قحپ باسشىسىن جۇمىس كەستەسىن الماتىلىق پارتيالاستارمەن كەزدەسۋدەن باستاپ, بايانداماسىنىڭ نەگىزگى تاقىرىبىن 5 ماۋسىمدا وتەتىن رەسپۋبليكالىق رەفەرەندۋمعا ارنادى. ول كونستيتۋتسياعا وزگەرىستەر مەن تولىقتىرۋلار ەنگىزۋگە بايلانىستى ماسەلەلەردى قوزعادى.
«قازاقستان حالىق پارتياسى ون ساعاتتىق ونلاين مارافون ۇيىمداستىردى, بۇل – ءبىزدىڭ پارتيانىڭ رەفەرەندۋمدى قولداۋعا قوسقان ۇلەسى. جالپى العاندا وسى اي ىشىندە پارتيا مۇشەلەرى رەفەرەندۋمعا بايلانىستى اقپاراتتىق-ناسيحات جۇمىستارىن جۇرگىزىپ, وزگەرىستەر مەن تولىقتىرۋلاردىڭ ءمانىن ءتۇسىندىرىپ, جان-جاقتى جۇمىس ىستەدى. وڭىرلەردى ارالاپ, حالىقپەن كەزدەسۋلەر وتكىزدىك, سۇراقتارعا جاۋاپ بەرىپ, بۇقارالىق اقپارات قۇرالدارىندا, ارنايى سايتتاردا ءسوز سويلەدىك. وسى ورايدا كونستيتۋتسيالىق رەفورما مەن رەفەرەندۋمدى جالپىحالىقتىق قولداۋ جاڭا ساياسي باعدارىمىزدى كورسەتەدى. قازاقستان جاڭا بەلەسكە اياق باسا وتىرىپ, جەر قويناۋىنداعى مول قازىناسىنىڭ يگىلىگىن بىرگە كورەتىن بولادى», دەپ اتاپ ءوتتى ە.ەرتىسباەۆ.
پارتيا توراعاسى پرەزيدەنتتىڭ كونستيتۋتسياعا «جەر جانە ونىڭ قويناۋى مەن بايلىعى قازاقستان حالقىنا تيەسىلى بولۋى كەرەك» دەگەن تۇزەتۋ ەنگىزۋ تۋرالى باستاماسىن قولداعانىن مالىمدەدى. «بۇل – «حالىق ۇنىنە قۇلاق اساتىن مەملەكەتتىڭ» ناقتى كورىنىسىنىڭ ءبىرى. مەملەكەت باسشىسى دا وسى باسىمدىققا نازار اۋدارىپ وتىر», دەدى ول.
قحپ مۇشەلەرى كونستيتۋتسياعا ەنگىزىلگەن بارلىق وزگەرىستەردىڭ ەلىمىز ءۇشىن, جاڭا قازاقستاننىڭ قالىپتاسۋى ءۇشىن ماڭىزى زور ەكەنىن ءبىراۋىزدان قولداپ, پىكىر ءبىلدىردى. جيىن بارىسىندا ە.ەرتىسباەۆ قحپ-نىڭ جاڭا مۇشەلەرىنە پارتيا بيلەتتەرىن تابىستاپ, پارتيانىڭ نىعايۋىنا, دامۋىنا ۇلەس قوسادى دەگەن سەنىم ءبىلدىردى.
الماتى
