بۇل تۋرالى ورتالىق رەفەرەندۋم كوميسسياسىنىڭ توراعاسى نۇرلان ءابدىروۆ ايتتى. ونىڭ سوزىنە سۇيەنسەك, كوميسسيانىڭ بارلىق وتىرىسى گيبريدتى فورماتتا, ياعني وففلاين ءارى ونلاين رەجىمدە بۇقارالىق اقپارات قۇرالدارىنىڭ قاتىسۋىمەن وتكىزىلىپ كەلەدى. جيىندار ورك-نىڭ ينتەرنەت رەسۋرسى ارقىلى كورسەتىلىپ, سۋردواۋدارمامەن قامتاماسىز ەتىلگەن. ءار وتىرىستان كەيىن باق وكىلدەرىنە بريفينگتەر وتكىزىلىپ, جۋرناليستەرگە تولىق مالىمەت بەرىلەدى, دەيدى ورتالىق وكىلدەرى. رەفەرەندۋمعا قاتىستى قاۋلىلار, ءباسپاسوز حابارلامالارى مەن وزگە دە اقپاراتتىق ماتەريالدار كوميسسيانىڭ ينتەرنەت رەسۋرسىندا ورنالاستىرىلعان جانە قولجەتىمدى.
«اقپاراتتىق ۆيدەو جانە اۋديو ماتەريالدار, ينتەرنەت-باننەرلەر, مەرزىمدى باسىلىمدارعا ارنالعان مودۋلدەر ازىرلەنىپ, رەسپۋبليكالىق جانە وڭىرلىك باق-قا تاراتىلعان. وسىلايشا, كوميسسيا تاراپىنان رەفەرەندۋمعا دايىندىق پروتسەسىنىڭ اشىقتىعى مەن جاريالىلىعىن قامتاماسىز ەتۋ بويىنشا بارلىق قاجەتتى شارا قابىلدانىپ جاتىر», دەپ ناقتىلادى جاۋاپتى ورگان وكىلدەرى.
اقپارات جانە قوعامدىق دامۋ ءمينيسترى اسقار وماروۆتىڭ ايتۋىنشا, الداعى ساياسي وقيعاعا ەلىمىزدەگى بارلىق اقپارات قۇرالى جۇمىلدىرىلىپ, تۇراقتى مونيتورينگ جۇرگىزىلىپ كەلەدى. ۆەدومستۆو باسشىسى باق-تا جانە الەۋمەتتىك جەلىلەر ارقىلى وڭىرلەر بويىنشا داۋىس بەرۋ ۋچاسكەلەرىن ىزدەۋگە بايلانىستى اقپاراتتىق حابارلامالار مەن گرافيكالىق ونىمدەر تاراتىلعانىن جەتكىزدى.
5 مامىردان باستاپ 499 رەسپۋبليكالىق جانە وڭىرلىك باق-قا, اتاپ ايتقاندا 321 گازەتكە, 47 تەلەارنا مەن 13 ينتەرنەت-رەسۋرسكە باقىلاۋ جۇرگىزىلدى. ازىرگە ۇگىت جۇمىستارىنا بايلانىستى بۇزۋشىلىقتار تىركەلمەپتى.
تسيفرلىق دامۋ, يننوۆاتسيالار جانە اەروعارىش ونەركاسىبى ۆيتسە-ءمينيسترى اسەت تۇرىسوۆ «جەكە سايكەستەندىرۋ ءنومىرى (جسن) بويىنشا داۋىس بەرۋگە ارنالعان ۋچاسكەنى ىزدەۋ» سەرۆيسىن ازىرلەۋگە قاتىستى ۆەدومستۆونىڭ اتقارعان جۇمىسى جونىندە ايتتى. بۇل قىزمەت Gov.kz/referendum, Referendum.gov.kz جانە Referendum2022.gov.kz اقپاراتتىق پلاتفورمالارىندا ۇسىنىلعان. كەز كەلگەن ەلىمىزدىڭ ازاماتى جسن ارقىلى ءوز داۋىس بەرۋ ۋچاسكەسىن تابا الادى. ۋچاسكەسى تابىلماعان جاعدايدا اۆتوماتتى تۇردە اكىمدىكتەردىڭ call-ورتالىقتارىنىڭ تىزىمدەرى كورسەتىلەدى. مۇنداي قىزمەت تۇرلەرى Kaspi.kz جانە Homebank قوسىمشالارىندا دا قاراستىرىلعان.
