پارلامەنت • 26 مامىر، 2022

قازاقستان ارمەنياعا مۇناي ونىمدەرىن ساتادى

34 رەت كورسەتىلدى

پارلامەنت سەناتىندا ارمەنيا رەسپۋبليكاسىنا مۇناي ونىمدەرىن ساتۋ جونىندەگى ساۋدا-ەكونوميكالىق ىنتىماقتاستىق كەلىسىمى راتيفيكاتسيالاندى، دەپ حابارلايدى Egemen.kz.

ەنەرگەتيكا ۆيتسە-ءمينيسترى اسەت ماعاۋوۆتىڭ ايتۋىنشا، ەۋرازيا ەكونوميكالىق وداق مۇشەلەرى اراسىنداعى مۇناي جانە مۇناي ونىمدەرىن جەتكىزۋ 2014 جىلعى 29 مامىرداعى ەاەو تۋرالى شارتقا سايكەس جەكەلەگەن ەكىجاقتى كەلىسىممەن رەتتەلەدى.

2020 جىلعى 16 شىلدەدە نۇر-سۇلتان قالاسىندا ارمەنيا رەسپۋبليكاسىنا مۇناي ونىمدەرىن بەرۋ بويىنشا ساۋدا-ەكونوميكالىق ىنتىماقتاستىق كەلىسىمىنە قول قويىلعان.

«كەلىسىمگە سايكەس تاراپتار ارمەنياعا جەتكىزۋگە رۇقسات ەتىلگەن تاۋارلار تىزبەسىن بەكىتەدى. بۇدان ءارى تاراپتاردىڭ ۆەدومستۆولارى ءتيىستى حاتتاما جاسايدى. سوندىقتان ەگەر قانداي دا ءبىر مۇناي ونىمدەرى رۇقسات ەتىلگەن تىزىمگە كىرمەسە، وندا تاۋارلاردى اكەتە المايدى. بۇدان باسقا تاراپتاردىڭ قۇزىرەتتى ورگاندارى جىل سايىن 1 جەلتوقسانعا دەيىن قازاقستان مەن رەسەيدەن ارمەنياعا تاۋار ءوندىرۋ، ىشكى تۇتىنۋ، يمپورتتاۋ جانە ەكسپورتتاۋ بالانسىن جاسايدى، ياعني ينديكاتيۆتى بالانس. رەسەيدىڭ ارمەنياعا مۇناي ونىمدەرىن نەگىزگى جەتكىزۋشى ەكەنىن ەسكەرە وتىرىپ، قازاقستاندىق ونىمدەردى ىقتيمال جەتكىزۋ قالدىق ءپرينتسيپى بويىنشا ايقىندالادى. بۇل كەلىسىمدە تاراپتاردىڭ ينديكاتيۆتىك بالانسىندا كوزدەلگەن كولەمنەن تىس جەتكىزۋگە تىيىم بار»، دەدى ەنەرگەتيكا ۆيتسە-ءمينيسترى.

ەۋرازيا ەكونوميكالىق وداق ەلدەرى اراسىنداعى ساۋدا ەكسپورتتىق كەدەن باج سالىعىن تولەمەي، كەدەن باقىلاۋىنسىز جۇرگىزىلەدى. كەلىسىمدە مۇناي ونىمدەرى ساۋداسىنىڭ ءىس جۇزىندەگى ەرەكشە رەجيمى بەلگىلەنگەن جانە قازاقستاننان ارمەنياعا مۇناي ونىمدەرىن اكەتۋ كەزىندەگى باقىلاۋ تەتىكتەرى قامتىلعان.

«وسىنداي تەتىكتەر ارتىق مۇناي ونىمدەرىن ارمەنيانىڭ نەعۇرلىم باسىم نارىعىنا وتكىزۋگە مۇمكىندىك بەرەدى. بۇل مۇناي ونىمدەرىنىڭ ىشكى تەڭگەرىمىنە وڭ اسەر ەتەدى جانە قازاقستاننىڭ شارۋاشىلىق جۇرگىزۋشى سۋبەكتىلەرىنىڭ ءتۇسىمىن ارتتىرادى، سونداي-اق قازاقستاننان مۇناي ونىمدەرىن اكەتۋدى رەتتەيدى جانە ىشكى نارىقتى قورعايدى. جەتكىزۋ شارتتارىن كاسىپكەرلەر ءوزارا كەلىسىم بويىنشا دەربەس انىقتايتىنىن اتاپ وتكەن ءجون»، دەدى ءا. ماعاۋوۆ.

ەكسپورت بويىنشا مامىلە شەتەل ۆاليۋتاسىندا، ادەتتە اقش دوللارىندا جاسالادى. سوندىقتان قانداي دا ءبىر تاۋەكەلدەر بولجانبايدى.

سوڭعى جاڭالىقتار

بۇعىبۇلاۋ

قازاقستان • كەشە

جۇزە ءبىلۋ – ءومىر

قوعام • كەشە

ولكەتانۋشى

قازاقستان • كەشە

كەبەنەك

تاريح • كەشە

ساۋكەلە

ونەر • كەشە

ۇقساس جاڭالىقتار