پارلامەنت • 02 ماۋسىم، 2022

سەناتتا زياتكەرلىك مەنشىك نارىعىن دامىتۋعا قاتىستى زاڭ قابىلداندى

سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە زياتكەرلىك مەنشىك جانە مەملەكەت كەپىلدىك بەرگەن زاڭ كومەگىن كورسەتۋ سالالارىنداعى زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قۇجات ەكى وقىلىمدا قارالدى. تالقىلاۋدان كەيىن پالاتا دەپۋتاتتارى اتالعان زاڭدى قابىلدادى، دەپ حابارلايدى Egemen.kz.

گاۋھار قاپاش

«وسى زاڭ جوباسىمەن جۇمىس زياتكەرلىك مەنشىك سالاسىنداعى زاڭنامانى جەتىلدىرۋدەگى كەزەكتى قادام بولدى. بۇل پروتسەسس ۇلتتىق زاڭنامانى حالىقارالىق شارتتارمەن ۇيلەستىرۋ اياسىندا ىسكە اسىرىلدى. قازىر قازاقستان 19 حالىقارالىق شارتقا جانە 25 وڭىرلىك كەلىسىمگە قاتىسىپ وتىر. وسىعان بايلانىستى، 2020 جىلى پارلامەنت ءماجىلىسى ادىلەت مينيسترلىگىنە وسى سالاداعى قۇقىق قولدانۋ پراكتيكاسىنا تالداۋ جۇرگىزۋدى ۇسىندى. تالداۋ Reed Smith كومپانياسىنىڭ زاڭ كونسۋلتانتتارىن تارتا وتىرىپ جۇرگىزىلدى. ونىڭ قورىتىندىسى بويىنشا زياتكەرلىك مەنشىك سالاسىن ودان ءارى دامىتۋ جونىندە ۇسىنىستار ازىرلەندى»، دەدى پارلامەن ءماجىلىسىنىڭ دەپۋتاتى گۇلنار بيجانوۆا.

بۇل جۇمىستىڭ ناتيجەلەرى پارلامەنت ءماجىلىسىنىڭ دەپۋتاتتارىنا تانىستىرىلىپ، ەگجەي-تەگجەيلى تالقىلاۋدان كەيىن زاڭنامالىق باستامانىڭ نەگىزىنە الىندى. ونىڭ ايتۋىنشا، زاڭ جوباسىندا حالىققا مەملەكەت كەپىلدىك بەرگەن زاڭ كومەگىن 2025 جىلعا قاراي 2 ەسەگە ۇلعايتۋ جونىندەگى مىندەتتى شەشۋ ۇسىنىلادى. مۇنداي مىندەت «Amanat» پارتياسىنىڭ سايلاۋالدى باعدارلاماسىندا قويىلعان.

«جول كارتاسىن ورىنداۋ ءۇشىن 2022 – 2024 جىلدارعا رەسپۋبليكالىق بيۋدجەتتەن 8 ملرد 700 ملن تەڭگە ءبولىندى. تۇزەتۋلەر 12 مىڭنان استام مەملەكەت كەپىلدىك بەرگەن زاڭ كومەگىن كورسەتۋگە زاڭ كونسۋلتانتتارىن تارتۋعا باعىتتالعان جانە حالىقتىڭ مۇقتاج توپتارىن قامتۋعا كومەكتەسەدى. بۇل قۇقىقتىق ماسەلەلەردى شەشۋ تيىمدىلىگىن ارتتىرۋعا، ءتۇرلى ينستانتسيالارعا جۇگىنۋ سانىن ازايتۋعا ىقپال ەتەدى»، دەدى گ. بيجانوۆا.

ءوز كەزەگىندە سەنات توراعاسى ماۋلەن اشىمباەۆ قابىلدانعان زاڭ زياتكەرلىك مەنشىك قۇقىعىن ودان ءارى جەتىلدىرۋدى كوزدەيتىنىن اتاپ ءوتتى.

«زاڭ وسى قۇقىقتاردى ۇجىمدىق نەگىزدە باسقاراتىن ۇيىمداردىڭ جانە پاتەنتتىك سەنىم بىلدىرىلگەن وكىلدەردىڭ قىزمەتىنىڭ اشىقتىعىن قامتاماسىز ەتۋگە ارنالعان. سونداي-اق قۇجاتتا زياتكەرلىك مەنشىك قۇقىقتارى مەن ونەركاسىپتىك مەنشىك وبەكتىلەرىن قورعاۋدى كۇشەيتۋ ماسەلەسى قاراستىرىلعان. زاڭدا ۇلتتىق زاڭناما نورمالارىن وسى سالاداعى حالىقارالىق ۇستانىم مەن تاجىريبەلەرىنىڭ ەرەجەلەرىمەن سايكەستەندىرۋگە قاتىستى دا نورمالار بار. سونىمەن قاتار ەنگىزىلگەن وزگەرىستەر مەملەكەت كەپىلدىك بەرگەن زاڭ كومەگىن الۋ اياسىن كەڭەيتۋگە دە باعىتتالىپ وتىر. الداعى ۋاقىتتا وسى زاڭ ەلىمىزدە زياتكەرلىك مەنشىك نارىعىن دامىتۋعا، ازاماتتاردىڭ قۇقىقتارىن قامتاماسىز ەتۋگە ءوز سەپتىگىن تيگىزەدى دەپ سەنەمىز»، دەدى سەنات توراعاسى.