ماقتاارال اۋداندىق سپورت جانە دەنە شىنىقتىرۋ جانە سپورت ءبولىمىنىڭ, اۋداندىق «جاستار رەسۋرستىق ورتالىعى» كمم-ءنىڭ جانە «مىرزاكەنت» بالىقشىلار قاۋىمداستىعىنىڭ ۇيىمداستىرۋىمەن الماتى, جامبىل, قىزىلوردا, تۇركىستان وبلىستارىنىڭ قالالارى مەن اۋداندارىنان جانە شىمكەنت قالاسىنان كەلگەن 100-گە جۋىق بالىقشى 37 كومانداعا ءبولىنىپ, 3 كۇن بويى سىنعا ءتۇستى.
«قازىرگى زاماندا كۇيزەلىسكە ءجيى ۇشىرايتىن ادامدار كوپ. شارشاعانىڭدى باسىپ, كۇيزەلىسىڭدى جەڭۋگە كومەكتەسەتىن, ءومىر سۇرۋگە دەگەن قۇلشىنىسىڭدى ارتتىراتىن دەمالىستىڭ ءارى سپورتتىڭ ەرەكشە ءتۇرى – بالىق اۋلاۋ. تازا اۋادا, تۇنىق سۋدىڭ بويىندا جۇيكەڭ دەمالىپ, يممۋنيتەتىڭ ارتاتىنىن دارىگەرلەر دە مويىندايدى. سوندىقتان, ماقتاارال اۋدانى اكىمدىگىنىڭ اتىنان بالىقشىلار قاۋىمداستىعىمەن بىرلەسىپ, وسى ۇلكەن ءىس-شارانى وتكىزۋدى قولعا الدىق», دەدى اۋداندىق ءماسليحاتتىڭ دەپۋتاتى سۇندەت كەنجەباەۆ.
ۇيىمداستىرۋشىلار «شاردارا» سۋ قويماسى بالىق اۋلاۋعا ەڭ قولايلى سۋ ايدىندارىنىڭ ءبىرى ەكەنىن اتاپ ءوتتى. ويتكەنى اتالعان سۋ قويماسى – ماقتاارال, جەتىساي, شاردارا, كەلەس اۋداندارىنىڭ اراسىندا ورنالاسقان ءارى ەلىمىزدەگى ەڭ ۇلكەن 3-ءشى سۋ قويما سانالادى. سونداي-اق جىلى ايماقتا ورنالاسقاندىقتان, بالىق شارۋاشىلىعىنا دا وتە قولايلى.
جارىستىڭ شارتى بويىنشا ءار كوماندا 3 ادامنان قۇرالدى. ءبىر كوماندادا 6 قارماققا دەيىن پايدالانۋعا رۇقسات بەرىلدى. قايىقپەن بالىق الۋلاۋعا تىيىم سالىندى. جارىسقا سپيرتتىك ىشىمدىك الىپ بارعان كوماندالار بىردەن ويىننان شىعارىلدى.
22-24 مامىر ارالىعىندا وتكەن جارىس ناتيجەسىندە 4-ورىندى «رينات» كومانداسى, 3-ورىندى «ابيش» كومانداسى, 2-ورىندى «سابىر» كومانداسى جەڭىپ الدى. ال 1-ورىندى «ابدۋل-قاسىم» كومانداسى يەلەنىپ, رەسپۋبليكالىق بالىق اۋلاۋ جارىسىنىڭ چەمپيونى اتاندى.
سونىمەن قاتار قارماقتى ۇزاق قاشىقتىققا لاقتىرۋ بويىنشا جانە «العاشقى بالىق», «ۇلكەن بالىق» نوميناتسيالارى بويىنشا دا ارنايى ورىندار بەرىلدى.
