بۇگىن, 19 ءساۋىر كۇنى فۋتبولدان قازاقستان بىرىنشىلىگى پرەمەر-ليگاسى جەتىنشى تۋرىنىڭ ويىندارى وينالدى. وندا 26 گول سوعىلدى, 5 ويىنشى الاڭنان قۋىلدى. بۇل تۋرالى egemen.kz ءتىلشىسى حابارلادى.
تۋردىڭ باستى ماتچى پاۆلوداردا جەرگىلىكتى «ەرتىس» پەن «استانا» اراسىندا ءوتتى. وسى كەزدەسۋدە چەمپيونات باستالعالى بەرى قاقپاسىن «قۇرعاق» ۇستاپ كەلە جاتقان مەيماندارعا ءبىرىنشى گول سالىندى. ونى 16-مينۋتتا ايىپ الاڭىنا جەتكەن دوپتى داربازاعا ءدال باعىتتاي بىلگەن ميودراگ دجۋدوۆيچ سالدى. وسىدان كەيىن ەكى مينۋت وتكەندە, تاڭات نوسەرباەۆ ەسەپتى تەڭەستىردى. بىراق بۇل تەپە-تەڭدىك ۇزاققا بارعان جوق, 27-مينۋتتا ۇلىقبەك باكاەۆ الاڭ يەلەرىن تاعى العا شىعاردى. ال تايم سوڭىندا بۇل شابۋىلشى پەنالتيدەن گول ءتۇسىرىپ, كوماندانىڭ باسىمدىعىن ەكى دوپقا جەتكىزدى. سول ساتتە قوناقتار ساپىنداعى اتاناس كۋردوۆ تاعى ءبىر جاۋاپ دوپ قايتارىپ, ەسەپتى 3:2-گە كىدىرتتى.
ەكىنشى تايمدا جوعارىداعى اتاناستىڭ داۋرەنى ءجۇردى. ول الدىمەن 55-مينۋتتا ەسەپتى تەڭەستىرىپ بەردى. سوسىن 76-مينۋتتا تاعى ءبىر گولدىڭ اۆتورى اتانىپ, حەت-تريككە قول جەتكىزدى. وسى ويىندا ەكى ويىنشى الاڭنان قۋىلدى. اتاپ ايتقاندا, 45-مينۋتتا مەيمانداردان انيچيچ وسىنداي جازا السا, 68-مينۋتتا باقاەۆ سونىڭ ارتىنان كەتتى.
سەمەيدە «سپارتاك» پەن تالدىقورعاننىڭ «جەتىسۋ» كوماندالارى اراسىندا كۇشتى انىقتالمادى. دەگەنمەن, 7-مينۋتتا بەيبىت تاتىشەۆتىڭ ارقاسىندا العا شىققان قوناقتار 69-مينۋتقا دەيىن الدا تۇردى. وسى ارتىقشىلىقتى ساۆو كوۆاچەۆيچ بۇزىپ جىبەردى.
قوستانايدا جەرگىلىكتى «توبىل» مەن الماتىنىڭ «قايراتى» اراسىنداعى ويىندا دا قارسىلاستار ءبىر-ءبىرىن الا المادى. ماتچ قوناقتاردىڭ باسىمدىلىعىمەن باستالدى. ولار 27-مينۋتتا مومودۋ سيسسەيدىڭ, 43-مينۋتتا يوسيپ كنەجەۆيچتىڭ سوققان گولدارى ارقاسىندا 2:0 ەسەبىمەن الدا تۇردى. بىراق ەكىنشى تايمدا 4 مينۋتتىڭ ىشىندە الاڭ يەلەرى تارازى باسىن تەڭەستىرىپ ۇلگەردى. ولاردى اناتولي بوگدانوۆ پەن وگنەن كراسيچ 69 جانە 73-مينۋتتاردا ءتۇسىردى.
ال تاعى ءبىر تەڭ ويىن تىركەلگەن تارازدا ەسەپ بۇدان دا قوماقتى شىقتى. مۇنداعى «تاراز» بەن «اتىراۋ» اراسىنداعى ويىن 3:3 ەسەبىمەن تەڭ تارقادى. ويىن بارىسىندا مەيماندار ىلعي العا شىعۋمەن, الاڭ يەلەرى تەڭەستىرۋمەن بولدى. اتاپ ايتقاندا, اتىراۋلىقتار ساپىنداعى ستەفان ەسسامە (30, 88-مينۋتتار), ساۆيو نسكەرەكو (60-مينۋت) سالعان گولدارعا الاڭ يەلەرىنەن تيمۋر دوسماعامبەتوۆ (56-مينۋت), مۇرات تىلەشەۆ (68-مينۋت) جانە يوۆان گوليچ (90-مينۋت) ارتىنشا جاۋاپ قايتارىپ وتىردى. بۇل ويىندا ءۇش ويىنشى (گوليچ, 90; ۋببينك, 90+3 – «تاراز», كارپوۆيچ , 90,3– «اتىراۋ») الاڭنان قۋىلدى. ولاردىڭ ءبارى ويىن ءبىتىپ جاتقاندا وسىنداي جازا الدى.
بۇدان كەيىنگى ەكى ويىندا دا الاڭ يەلەرىنىڭ مەرەيلەرى ۇستەم بولدى. سولاردىڭ بىرىنشىسىندە – قاراعاندىنىڭ «شاحتەرى» ءوز الاڭىندا شىمكەنتتىڭ «ورداباسى» كومانداسىن 3:1 ەسەبىمەن تىزە بۇكتىردى. العاشقى ءۇش گولدى كەنشىلەر سالدى (ماقسات بايجانوۆ, 7; شاۆكات سالوموۆ, 20; گەديمينتاس ۆيچيۋس, 46). ال قوناقتار ءبىر دوپتىڭ قارىمتاسىن 90-مينۋتتا ماردان تورەبەكتىڭ كۇشىمەن قايتاردى.
اقتوبەدەگى ويىن دا الاڭ يەلەرىنىڭ باسىمدىعىمەن ءوتتى. جەرگىلىكتى كوماندا, كەنشىلەر ءتارىزدى, مەيماندار – قىزىلوردانىڭ «قايسار» جاساعىنىڭ فۋتبولشىلارىنا قاراعاندا, اناعۇرلىم شيراق وينادى. سونىڭ ناتيجەسىندە ولار ءۇش دوپ ايىرىمىمەن جەڭىسكە جەتتى. ويىنداعى ءبىرىنشى گول 45-مينۋتتا الەكساندر گەينريحتىڭ شەبەرلىگىمەن سالىندى. كەلەسى گولدى دانيلو نەكو 49-مينۋتتا ءتۇسىردى. ال سوڭعى گولدى 90-مينۋتتا الەكساندر ميروشنيچەنكو ءوز ەسەبىنە جازدى.
دامير قوجامقۇل.
دەرەككوز: egemen.kz.
فوتو: egemen.kz.
