كورەرمەن قاۋىمنىڭ زور ىقىلاسىنا بولەنگەن «روك مۋزىكاسىنىڭ التىن حيتتەرى» كونتسەرتى «استانا كەشتەرى» ءحى حالىقارالىق فەستيۆالىن قورىتىندىلادى.
سيمفونيالىق مۋزىكامەن كومكەرىلگەن روك اندەرى زالداعى كورەرمەندەردى بىردەن باۋراپ, تاماشا اتموسفەرا سىيلادى. Queen, Beatles, Kiss, Pink Floyd, Metallica, Scorpions, Led Zeppelin, Europە توپتارىنىڭ اتاقتى اندەرىن يتاليالىق ديريجەر روبەرتو مولينەلليدىڭ جەتەكشىلىگىمەن «استانا بالەت» تەاترىنىڭ وركەسترى ورىندادى. زاماناۋي مۋزىكانىڭ اڭىز تۇلعالارىنا ارنالعان ۇلكەن كونتسەرتتىك جوبالاردىڭ اۆتورى, كومپوزيتور, ديريجەر روبەرتو مولينەللي «استانا كەشتەرى» فەستيۆالىنە بۇدان بۇرىن دا بىرنەشە رەت قاتىسقان.
جوبا اياسىندا ونىڭ «Queen» (2018 ج.) جانە «اۆۆا» (2021 ج.) توپتارىنا ارنالعان كونتسەرتتەرى جوعارى دەڭگەيدە ءوتتى. ماەسترونىڭ ايتۋىنشا, «استانا كەشتەرى» الەمنىڭ ۇزدىك ورىنداۋشىلارىن توعىستىرعان ەرەكشە فەستيۆالگە اينالدى. «بيىلعى فەستيۆالدىڭ مەن ءۇشىن باستى ەرەكشەلىگى – ءار ءتۇرلى مۋزىكالىق جانرلاردىڭ ۇيلەسىم تابۋى. روك حيتتەرى, سيمفونيالىق مۋزىكا مەن بالەت ساحناسىنىڭ قوسىندىسى جاڭا ەموتسيا سىيلادى. «استانا كەشتەرى» فەستيۆالىنە العىسىم زور», دەپ جەتكىزدى روبەرتو مولينەللي.
ساحنادا يوگان بودينگ (شۆەتسيا), سيمونە روماناتو (يتاليا), گيتاريست ريككاردو بەرتوتستسيني (يتاليا) سىندى بەلگىلى ەۋروپالىق ارتىستەر ونەر كورسەتتى. الەمدىك ونەر جۇلدىزدارى ناعىز مۋزىكالىق شوۋ جاسادى. «بۇل مەنىڭ قازاقستان ەلىنە العاش رەت كەلۋىم. العان اسەرىم تاماشا. ەۋرازيا تورىندە ورنالاسقان مەملەكەتتە مۋزىكانىڭ جاڭا فورماتتارىن زور ىقىلاسپەن قابىلدايتىن تىڭدارمانداردىڭ كوپ بولۋى مەنى تاڭعالدىردى», دەپ ءبولىستى كونتسەرتتەن كەيىن شۆەتسيالىق ءانشى يوگان بودينگ. انشلاگپەن وتكەن كونتسەرت «The Show Must Go On» انىمەن اياقتالدى.
ەسكە سالساق, «دەگدار» گۋمانيتارلىق قورى ۇيىمداستىرعان «استانا كەشتەرى» فەستيۆالى بيىل ونەر سۇيەر قاۋىمعا 4 جاڭا كونتسەرت ۇسىندى. بەلگىلى كومپوزيتور پەر تيللۋانىڭ شىعارماشىلىق كەشى, بەرلين كونتسەرتتىك وركەسترىنىڭ سۇيەمەلدەۋىمەن وتكەن اتاقتى ۆيولونچەليست نارەك احنازاريان مەن تانىمال پيانيست ۆاديم حولودەنكونىڭ كونتسەرتتەرى ەلوردا كورەرمەندەرىن تامساندىردى.
جالپى, «استانا كەشتەرى» مۋزىكالىق ونەردىڭ سان ءتۇرلى جانرلارىن بىرىكتىرەتىن ەرەكشە كونتسەپتسيانىڭ ارقاسىندا ەلىمىزدىڭ مادەني ومىرىندەگى يگى داستۇرگە اينالدى. جوبا اياسىندا كورەرمەندەر كلاسسيكا, حالىق, ەسترادا مۋزىكاسىن قازاقستانعا جانە بارشا الەمگە تانىتىپ جۇرگەن ۇزدىك ورىنداۋشىلاردىڭ ونەرىن تەگىن تاماشالاي الادى. فەستيۆالدىڭ قوناقتارى الەمدىك ساحنالاردى باعىندىرعان ونەر جۇلدىزدارى بولعانىنا قاراماستان, كونتسەرتتەرگە بارلىق بيلەتتەر تەگىن تاراتىلدى. «استانا كەشتەرى» - الەمدە تەڭدەسى جوق فەستيۆال, سەبەبى بۇل جوبانىڭ ارقاسىندا الەمدىك ونەردىڭ وزىق ۇلگىلەرى كەڭ اۋقىمدى اۋديتورياعا جاقىن بولا تۇسەدى.
