قازاقستان شاحمات فەدەراتسياسى جانە «دەبيۋت» شاحمات مەكتەبىنىڭ باستاۋىمەن وتكەن جارىس اقتاۋدا ءۇشىنشى جىل قاتارىنان ۇيىمداستىرىلىپ وتىر.
- چەمپيوناتتىڭ قاتىسۋشىلارى 9 تۋر وينادى. ءار تۋردا ويىنشىلارعا ويلانۋ ءۇشىن 90 مينۋت بەرىلدى جانە ءار جۇرىستەن كەيىن تاعى 30 سەكۋند قوسىلىپ وتىردى. ورتا ەسەپپەن ءار ويىن 4 ساعاتقا سوزىلدى, - دەدى «دەبيۋت» شاحمات مەكتەبىنىڭ ديرەكتورى انۆار شايحىموۆ.
قر چەمپيوناتىنىڭ جارتىلاي فينال قورىتىندىسى بويىنشا ەرلەر اراسىندا شىمكەنت قالاسىنىڭ شاحماتشىسى, فيدە شەبەرى ابىلقايىر ءابىلمانسۇر 1-ورىن السا, 2-ورىندى پاۆلودار قالاسىنىڭ سپورتشىسى, شاحماتتان حالىقارالىق سپورت شەبەرى كونستانتين كازاكوۆ, ال قولا جۇلدەنى اقتوبە قالاسىنىڭ سپورتشىسى, شاحماتتان حالىقارالىق سپورت شەبەرى ارىستانبەك ۇرازاەۆ ەنشىلەدى.
ال, ماڭعىستاۋ وبلىسىنان قاتىسقان 12 جاسار ەدگار مامەدوۆ 7 جانە 11 ورىن ارالىعىنداعى ەرەكشە ناتيجە كورسەتتى.
ايەلدەر اراسىندا 1-ورىندى شىمكەنت قالاسىنىڭ شاحماتشىسى سۇلتانبەك زەينەپ, 2-ورىندى الماتى وبلىسىنان كەلگەن قالياحمەت ەلناز السا, 3-ورىن قاراعاندى قالاسىنىڭ سپورتشىسى پاپاندوپۋلو كريستيناعا بۇيىردى.
«دەبيۋت» شاحمات مەكتەبىنىڭ ديرەكتورى انۆار شايحىموۆتىڭ ايتۋىنشا جۇلدەلى ورىندارعا يە بولعان التى شاحماتشى قازان ايىندا اقتاۋ قالاسىندا وتەتىن سۋپەرفينالعا جولداما ۇتىپ الدى.
- ماڭعىستاۋ وبلىسى شاحماتتان ەل بىرىنشىلىگىنىڭ جارتىلاي فينالىن ءۇشىنشى رەت قابىلداپ جاتىر. قر چەمپيوناتىنىڭ فينالىن وتكىزۋ قۇقىعى دا بىزگە بۇيىرىپ وتىر. فينالدا باسەكەلەستىك جوعارى دەڭگەيدە بولادى. سەبەبى ەلىمىزدىڭ ەڭ مىقتى دەگەن شاحمات شەبەرلەرى كەلەدى, - دەدى انۆار شايحىموۆ.
