«ەلدىڭ كەشەندى ترانسفورماتسياسى ازاماتتاردىڭ ساياسي بەلسەندىلىگىن ارتتىراتىنى ءسوزسىز. بىراق ول كوبىنەسە ءپوپۋليزمنىڭ كۇشەيۋىمەن سيپاتتالادى. الەمنىڭ كوپتەگەن ەلدەرىندە ورىن الىپ جاتقان ارانداتۋلاردىڭ ايتارلىقتاي ءوسۋى دە قوعامدا قالىپتاساتىن ساياسي كوزقاراستارمەن تىعىز بايلانىستى», دەدى پرەزيدەنت.
مەملەكەت باسشىسى دامىعان دەموكراتيالىق قوعام قۇرۋ – بۇل دايەكتى جانە جۇيەلى جۇمىس ەكەنىن ءتۇسىنۋ كەرەكتىگىن باسا ايتتى.
«بۇل رەتتە ءبىزدىڭ ەلدە جوعارى ساياسي جاۋاپكەرشىلىك مادەنيەتى تامىر جايۋ كەرەك. سەبەبى, ءدال وسىنداي مادەنيەت ساياسي سالاداعى راديكاليزم مەن پوپۋليزمگە قارسى تۇرۋدىڭ باستى فاكتورى. بۇل جەردە كوپ نارسە قوعامنىڭ جەتىلۋىنە, ساناعا ىقپال ەتەدى. دەموكراتيا – بۇل ارقايسىمىزدىڭ كۇندەلىكتى تىنىمسىز ەڭبەگىمىز. مۇندا عىلىمي قوعامداستىقتىڭ ءرولى دە, ءمانى دە وتە زور. جالپىرەسپۋبليكالىق رەفەرەندۋم جاڭا ادىلەتتى قازاقستاندى قۇرۋدىڭ ماڭىزدى باستاماسى بولادى», دەدى پرەزيدەنت.
