سپورت • 24 مامىر، 2022

تەننيسشى الان قۇرمانعاليەۆ الدىنا جان سالمادى

58 رەت كورسەتىلدى

پولشانىڭ ۆلاديسلاۆوۆو قالاسىندا ۇستەل تەننيسىنەن وتكەن WTT Youth Contender اتتى حالىقارالىق تۋرنيردە قاراعاندىلىق شەبەر الان قۇرمانعاليەۆ قارسىلاستارىن قوعاداي جاپىرىپ، چەمپيون اتاندى، دەپ جازادى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.

الەمنىڭ 33 ەلىنەن 260-تان استام تەننيسشى باق سىناعان دودادا ول U-15 جاس ساناتى بويىنشا ونەر كورسەتىپ، جەتى بىردەي قارسىلاسىن قاپى قالدىردى. ال فينالدىق جەكپە-جەكتە الان فرانتسۋز  سپورتشىسى انتۋان نۋارونى 3-1 ەسەبىمەن تىزە بۇكتىردى.

قازاقستان ۇستەل تەننيسى فەدەراتسياسىنىڭ پرەزيدەنتى دانيار ابىلعازين جاس دارىننىڭ بۇل تۋرنيردەگى تولايىم تابىسىنىڭ كەزدەيسوقتىق ەمەس ەكەنىن اتاپ ءوتتى.

– ءبىز مۇنى حالىقارالىق رەيتينگتىك تۋرنيرلەردەگى وراسان زور ەڭبەك پەن تۇراقتى ونەر كورسەتۋدىڭ زاڭدى ناتيجەسى رەتىندە قاراستىرامىز. سوڭعى كەزەڭدە الان ITTF حالىقارالىق تۋرنيرلەرىندە ءارتۇرلى دارەجەدەگى 13 مەدالدى جەڭىپ الدى جانە 15 جاسقا دەيىنگى سپورتشىلار اراسىندا الەمدىك رەيتينگتە ءبىرىنشى ورىندا كەلەدى. الان قۇرمانعاليەۆ پەن جاتتىقتىرۋشى ەلميرا اليەۆانى شىن جۇرەكتەن قۇتتىقتايمىن جانە ولارعا حالىقارالىق سپورت ارەناسىندا جاڭا  جەڭىستەر تىلەيمىن، – دەپ قۇتتىقتادى ول تەننيسشى مەن ونىڭ باپكەرىن.

ەسكە سالار بولساق، بۇدان بۇرىن الان قۇرمانعاليەۆ ءدال وسى تۋرنيردە U-17 جاس ساناتىندا سىنعا ءتۇسىپ، تەك فينالدا وڭتۇستىككورەيالىق تەننيسشى چجۋن سۋنعا عانا ەسە جىبەرگەن بولاتىن.

سوڭعى جاڭالىقتار

دوللار باعامى ءوستى

قارجى • بۇگىن، 16:12

ۇقساس جاڭالىقتار