«قازاق جۋرناليستيكاسىن زەرتتەۋدەگى تاريحي ديسكۋرس پەن جاڭا كوزقاراس» تاقىرىبىنا ارنالعان رەسپۋبليكالىق عىلىمي-ادىستەمەلىك كونفەرەنتسيانى جۋرناليستيكا فاكۋلتەتىنىڭ دەكانى سانسىزباي ماديەۆ جۇرگىزىپ, تۇركىتانۋشى, فيلولوگيا عىلىمدارىنىڭ كانديداتى امانقوس مەكتەپ-تەگى «حايىرجان بەكحوجين جۋرناليستيكا تاريحىن زەرتتەۋشىلەردىڭ ءىزاشارى» تاقىرىبىندا جاساعان بايانداماسىمەن جالعاستىردى.
قازاق جۋرناليستيكاسى تاريحىن زەرتتەۋدە جاڭاشا كوزقاراس تانىتقان ح.بەكحوجيندەي عالىمنىڭ ەڭبەكتەرىن سارالاۋدا ءباسپاسوزدىڭ تاريحىنا قاتىستى جازعاندارىن جۇيەلى پايدالانۋ قاجەتتىگى تۋرالى فيلولوگيا عىلىمدارىنىڭ دوكتورى, پروفەسسور نامازالى وماشەۆ ويلارىن ورتاعا سالا وتىرىپ, «حايىرجان بەكحوجين – قازاق جۋرناليستيكاسىنىڭ تاريحىن عىلىمي-مەتودولوگيالىق تۇرعىدان زەرتتەگەن العاشقى عالىم» اتتى بايانداماسىندا عالىم ەڭبەكتەرىنىڭ ادىستەمەلىك جاعىنا ءمان بەردى.
جيىن بارىسىندا سونىمەن قاتار فيلولوگيا عىلىمدارىنىڭ دوكتورى, پروفەسسور د.ىسقاق ۇلى, فيلولوگيا عىلىمدارىنىڭ كانديداتى, ونەرتانۋشى س.مەدەۋبەك ۇلى, كينوتانۋشى, ت.جۇرگەنوۆ اتىنداعى قازاق ۇلتتىق ونەر اكادەمياسى كينو تاريحى مەن تەورياسى كافەدراسىنىڭ مەڭگەرۋشىسى, PhD ب.باۋىرجان ۇلى, جۋرناليستيكا فاكۋلتەتىنىڭ اعا وقىتۋشىسى ل.نودا, ساياسي عىلىمدار دوكتورى, پروفەسسور, ءباسپاسوز جانە ەلەكتروندى باق كافەدراسىنىڭ مەڭگەرۋشىسى گ.سۇلتانباەۆا عالىمنىڭ عىلىمي مۇراسىنا تالداۋ جاسادى.
كونفەرەنتسيادا جاس عالىمدار مەن ستۋدەنتتەر اراسىندا ۇيىمداستىرىلعان «ح.بەكحوجيننىڭ ءومىرى مەن شىعارماشىلىعىنا ارنالعان ەڭ ۇزدىك مۋلتيمەديالىق جوبا», «ەڭ ۇزدىك عىلىمي جوبا», «ەڭ ۇزدىك پۋبليتسيستيكا» اتالىمدارى بويىنشا جەڭىمپازدار ماراپاتتالدى.
ءىس-شارا بارىسىندا عالىمنىڭ ديسسەرتاتسيالىق ەڭبەكتەرىن عىلىمي اينالىمعا ەنگىزۋ ماقساتىندا تسيفرلى فورماتقا كوشىرىلىپ, ەڭبەكتەرىن وقۋ ۇردىسىنە ەنگىزۋ, سونداي-اق ەلىمىز وڭىرلەرىندە جۋرناليستيكا سالاسىندا ءبىلىم الىپ جۇرگەن بۇقارالىق كوممۋنيكاتسيا وكىلدەرىن تارتۋ تۋرالى قارار قابىلداندى.
الماتى
