وركەستر اتاقتى كومپوزيتور گايدننىڭ «قوشتاسۋ» سيمفونياسىن ورىنداپ, 1772 جىلى بولعان تاريحي وقيعانى دالمە-ءدال قايتالادى. تاريحقا سۇيەنسەك, ۇزاق ۋاقىتتان بەرى ەڭبەك دەمالىسىنا شىقپاعان وركەستر ارتىستەرى وسىلايشا پاتشاعا وزدەرىنىڭ نارازىلىعىن بىلدىرگىسى كەلگەن ەكەن. قازاقستاندا العاش رەت ونەر كورسەتكەن الەمدىك دەڭگەيدەگى ۇزدىك وركەستر جوعارى شەبەرلىگىمەن ءتانتى ەتتى.
فەستيۆال اياسىندا ەكى كۇن بويى ونەر كورسەتكەن بەرلين كونتسەرتتىك وركەسترىمەن بىرگە نارەك احنازاريان جانە ۆاديم حولودەنكو سىندى تانىمال مۋزىكانتتار ساحناعا شىقتى.
2 ماۋسىم كۇنى ەلوردالىق كورەرمەندەرگە بەلگىلى ۆيولونچەليست, ارمەنيا رەسپۋبليكاسىنىڭ ەڭبەك سىڭىرگەن ءارتىسى نارەك احنازاريان ءوز ونەرىن ۇسىندى. ول ي.گايدننىڭ ۆيولونچەل مەن سكريپكاعا ارنالعان №1 كونتسەرتىن ورىندادى. نارەك احنازاريان فەستيۆالدىڭ ەرەكشە اتموسفەراسىن اتاپ ءوتتى. «مەن الەمدەگى كوپتەگەن وركەسترلەرمەن ونەر كورسەتتىم, بىراق بەرلين وركەسترىمەن بۇگىن العاش رەت ساحناعا شىقتىم. مەن ءۇشىن «استانا كەشتەرى» ۇلكەن جاڭالىق بولدى. فەستيۆال قازاقستاننىڭ ونەردەگى جەتىستىكتەرىن حالىقارالىق دەڭگەيدە ناسيحاتتاپ, الەمدىك مادەنيەتتەر توعىسقان ەرەكشە الاڭعا اينالدى», دەپ جەتكىزدى مۋزىكانت.
قازاقستاندا العاش رەت «استانا كەشتەرi» فەستيۆالى اياسىندا ايگىلى پيانيستەردىڭ ءبىرى ۆاديم حولودەنكو ونەر كورسەتتى. ول الەمگە جىلدامدىعى جانە تەحنيكالىق شەبەرلىگى ەرەكشە مۋزىكانتتاردىڭ ءبىرى رەتىندە تانىلعان. پيانيست الەمنىڭ ۇزدىك وركەسترلەرىمەن جانە تەودور كۋرەنتزيس, لۋي لانگرە, پينحاس تسۋكەرمان, يۋري باشمەت, ۆلاديمير فەدوسەەۆ, ۆالەري گەرگيەۆ, كادزۋكي يامادا سىندى بەلگىلى ديريجەرلەرمەن تىعىز شىعارماشىلىق بايلانىس ورناتقان. ءپيانيستتىڭ كوپتەن كۇتكەن كونتسەرتى 3 ماۋسىم كۇنى «استانا بالەت» ساحناسىندا ءوتتى. بۇل كەشتە ونىڭ ورىنداۋىندا موتسارتتىڭ فورتەپيانو مەن وركەسترگە ارنالعان №23 كونتسەرتى شىرقالدى. «فەستيۆالگە الەمگە تانىمال مۋزىكانتتار جينالدى. بەرلين وركەسترىمەن بىرلەسكەن كونتسەرتىمىزدى كورەرمەن جاقسى قابىلدادى. «استانا كەشتەرى» فەستيۆالى وركەندەي بەرسىن, العىسىم شەكسىز», دەدى ۆاديم حولودەنكو. ەكى كۇن بويى ديريجەرلىك تۇعىردا بەلگىلى ديريجەر فاۋستو فۋنگارولي جەتەكشىلىك ەتتى.
ەسكە سالساق, «استانا كەشتەرi» فەستيۆالى اياسىندا 3 كونتسەرت ءوتتى. جوبا اياسىندا كورەرمەندەر قازاقستانعا جانە بارشا الەمگە تانىتىپ جۇرگەن ۇزدىك ورىنداۋشىلاردىڭ ونەرىن تەگىن تاماشالاي الادى. بيىلعى فەستيۆالدىڭ سوڭعى گالا-كونتسەرتى 4 ماۋسىم كۇنى ساعات 18:00-دە وتەدى. كونتسەرتتە روبەرتو مولينەلليدىڭ (يتاليا) جەتەكشىلىگىمەن سيمفونيالىق وركەستر اتاقتى روك حيتتەرىن ورىندايدى. بيلەتتەردى تەگىن الۋ ءۇشىن: تەل. +77758990712.
«استانا كەشتەرى» - الەمدە تەڭدەسى جوق فەستيۆال, سەبەبى بۇل جوبانىڭ ارقاسىندا الەمدىك ونەردىڭ وزىق ۇلگىلەرى كەڭ اۋقىمدى اۋديتورياعا جاقىن بولا تۇسەدى. فەستيۆالدىڭ وسى يگى مۇددەسىن «استانا كەشتەرى» جوباسىنىڭ قاتىسۋشىلارى بىرلەسىپ جۇزەگە اسىرۋعا ءاردايىم دايىن.
