– بۇگىنگى الەمدە اشىق دەرەكتەر يدەولوگياسى دەگەن باعىت قالىپتاسقان. بۇل اشىق دەرەكتەر دەگەن نە؟ ماسەلەن, بۇۇ-نىڭ, ەۋرووداقتىڭ, نە بولماسا, ەقىۇ-نىڭ, دۇنيەجۇزىلىك بانكتىڭ, وزگە دە ءىرى حالىقارالىق ۇيىمداردىڭ الەۋمەتتىك زەرتتەۋلەرى اشىق اقپارات رەتىندە ۇسىنىلادى. سونىمەن قاتار اقش, ۇلىبريتانيا, سينگاپۋر, مالايزيا, فرانتسيا, اۋستريا سىندى جاھاننىڭ 23 مەملەكەتىندە اشىق دەرەكتەردى جاريالاۋ ارقىلى ازاماتتاردىڭ كوڭىل-كۇيىن, ساياسي وي-تۇجىرىمىن كوپشىلىككە ءبىلدىرىپ وتىرادى. ال «الەۋمەت» جوباسىنىڭ نەگىزگى ماقساتى جۇيەلى قوعامدىق سوتسيولوگيانى قالىپتاستىرۋ بولىپ سانالادى. وسى ارقىلى ازاماتتاردىڭ جەكە ويىن عانا ەمەس, جالپى قوعامنىڭ كوڭىل-كۇيىن ءبىلىپ وتىرۋعا جاعداي جاسالادى. ءبىز اي سايىن, توقسان سايىن الەۋمەتتىك زەرتتەۋلەرىمىزدى جاريالاپ وتىرامىز. وسى ارقىلى حالىققا اشىقتىق پەن جاقىندىق يدەولوگياسىن ۇستانۋعا ءوز ۇلەسىمىزدى قوسامىز. مۇنداي زەرتتەۋلەر ارقىلى پارتيا ءوز جۇمىسىندا قوعامدىق پىكىردى ەسكەرە وتىرىپ, ونىڭ تيىمدىلىگىن باعالاپ, سكرينينگتەر جۇرگىزەدى. بۇل جۇمىستىڭ بارلىعى مەملەكەت باسشىسى قاسىم-جومارت توقاەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسىنا تولىق سايكەس كەلەدى, – دەدى پارتيا حاتشىسى داۋلەت كارىبەك.
الەۋمەتتىك زەرتتەۋ كەزىندە دەرەكتەردى جيناۋ ءادىسى ساۋالداما ارقىلى قولعا الىندى. بۇل جۇمىس بيىلعى 19-22 مامىر ارالىعىندا ءوتتى. سونىڭ ناتيجەسىندە حالىقتىڭ باسىم بولىگى (87,3%-ى) الداعى رەفەرەندۋمنان حاباردار. وتانداستارىمىز بۇل اۋقىمدى ناۋقان تۋرالى الەۋمەتتىك جەلىلەر مەن مەسسەندجەرلەردەن (58,9%), تەلەارنالاردان (45,1%) ەستىپ-بىلگەن ەكەن. بۇعان قوسا, ءوزارا بايلانىس, اڭگىمە اراسىندا اقپارات الماسىپ جاتقاندار دا بار (40%).
جالپى وتانداستارىمىزدىڭ 67,9%-ى كونستيتۋتسيالىق رەفورما ەل دامۋىنا وڭ اسەر ەتەدى دەپ ەسەپتەيدى. سونىمەن الەۋمەتتىك دەرەكتەرگە سايكەس, ازاماتتاردىڭ كوپشىلىگى قولدانىستاعى كونستيتۋتسيانى وزگەرتۋ بويىنشا رەفەرەندۋم وتكىزۋگە وڭ كوزقاراس تانىتىپ وتىر. اتاپ ايتقاندا, قازاقستاندىقتار ازاماتتاردىڭ قۇقىقتارىن قورعاۋ تەتىكتەرىن كۇشەيتۋدى (80,1%), حالىقتىڭ ەلدى باسقارۋ ىسىنە ارالاسۋىن كەڭەيتۋدى (76,7%), سۋپەرپرەزيدەنتتىك مودەلدەن پرەزيدەنتتىك رەسپۋبليكاعا تۇپكىلىكتى كوشۋدى (73,5%), بيلىك تارماقتارى اراسىنداعى وكىلەتتىكتەردى قايتا ءبولۋدى (72,3%), پارلامەنتتىڭ ءرولىن كۇشەيتۋدى جانە مارتەبەسىن ارتتىرۋدى (64,4%) قولداۋعا ءازىر. 5 ماۋسىمدا سايلاۋ ۋچاسكەلەرىنە ازاماتتاردىڭ ۇشتەن ەكىسى كەلۋدى كوزدەپ وتىر.
ايتا كەتۋ قاجەت, جۇيەلى الەۋمەتتانۋدى قالىپتاستىرۋ ماقساتىندا «الەۋمەت» جوباسى اياسىندا تۇراقتى نەگىزدە زەرتتەۋلەر جۇرگىزىلەدى. ال ولاردىڭ ناتيجەلەرى ينستيتۋتتىڭ @SocioExpert telegram ارناسىندا جاريالانادى.
ال قوعامدىق ساياسات ينستيتۋتىنىڭ ديرەكتورى ءمادينا نۇرعاليەۆانىڭ ايتۋىنشا, حالىقتىڭ وزگەرىستەرگە دەگەن سۇرانىسى تۇراقتى تۇردە تۋىنداپ وتىر.
– سوڭعى الەۋمەتتىك زەرتتەۋلەردىڭ ناتيجەسى قازىرگى قوعامدىق-ساياسي ۇدەرىستەردىڭ وڭ باعالاناتىنىن كورسەتەدى. ازاماتتاردىڭ 87,5%-ى بەلگىلى ءبىر دارەجەدە ەل ومىرىندەگى وزگەرىستەردى قالايدى. سۇرالعانداردىڭ 55,4%-ى بەلسەندى ازاماتتىق ۇستانىمعا يە. زەرتتەۋگە ەلىمىزدىڭ بارلىق وڭىرىنەن 1 700-دەن استام رەسپوندەنت قاتىستى, – دەدى م.نۇرعاليەۆا.
ءوز كەزەگىندە Amanat پارتياسىنىڭ اتىنان سايلانعان دەپۋتات ساياسات نۇربەك پارتيانىڭ ۇگىت ناۋقانى تۋرالى ايتتى. بۇگىندە دەپۋتاتتار ايماق تۇرعىندارىمەن مىڭعا جۋىق كەزدەسۋ وتكىزدى. ال ءىس-شارالارعا بارلىعى 220 مىڭنان استام ادام قاتىسقان. سونىمەن قاتار ۇگىت ناۋقانى اياسىندا پارتيالىقتار قازاقستاندىقتاردىڭ ۇسىنىستارىن جيناۋعا باعىتتالعان رەسپۋبليكالىق اكتسيانى باستادى. ۇگىت ناۋقانى باستالعاننان بەرى 4,5 مىڭنان استام تالاپ-تىلەك كەلىپ ءتۇستى. ولاردىڭ اراسىندا الەۋمەتتىك جانە ساياسي سيپاتتاعى ۇسىنىستار مەن وتىنىشتەر باسىم. باسقوسۋ بارىسىندا قولدانبالى ەتنوساياسي زەرتتەۋلەر ينستيتۋتى ديرەكتورىنىڭ ورىنباسارى ايگۇل سادۋاقاسوۆا رەفەرەندۋم وتكىزۋدىڭ حالىقارالىق تاجىريبەسىمەن ءبولىستى.
