قوعام • 06 ماۋسىم، 2022

جۇمىسسىزدىقتى جويۋ ءۇشىن جۇمىلدى

74 رەت كورسەتىلدى

جاستار قاۋىمىن جۇمىسپەن قامتۋ ماسەلەسى قاشان دا وزەكتى. ارينە، ەلىمىزدە ءتۇرلى سەبەپكە بايلانىستى ەكى قولعا ءبىر كۇرەك تابا الماي جۇرگەن بوزبالا مەن بويجەتكەن جەتىپ ارتىلادى. بۇل رەتتە، ناق وسى سالاعا جا­ۋاپتى تۇلعالار قاناتى قا­تايىپ، بۋىنى بەكىگەن ەل ازاماتتارىن ەڭبەكپەن قامتۋ ىسىنە ماڭىزدى ءمان بەرىپ جاتقانى انىق.

ماسەلەن، كۇنى كەشە ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا وتاندىق ءىرى كومپانيا وكىلدەرىمەن جۇزدەسىپ، جاس­تاردى جۇمىسپەن قامتۋ ماسەلەسىن تالقىلادى. بۇل جۇزدەسۋگە «ەۋرا­زيا­لىق توپ» جشس، «سامۇرىق-قازىنا» اق، رەسپۋبليكالىق تاۋ-كەن ءوندىرۋ جانە تاۋ-كەن مەتاللۋرگيا كاسىپورىندارى قاۋىمداستىعى، «پوليمەتالل ەۋرازيا» جشس سىندى ءىرى وتاندىق كومپانيالار مەن كاسىپورىنداردىڭ وكىلدەرى جانە ورتالىق مەملەكەتتىك ورگانداردىڭ جەتەكشىلەرى قاتىستى. كەزدەسۋ بارىسىندا تاراپتار ەلەكتروندى ەڭبەك بيرجاسىن دامىتۋ، ونلاين بوس ورىندار جارمەڭكەسى جانە جاس­تاردى جۇمىسپەن قامتۋ ماسەلەلەرىن تالقىلادى.

مينيستر ERG كومپانيالار توبىمەن بىرلەسىپ جۇزەگە اسىرىلعان «جاس­تاردى جۇمىسقا ورنالاستىرۋ» جوباسى جاقسى ناتيجە كورسەتكەنىن اتاپ ءوتتى. بيىل مامىر ايىندا باس­تالعان جوبا تيىمدىلىگىن كورسەتتى. كومپانيا ەلەكتروندى ەڭبەك بيرجاسىندا جاستار ءۇشىن 395 بوس جۇمىس ورنىن جاريالادى. سونىڭ نەگىزىندە ءبىر اپتا ىشىندە 159 جاس مامان جۇمىسقا ورنالاستى.

تامارا دۇيسەنوۆا ەلەكترون­دى ەڭبەك بيرجاسىنىڭ بىر­قا­­تار با­سىم­دى­ع­ىن اتاپ ءوتتى. ماسەلەن، اتالعان رەسۋرس بارلىق قازاقستاندىقتار ءۇشىن قولجەتىمدى (جۇمىس ىزدەۋشىگە دە، جۇمىس بەرۋشىگە دە) ءارى بوس جۇمىس ورنىنا مامانداردى ىرىكتەۋ مۇمكىندىگى بارىنشا اشىق (جۇمىس ىزدەۋشىنىڭ تۇراتىن جەرى ماڭىزدى ەمەس). بۇعان قوسا، مينيستر ءار ايدىڭ 24-30 كۇندەرى ارالىعىندا ەلەكتروندى ەڭبەك بيرجاسىنىڭ بازاسىندا ونلاين بوس جۇمىس ورىندار جارمەڭكەسىن تۇراقتى تۇردە وتكىزۋ جوسپارلانعانىن جەتكىزدى.

«ەۋرازيالىق توپ» جشس باس­قارما توراعاسى سەرىك شاحاجانوۆ تا پلاتفورمانىڭ مۇمكىندىگى مول ەكەنىنە توقتالدى. ول پلاتفورما جاس مامانداردى ىرىكتەۋگە، سول ارقىلى پۋل قالىپتاستىرۋعا، ولاردى كەيىن دايار­لىقتان وتكىزىپ، بىلىكتىلىگىن ارت­تىرۋعا مۇمكىندىك بەرەتىنىن اتاپ ءوتتى. «جىل سوڭىنا دەيىن ERG كاسىپ­ورىندارىندا تاعى 2 مىڭعا جۋىق جۇمىس ورنىن اشۋ جوسپارلانىپ وتىر. سونىڭ 500-ءى ەكى جوبا اياسىندا اشىلادى. بۇدان بولەك، جاس ماماندارعا ارنالعان تۇرعىن ءۇي باعدارلاماسىن جانداندىرۋ جوسپاردا بار»، دەدى س.شاحاجانوۆ.

ءبىلىم جانە عىلىم ءبىرىنشى ۆيتسە-ءمينيسترى شولپان قارينوۆا جوعارى وقۋ ورىندارىنىڭ، كوللەدجدەردىڭ مانساپتىق ورتالىقتارى مەن جۇمىس بەرۋشىلەر اراسىندا سەرىكتەستىك ورناتۋعا مۇمكىندىگى بار ەكەنىن اتاپ ءوتتى. ياعني تاراپتار جاس مامانداردى دايارلاۋ، ولاردى جۇمىس ورنىندا وقىتۋ ماسەلەلەرى بويىنشا بىرلەسە وتىرىپ جۇمىس ىستەي الادى.

كەڭەسكە قاتىسۋشىلار ەلەكترون­دى ەڭبەك بيرجاسى جوباسىن قولداپ، ونىڭ تيىمدىلىگىن اتاپ ءوتتى. سونداي-اق الداعى ۋاقىتتا بىرلەسىپ جۇمىس ىس­تەۋگە دايىن ەكەندەرىن جەتكىزدى. ەلەك­تروندى ەڭبەك بيرجاسى جانە ونىڭ بازاسىندا تۇراقتى تۇردە وتكىزىلەتىن ونلاين بوس جۇمىس ورىندار جارمەڭكەسى جۇمىس ىزدەۋشىلەر مەن جۇمىس بەرۋشىلەر ءۇشىن ەڭبەك نارىعىنىڭ اشىقتىعى مەن قول­جەتىمدىلىگىن قامتاماسىز ەتۋدىڭ ما­ڭىزدى قۇرالىنا اينالادى.

سوڭعى جاڭالىقتار

ايتىپ كەلگەن اپات

ايماقتار • كەشە

«مىڭ بالا» جەڭىمپازدارى

رۋحانيات • كەشە

اقيقاتتىڭ اي ديدارى – ءباسپاسوز

ەگەمەن قازاقستان • كەشە

ىنتىماقتاستىق ىقپالى

ەكونوميكا • كەشە

جاڭا فورماتتاعى ساۋدا

ەكونوميكا • كەشە

جوتەلگە جەڭىل قاراماڭىز

مەديتسينا • كەشە

بىتىمگەرشىلىك ساردارلارى

قازاقستان • كەشە

جىپ-جىلى جۇرەك بۋىنداي

ادەبيەت • كەشە

داۋىستىڭ دا ءتۇسى بار

ادەبيەت • كەشە

ۇقساس جاڭالىقتار