اتىراۋ وبلىستىق قىلمىستىق-اتقارۋ جۇيەسى دەپارتامەنتىنىڭ ۋگ-157/1 مەكەمەسىندە №76 رەفەرەندۋم ۋچاسكەسىندە داۋىس بەرۋ اياقتالدى. مۇندا داۋىس بەرۋ ءۇشىن تەرگەۋدەگى 181 ادام تىركەلگەن.
ء«بىزدىڭ مەكەمەدەگى تەرگەۋ يزولياتورىندا 181 ادامعا داۋىس بەرۋ قۇقىعىن پايدالانۋعا تولىق مۇمكىندىك بەرىلدى. وسى ماقساتتا مەكەمەنىڭ اكت زالىنا داۋىس بەرۋگە ارنالعان ارنايى كابينالار جاسالىپ, بيۋللەتەن سالاتىن جاشىكتەر ورناتىلدى. بۇگىن, تاڭعى ساعات 7:00-دەن باستاپ تەرگەۋدەگى ازاماتتىڭ ءبارى رەفەرەندۋمدا داۋىس بەرۋگە نيەت ءبىلدىردى. ولار جەرگىلىكتى ساعات 9:30-عا دەيىن داۋىس بەرىپ ۇلگەردى», دەيدى ۋگ-157/1 مەكەمەسىنىڭ باستىعى دۋمان تاجەنوۆ.
وبلىستىق اۋماقتىق رەفەرەندۋم كوميسسياسىنىڭ مالىمەتىنشە, اتىراۋ وبلىسىندا داۋىس بەرۋ قۇقىعى بار 396 323 ادام تىركەلگەن. ولار 261 رەفەرەندۋم ۋچاسكەسىندە داۋىس بەرىپ جاتىر. ونىڭ ىشىندە اۋرۋحانالار, ۋاقىتشا قاماۋ ورىندارى مەن اسكەري بولىمشەلەردە 11 جابىق ۋچاسكە اشىلعان. 255 رەفەرەندۋم ۋچاسكەسىندە پاندۋس بار. بۇل ۋچاسكەلەر تاكتيلدىك بەلگىلەرمەن, كوز جانارىندا اقاۋى بار ادامدار اۋديونۇسقانى تىڭداعاننان كەيىن بيۋللەتەندى تولتىرۋ ءۇشىن ترافارەتتەرمەن قامتىلعان.
«اتىراۋ قالاسى مەن اۋداندار ورتالىقتارىندا مۇمكىندىگى شەكتەۋلى جاندارعا 39 ينۆاتاكسي قىزمەت كورسەتەدى. ال قۇلاعى ەستىمەيتىن ادامدار ءۇشىن 12 سۋردواۋدارماشى بار. اتىراۋ قالاسىندا, جىلىوي, يساتاي, قۇرمانعازى, قىزىلقوعا, ماقات اۋداندارىندا ۆاحتالىق ادىسپەن جۇمىس ىستەيتىن ادامداردىڭ داۋىس بەرۋىن 43 ۋچاسكەلىك كوميسسيا ۇيىمداستىرىپ جاتىر», دەپ ءمالىم ەتتى اۋماقتىق رەفەرەندۋم كوميسسياسىنان.
