ساناۋلى كۇننەن كەيىن رامىزدەر كۇنىن اتاپ وتەمىز. ال كەشەگى كەلەڭسىزدىك جىل سايىن مەملەكەتتىك تۇرعىدان ەرەكشە ءمان بەرىلىپ وتكىزىلەتىن وسى كۇننىڭ ءمانىن, يدەولوگيالىق ماڭىزىن جاستارىمىزدىڭ ساناسىنا سىڭىرە الماعانىمىزدى كورسەتپەي مە؟
ەرتەسى كۇنى ەل الدىنا شىعىپ, كەشىرىم سۇراپتى الگىلەردىڭ ءبىرى. الايدا ۇلتتىڭ ارى مەن ۇياتىن اياققا تاپتاۋ كەشىرىم سۇراپ قۇتىلىپ كەتەتىن وڭاي ءىس ەمەس. ويتكەنى تۋدىڭ قورلانعانى كەشىرىلەتىن ءىس ەمەس. ساحنا تورىنە شىعىپ اۋزىنا كەلگەندەرىن ايتقاندار تەك ەسكەرتۋىمەن قۇتىلسا, مۇنداي جاعداي قايتالانا بەرۋى ابدەن مۇمكىن. تۋدى مازاق ەتكەندەر تۇتاستاي ەلدى مازاق ەتكەنىن تۇسىنۋلەرى قاجەت. ال قالىڭ جۇرت جەلىككەن جاستاردى عانا ەمەس, وسى كونتسەرتكە جاۋاپتى مەملەكەتتىك ساياسي لاۋازىمدى تۇلعالار مەن الماتى قالاسىنىڭ مادەني ءىس-شارالارىنا جاۋاپتى شەنەۋنىكتەردى دە جاۋاپكەرشىلىككە تارتۋدى تالاپ ەتىپ وتىر.
سەناتور ايگۇل قاپباروۆا ەكى جىل بۇرىن ارتىستەردىڭ ساحناداعى ءجۇرىس-تۇرىسى, ادەبى, مىنەز-قۇلقى, ساحنا تورىندە ادەپسىز ءسوز ايتۋ مەن فونوگرامما قولدانۋىن رەتتەيتىن زاڭ قابىلدانعانىن ەسكە سالىپ ءوتتى.
سەنات دەپۋتاتى ايتىپ وتىرعان زاڭ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مادەنيەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» دەپ اتالادى. «ماڭىزدى قۇجاتتى قابىلداۋ كەزىندە مادەنيەت جانە سپورت ءمينيسترى تۇزەتۋلەر كونتسەرتتىك ويىن-ساۋىق ءىس-شارالارىن وتكىزۋ كەزىندە تۋىندايتىن بىرقاتار ماسەلەنى رەتتەيدى دەپ سەندىرگەن ەدى. الايدا كورىپ وتىرعانىمىزداي, رەتتەي المادى. ەندەشە, قابىلدانعان زاڭ تالاپتارىن قايتا كۇشەيتۋ ماسەلەسى تۋىنداپ وتىر. زاڭنىڭ ورىندالۋىن قاداعالايتىن ورگاندار الماتى قالاسىندا بولعان كونتسەرت قويۋشىلارعا قاتاڭ شارا قولدانۋى كەرەك», دەدى ول.
ەگەر زاڭ تىلىمەن ايتار بولساق, جەلىككەن جاستاردىڭ تۋدى مازاق ەتكەنى قىلمىستىق كودەكستىڭ 372-بابى «مەملەكەتتىك رامىزدەردى قورلاۋ» بويىنشا سارالانادى. ال بۇل باپتىڭ سانكتسياسى بويىنشا قازاقستان رەسپۋبليكاسىنىڭ مەملەكەتتىك رامىزدەرىن قورلاعاندار 2 مىڭ ايلىق ەسەپتiك كورسەتكiشكە دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە 600 ساعاتقا دەيىنگى مەرزىمگە قوعامدىق جۇمىستارعا تارتۋعا نەمەسە 2 جىلعا دەيiنگi مەرزiمگە باس بوستاندىعىن شەكتەۋگە, بولماسا سول مەرزiمگە باس بوستاندىعىنان ايىرۋعا جازالانادى. ال كوپتىڭ الدىنا شىعىپ بەيادەپ ءسوز ايتقانى, ەتيكاعا قايشى قىلىقتار كورسەتكەنى اكىمشىلىك قۇقىق بۇزۋشىلىق تۋرالى كودەكستىڭ 434-بابى «ۇساق بۇزاقىلىققا» جاتادى. زاڭ بويىنشا قوعامدىق ورىنداردا بىلاپىت سويلەگەن ادامعا 5 ايلىق ەسەپتiك كورسەتكiش مولشەرiندە ايىپپۇل سالىنادى نەمەسە 10 تاۋلiككە اكiمشiلiك قاماققا الىنادى. الايدا الەۋمەتتىك جەلىدەگى پىكىرلەردى وقىپ شىققاندا تۇسىنگەنىمىز – حالىق كيەلى ساحنانىڭ قادىرىن كەتىرگەندەرگە قاتاڭ شارا قولدانۋدى تالاپ ەتىپ وتىر. ول – ۇلتتىق قۇندىلىعىمىزدى تاپتاپ, ساحنادا بوقاۋىز سوزدەر ايتقان «يرينا كايراتوۆنا» جانە «شيزا» ەسىمىمەن تانىلعان جاستاردى مۇلدە ساحناعا جولاتپاۋ.
نەگىزى, بيلىكتىڭ باسى-قاسىندا جۇرگەندەر جەلىدە جەلپىنگەندەردى, تيك-توكتا تانىلعانداردى قابىلداپ, قولىن الاردا مۇقيات بولعانى ءجون. سەبەبى جىلتىراعاننىڭ ءبارى التىن ەمەس. جاستارىمىزدىڭ ماڭگۇرتتەنىپ, ساناسىنىڭ ۋلانۋى, ۇلتتىق دەگراداتسياعا ۇشىراۋىنىڭ ءبىر تامىرى وسىندا جاتىر. اۋمەسەر ءانشى مەن ەسەرسوق اكتەرلەردىڭ ءبارىن مەملەكەتتىك دەڭگەيدە «ماراپاتتايتىن» بولساق, «تۇلعا» بولۋدىڭ جولى وسى ەكەن دەپ ۇعىناتىن جاستار دا سولار سالىپ جۇرگەن سوراقىلىقتىڭ جولىن تاڭدايتىنى اششى دا بولسا اقيقات.
