مەملەكەت باسشىسى عىلىمي قىزمەتپەن تىكەلەي اينالىساتىن اكادەميكتەرگە ءومىر بويى اي سايىن ستيپەنديا بەرۋ ماسەلەسى شەشىلەتىنىن حابارلادى.
ء«بىز حالقىمىزدىڭ ءبىرتۋار پەرزەنتتەرىنىڭ ەڭبەگىن ءاردايىم جادىمىزدا ساقتايمىز. وسكەلەڭ ۇرپاق ولاردى ۇلگى-ونەگە تۇتادى. بۇگىندە جاس عالىمدارىمىز سول الىپتاردىڭ ءىزىن باسىپ, جولىن جالعاپ كەلەدى. دەگەنمەن, ءبىر ماسەلەنى قاپەردە ۇستاۋ كەرەك. ءومىر ءبىر ورىندا تۇرعان جوق. كۇن ساناپ وزگەرىپ جاتقان قازىرگى زاماندا بۇرىنعى جەتىستىكتەرگە مارقايىپ وتىرۋعا بولمايدى. جۇرت ۇيىمعا مۇشە بولۋ راسىمدەرىن جانە وعان ۇمىتكەرلەردى تولىعىمەن ءبىلىپ وتىرۋعا ءتيىس. مۇنىڭ ءبارى اكادەميانىڭ جۇمىسىنا تىڭ سەرپىن بەرىپ, بەدەلىن ارتتىرادى. سونداي-اق ەلىمىزدەگى عىلىم سالاسىنىڭ تۇراقتى دامۋىنا جول اشادى», دەدى پرەزيدەنت.
