سۋرەتتى تۇسىرگەن ەرلان ومار, «ەQ»
ءبىلىم جانە عىلىم مينيسترلىگى «تۇلەك-2022 – جاڭا قازاقستاننىڭ ەرتەڭى» ءبىتىرۋ ءىس-شارالارىن وتكىزۋ بويىنشا ۇسىنىستار دايىندادى. بۇل تۋرالى مەكتەپكە دەيىنگى جانە ورتا ءبىلىم كوميتەتىنىڭ ءتورايىمى گۇلميرا كارىموۆا:«سوڭعى قوڭىراۋ – مۇعالىمدەر مەن وقۋشىلار وقۋ جىلىنىڭ قورىتىندىسىن شىعارىپ, ءبىلىم الۋشىلاردىڭ جەتىستىكتەرىن اتاپ وتەتىن كوڭىلدى ءارى ماڭىزدى وقيعا. بيىل ەپيدەميالىق جاعداي مەكتەپپەن قوشتاسۋ مەرەكەسىن وتكىزۋگە مۇمكىندىك بەرىپ تۇر. الايدا بۇل مىندەتتى تۇردە مەكتەپ قابىرعاسىندا ۇيىمداستىرىلۋى كەرەك. ءبىلىم بەرۋ ۇيىمدارى بارلىق قاجەتتى ۇسىنىس پەن نۇسقاۋدى الدى. 2022 جىلى ەلىمىزدە 3,5 ملن-نان اسا وقۋشى ءۇشىن سوڭعى قوڭىراۋ سوعىلادى. بيىل «التىن بەلگى» توسبەلگىسىنە 8 139 تۇلەك ۇمىتكەر بولىپ وتىر. تاعى قوسا كەتەرىم, جىل سايىن 1 قىركۇيەك نەمەسە 25 مامىر قارساڭىندا قوعامدا «مۇعالىمگە گۇل سىيلاۋعا بولا ما جانە بۇل زاڭ بۇزۋشىلىق بولىپ سانالماي ما؟» دەگەن سۇراق تۋادى. ءبىزدىڭ ايتارىمىز: ءيا, بولادى. بۇل جاقسى ءداستۇر عوي», دەدى.
مينيسترلىكتىڭ مالىمدەۋىنشە, رەسپۋبليكانىڭ بارلىق جالپى ءبىلىم بەرەتىن مەكتەبىندە سوڭعى قوڭىراۋ مەرەكەسىن ءبىر مەزگىلدە وتكىزۋ جوسپارلانعان. وعان وقۋ وشاعىنىڭ پەداگوگيكالىق ۇجىمى, تۇلەكتەر جانە ولاردىڭ اتا-انالارى, پەداگوگ ارداگەرلەر, قامقورشىلىق كەڭەس مۇشەلەرى, دەمەۋشى ۇيىمدار, ءبىلىم جانە عىلىم مينيسترلىگى مەن وبلىستار, نۇر-سۇلتان, الماتى, شىمكەنت قالالارى ءبىلىم باسقارمالارىنىڭ وكىلدەرى, ءبىلىم بولىمدەرى, مۇددەلى مەملەكەتتىك ورگاندار جانە ت.ب. قاتىسا الادى.
