ەر ادامنىڭ ايتۋىنشا, وعان تەلەفون ارقىلى بەلگىسىز ەكى ادام قوڭىراۋ شالعان. ولاردىڭ ءبىرى – ەر ادام ءوزىن قالا پروكۋرورىنىڭ ورىنباسارى رەتىندە, ال ەكىنشىسى – ايەل ءوزىن قارجىلىق باقىلاۋ ءبولىمىنىڭ قىزمەتكەرى رەتىندە تانىستىرعان. الاياقتار ول كىسىگە شوتىنان الدەكىمنىڭ اقشا الۋعا تىرىسىپ جاتقانىن جانە بۇل اقشانى ساقتاۋ ءۇشىن ونى بانكتىڭ كەپىلدىك شوتىنا جىبەرۋ كەرەك ەكەنىن ايتقان. وسىلايشا, جابىرلەنۋشى ءوزىنىڭ بارلىق اقشاسىن 15 رەت ءارتۇرلى شوتتارعا اۋدارعان.
جەدەل-ىزدەستىرۋ ءىس-شارالارى بارىسىندا سارىارقا اۋدانىنىڭ جەدەل ۋاكىلدەرى كۇدىكتىلەردىڭ ءبىرى – رەسەي فەدەراتسياسىنىڭ 33 جاستاعى ازاماتىن ۇستادى. قىلمىستىق توپتىڭ ەكى قاتىسۋشىسى رەسپۋبليكادان تىس جەردە جاسىرىنىپ ۇلگەرگەن. قازىر ىزدەستىرۋ شارالارى جۇرگىزىلىپ جاتىر.
سونداي-اق ولاردىڭ ەلوردا اۋماعىندا جالعان تۇلعالار ارقىلى بانك كارتالارىن راسىمدەگەنى انىقتالدى. ءبىر اي ىشىندە كۇدىكتىلەر ەلىمىزدىڭ ءارتۇرلى بانكتەرىندە اشىلعان 35 بانك كارتاسىن العان. الاياقتىق ارەكەتتەردەن الىنعان اقشانى ولار قولما-قول اقشاعا اينالدىرىپ, اقش دوللارىنا ايىرباستاعان. كەيىن قاسكۇنەمدەر ۆاليۋتانى كريپتوۆاليۋتاعا ايىرباستاپ, رەسەي فەدەراتسياسىنا جىبەرگەن.
قازىر اسا ءىرى مولشەردە الاياقتىق جاساۋ فاكتىسى بويىنشا قر قك-ءنىڭ 190-بابىنىڭ 4-بولىگى بويىنشا سوتقا دەيىنگى تەرگەۋ جۇرگىزىلۋدە.
نۇر-سۇلتان قالاسىنىڭ پوليتسيا دەپارتامەنتى ءتۇرلى ۆەدومستۆولاردىڭ باسشىلارى مەن قىزمەتشىلەرىنىڭ اتىنان قوڭىراۋ شالۋ ءتارىزدى الاياقتىقتىڭ جيىلەپ كەتكەنىن ەسكەرتەدى.
سالتانات كەنجەباي
