«سانداردى سويلەتەتىن بولساق, جول-كولىك وقيعالارى سالدارىنان بالالاردىڭ ايتارلىقتاي زارداپ شەگەتىنىن كورۋگە بولادى. ماسەلەن, جىل سايىن 200-گە جۋىق ءجاسوسپىرىم جول ۇستىندە باقيلىق بولىپ, 3 مىڭنان استامى ءتۇرلى دارەجەدەگى دەنە جاراقاتىن الىپ جاتادى. بەلگىلى سەبەپتەرمەن وتكەن جىلدان باستاپ مەكتەپ وقۋشىلارىنا جولداعى قاۋىپسىزدىك تۋرالى ساباقتار وتكىزىلگەن جوق. بۇل باعىتتاعى باسقا ءىس-شارالار سانى دا ازايىپ كەتتى. سول سەبەپتى دە ستاتيستيكا وڭالماي تۇر», دەدى ج.مۇراتاليەۆ.
وسى جىلداعى ەسەپتى مەرزىمنىڭ وزىندە جول-كولىك وقيعالارى سالدارىنان جاراقات العان جاسوسپىرىمدەردىڭ سانى از ەمەس. كوپ جاعدايدا بالالاردىڭ وزدەرى ەرەجە ساقتامايتىن كەزدەر ءجيى ۇشىراسادى.
«وسى جىلدىڭ ءتورت ايىندا كامەلەت جاسىنا تولماعان جاسوسپىرىمدەردىڭ كىناسىنەن 35 جول-كولىك وقيعاسى تىركەلدى. سالدارىنان 4 ءجاسوسپىرىم جول اپاتىنان قايتىس بولىپ, 70 جەتكىنشەك ءتۇرلى دارەجەدە جاراقات الدى. ەسەپتى كەزەڭدە رەسپۋبليكا جولدارىندا جاسوسپىرىمدەردىڭ قاتىسۋىمەن جالپى سانى 796 جول-كولىك وقيعاسى تىركەلگەن. جول-كولىك اپاتىنان 42 ءجاسوسپىرىم ومىرىمەن قوش ايتىسسا, 957-ءسى جاراقات العان. زارداپ شەككەن بالالاردىڭ جارتىسىنان استامى جولاۋشىلار بولسا, قالعانى – جاياۋ جۇرگىنشىلەر», دەيدى مينيسترلىك وكىلى.
ءىىم وكىلىنىڭ مالىمدەۋىنشە, بالالاردىڭ قاتىسۋىمەن بولاتىن جول-كولىك وقيعالارى كەزىندە ەرەسەكتەر دە ءجيى قاتەلىكتەر جاسايدى. اسىرەسە, ولار اۆتوكولىكپەن تاسىمالداۋ ەرەجەلەرىن ءجيى بۇزادى ەكەن. بالالارعا ارنالعان ارنايى قۇرال-جابدىقتاردى (اۆتو كرەسلو, بۋستەرلەر, اداپتەرلەر) قولدانبايدى نەمەسە جاسوسپىرىمگە قاۋىپسىزدىك بەلدىگىن تاقپايدى.
«جىل باسىنان بەرى ەلىمىزدە 97 كامەلەتكە تولماعان جاياۋ جۇرگىنشىنى قاعىپ كەتۋ دەرەگى تىركەلدى. سونىڭ سالدارىنان 5 بالا مەرت بولىپ, 97 ءجاسوسپىرىم جاراقات الدى», دەيدى مينيسترلىك وكىلى. سونىمەن قاتار ول ءوز سوزىندە پوليتسيا ورگاندارىنىڭ قىزمەتكەرلەرى بۇل باعىتتاعى ولقىلىقتاردى بولدىرماۋ جولىندا ءتۇرلى ءىس-شارالار وتكىزۋدى قولعا العانىن, الداعى ۋاقىتتا بۇل باعىتتاعى جۇمىستار ساتىمەن جالعاساتىنىن اتاپ ءوتتى. بريفينگتە ج.مۇراتاليەۆ جاياۋ جۇرگىنشىلەردىڭ كىناسىنەن بولاتىن جول-كولىك وقيعالارىنىڭ دا ازايماي تۇرعانىن دا اتاپ ءوتتى.
«جاياۋ جۇرگىنشىلەردىڭ كىناسىنەن بولاتىن جول-كولىك وقيعالارى دا جەتكىلىكتى. جولدى ءجۇرۋ بولىگى بەلگىلەنبەگەن جەردەن كەسىپ ءوتۋ, جاقىنداپ قالعان كولىكتىڭ الدىنان جۇگىرىپ شىعۋ, باعدارشامعا قاراماي وتە شىعۋ سەكىلدى ەرەجە بۇزۋشىلىقتىڭ سالدارىنان دا قايعىلى وقيعالار ورىن الىپ جاتادى. ۇلكەندەر جاعى وسى ماسەلەگە ايرىقشا نازار اۋدارسا ەكەن», دەدى جاندوس مۇراتاليەۆ ءوز ويىن تۇيىندەپ.
