەكەن. ابىروي بولعاندا قارا ءتۇتىن توبەگە جينالعانىمەن, تومەندە تالعاجاۋ بولار اۋا بار ەكەن. سونىڭ وزىندە قاس قاعىم ءسات كەشىكسە, الدەقانداي جاعداي بولار ەدى. قولتىعىنان دەمەپ, ەكەۋلەپ كوتەرىپ, الىپ شىقتى. ءسويتىپ تاعى دا ءبىر ادام ءومىرىنىڭ امان قالۋىنا سەبەپشى بولدى.
– جۇرەك قالاۋىمەن تاڭداعان ماماندىعىمىز بولعاننان كەيىن قاۋىپ-قاتەرگە ەتىمىز ۇيرەنگەن, – دەيدى ادىلەت سەرىك. – بۇل ءبىزدىڭ جۇمىسىمىز عوي. ءبىز ىستەمەسەك, كىم ىستەيدى؟!
تاياۋدا وبلىس ورتالىعىنداعى ە.اۋەلبەكوۆ كوشەسىندەگى كوپقاباتتى ءۇيدى ءورت شالىپتى. ءتورت بىردەي بالكون ۇيىتقي سوققان جەل ەكپىنىمەن لاۋلاعان قىزىل ورتكە ورانعان. ءورت سوندىرۋشىلەر وقيعا ورنىنا جەتكەن كەزدە قۇلاق تۇندىراتىن جارىلىس تا بولىپ جاتىر. تاعى دا تەرەزە ارقىلى كىرۋ قاجەت بولدى. اۋەلى ءۇش ءيىندى قول ساتىنى ورناتقان. جوعارى قاباتتا بولعان سوڭ ءبىر ساتىمەن بويى جەتپەي, ەكىنشى ساتىنى جالعاۋعا تۋرا كەلدى. قاربالاسا ءجۇرىپ قىزىل جالىننىڭ بەتىن قايتارعان.
ەندى كەيىپكەرىمىز تۋرالى ءبىر اۋىز ءسوز ايتا كەتەلىك. ادىلەت سەرىك بۋراباي اۋدانىنا قاراستى مادەنيەت اۋىلىنىڭ تۋماسى. 2015 جىلى توتەنشە جاعدايلار مينيسترلىگى كوكشەتاۋ تەحنيكالىق ينستيتۋتىن ۇزدىك بىتىرگەن. كەيىن ش.ءۋاليحانوۆ اتىنداعى كوكشەتاۋ ۋنيۆەرسيتەتىنىڭ ءومىر تىرشىلىك نەگىزدەرى فاكۋلتەتىن ۇزدىك اياقتاپ, ماگيستراتۋرادا ءبىلىم الۋدا. ديپلومدى سۋ تاسقىنىنىڭ الدىن الۋ تاقىرىبىنان ۇزدىك قورعاعان. ەڭ جوعارى بالعا يە بولىپتى.
كوكشەتاۋ ءوڭىرى كەيىنگى جىلدارى سۋ تاسقىنىنىڭ زاردابىن تارتىپ كەلە جاتىر. جاس مامان اتباسار, استراحان, ساندىقتاۋ اۋداندارىنداعى جاباي, كولۋتون وزەندەرىنىڭ كوكتەمگى تاسۋ سەبەپتەرىن زەردەلەگەن, الدىن الۋ شارالارىن ويلاستىرعان. ايتالىق, سۋدا وسەتىن وسىمدىكتەردىڭ شىرىندىگە اينالىپ, شوگىپ قالۋى تابيعي سەبەپ بولسا, ادام قولىمەن جاسالاتىن كەدەرگىلەر دە ورىن الۋدا. ماسەلەن, وزەنگە كوپىر ورناتۋ ءۇشىن جۇك ماشينالارى وتەتىن ەتىپ توپىراق توگىپ, جول جاسايدى. كەيىن جۇمىس بىتكەن سوڭ قۇرىلىسشىلار وزدەرى سالعان ۋاقىتشا جولدى جيناماي كەتەدى. سۋدىڭ ەركىن اعۋىنا بوگەت بولاتىن وسىنداي دا جاي بار. جاس ماماننىڭ تاپقان جاڭالىعى كوپىر استىنا ارنايى قوندىرعى ورناتۋ. قار سۋىمەن مەلتەكتەگەن وزەن دەڭگەيى قوندىرعىعا جەتكەن كەزدە موبيلدىك قوسىمشا ارقىلى حابار تۇسەدى. قاۋىپتى جاعدايدان قۇلاقتانعان تۇرعىندار ساقتىق قامىن جاساماق.
ءبىر ءوزى بىرنەشە ادامنىڭ ءومىرىن ساقتاپ قالعان ءورت ءسوندىرۋشى وجەت قيمىلى ءۇشىن مينيسترلىك, دەپارتامەنت تاراپىنان الدەنەشە رەت ماراپاتقا يە بولىپتى. ءوز ايتۋىنا قاراعاندا, ەڭ ۇلكەن ماراپات ومىرلەرىن ساقتاپ قالعان ادامداردىڭ جالعىز اۋىز العىسى. ودان ارتىق ەشتەڭە تىلەمەيدى دە.
كوكشەتاۋ
