اقمادي سارباسوۆ وزبەكستاندا ءوتىپ جاتقان «ورتالىق ازياداعى ەكونوميكالىق دامۋ ءۇشىن ءتيىمدى باسقارۋ» حالىقارالىق كونفەرەنتسياسى بارىسىندا جۇمىسپەن قامتۋدىڭ ستاندارتتى ەمەس تۇرلەرىنىڭ كوبەيۋى بايقالعانىن اتاپ وتكەن.
ۆيتسە-ءمينيستردىڭ مالىمەتىنشە, 10 جىل ىشىندە الەمدە تسيفرلىق ەڭبەك پلاتفورمالارىنىڭ سانى 5 ەسە وسكەن. پلاتفورمالىق جۇمىسپەن قامتۋ كوپتەگەن ادام ءۇشىن اقشا تابۋدىڭ جانە كاسىبي دامۋدىڭ ناقتى ادىسىنە اينالۋدا.
«جاھاندىق كومپانيالاردىڭ 40%-ى ءوز جۇمىسىندا فريلانسەرلەر سانىن ارتتىرۋدى جوسپارلاپ وتىر. ال قازاقستاندا, ءبىزدىڭ باعالاۋىمىز بويىنشا, بۇگىندە 300 مىڭعا جۋىق فريلانسەر جۇمىس ىستەيدى», دەدى ا. سارباسوۆ.
سپيكەر بىرقاتار جاڭا ستراتەگيالىق باستامانى دا ۇسىندى. ول حالىقتىڭ تابىسىن 2025 جىلعا قاراي 27%-عا ارتتىرۋ جونىندەگى مىندەتتەردى شەشۋگە كومەكتەسۋى ءتيىس. جالپى باستامالار 4 باعىتتا ىسكە اسىرىلادى:
– وقىتۋ جانە قايتا دايارلاۋ ارقىلى جۇمىس كۇشىنىڭ ساپاسىن ارتتىرۋ;
– زاڭنامالىق رەتتەۋ ارقىلى ەڭبەك نارىعىن ىرىقتاندىرۋ جانە جۇمىستىڭ يكەمدى تۇرلەرىمەن قامتىلعان قىزمەتكەرلەردى الەۋمەتتىك قورعاۋدى قامتاماسىز ەتۋ;
– حالىققا كورسەتىلەتىن قىزمەتتەردىڭ ساپاسىن ارتتىرۋ ءۇشىن ەڭبەك نارىعىنىڭ ينفراقۇرىلىمىن دامىتۋ;
– ەڭبەك نارىعىنىڭ تسيفرلىق ەكوجۇيەسىن قۇرۋ ارقىلى قىزمەتتەردى اۋقىمدى تسيفرلاندىرۋ.
