تاۋەلسىز مەملەكەتىمىزدىڭ قادالعان ءار ۋىعى ىسپەتتەس جاس ۇرپاقتىڭ ادامگەرشىلىك-رۋحاني جاعىنان دامۋى مەن وي-ساناسىنىڭ دۇرىس قالىپتاسۋى جولىندا يگى جۇمىستار اتقارىپ جاتقان Bolashaq سارايىندا بالالار مەن جاسوسپىرىمدەر ءبىلىم-عىلىم ارقىلى ار-وجدان, ادەپتىلىك پەن جاۋاپكەرشىلىك, جالپىادامزاتتىق جانە ۇلتتىق قۇندىلىقتار اراسىنداعى ۇلى مۇراتتار رۋحىندا تاربيە الادى.
قازىرگى تاڭدا بۇل ۇجىمدا سپورت, مەديا, شىعارماشىلىق, عىلىمي-ينتەللەكتۋالدىق, ءىت باعىتتارى بويىنشا 3 500-دەن استام بالا 120 ءتۇرلى ۇيىرمەدە ءوز تاڭداۋلارى ارقىلى ءبىلىم-قابىلەتتەرى مەن سالاماتتى ءومىر سالتىن جەتىلدىرۋدە.
ىستىق ۇيادا ەڭبەك ەتىپ جاتقان ۇيىمشىل ۇجىم قالا مەن وبلىستىڭ قوعامدىق ومىرىنە بەلسەنە اتسالىسىپ, ءار ءتۇرلى مادەني, الەۋمەتتىك, عىلىمي-پراكتيكالىق ءىس-شارالاردى وتكىزۋ, ەلىمىزدىڭ تانىمال تۇلعالارىمەن جۇزدەسۋ الاڭىنا اينالدى. وبلىس اكىمى ەرمەك مارجىقپاەۆ Bolashaq سارايىنىڭ جاس شاكىرتتەرى «روبووليمپ» حالىقارالىق بايقاۋىنىڭ يەگەرى تالعات ماقسات جانە Euro Stars حالىقارالىق ونەر فەستيۆالىنىڭ جەڭىمپازى ياسمينا قۋاتپەن بىرگە بالالار جىلىنىڭ باستاۋ باتىرماسىن باسىپ, وبلىس بويىنشا بالالار مەن جاسوسپىرىمدەردىڭ ءبىلىمى مەن قابىلەتتەرىن ودان ءارى شىڭداۋعا قادام جاسالعانىن جەتكىزدى.
بالالار جىلىنىڭ باستاۋ الۋىنىڭ اياسىندا تۇڭعىش رەت وبلىستىق JasSkills اqmola-2022 چەمپيوناتى ۇيىمداستىرىلىپ, 120-دان استام قاتىسۋشىنىڭ ءبىلىمى مەن بىلىكتىلىگىنە جوعارى باعا بەرىلدى. وسى ءۇردىس ءوز جالعاسىن تاۋىپ, جاس ۇرپاقتىڭ پاراساتتى جانە شىعارماشىلىق الەۋەتى شىڭدالىپ, ساناسى جاڭا ساپالىق دامۋ ساتىسىنا كوتەرىلەدى دەگەن سەنىمدەمىز. تەحنيكالىق, ءىت, عىلىم باعىتىنداعى ۇيىرمەلەر ءبىلىم الۋشىلارىنا ايرىقشا كوڭىل ءبولىپ, ولاردى بيزنەس قاۋىمداستىعى دا قولدايتىن بولسا, ءبىر-ەكى جىلدا وسى كاسىپورىنعا دايىن جاس كاسىبي ماماندار پايدا بولادى.
بالالار جىلىنىڭ اياسىندا شىعارماشىلىق باعىتى بويىنشا «ۇكىلى دومبىرا» ۇيىرمەسى حالىقارالىق ونەر بايقاۋىنىڭ, Bolashaq بي ءانسامبلى قازمەديا ورتالىعىندا وتكەن «ارەنا تانتسەۆ» حالىقارالىق كونكۋرس-فەستيۆالىنىڭ, Diamond بي ءانسامبلى «جۇلدىزعا قادام» حالىقارالىق كوپجانرلى بايقاۋىنىڭ جەڭىمپازدارى اتاندى. ال «جۇلدىزدار» ۇلگىلى ۆوكالدىق ستۋدياسىنىڭ «ۇلگىلى» اتاعى, «گۇلدەر» حالىق بي ءانسامبلىنىڭ «حالىقتىق» اتاعى تاعى ءبىر مارتە راستالدى. ونىڭ ءبارى جەتەكشىلەر مەن شاكىرتتەردىڭ قاجىرلى ەڭبەگىنىڭ ناتيجەسى.
احمەت بايتۇرسىن ۇلىنىڭ 150 جىلدىعىنا ارنالعان «رۋح ساۋلەسى – اقىن سوزىندە» اتتى العاشقى وبلىستىق جاس اقىندار ايتىسى ءوتىپ, جاس دارىنداردىڭ تانىمى مەن پاراساتىن, ءبىلىمى مەن تاعىلىمدى تاربيەسىن, بىرلىگى مەن ىنتىماعىن ودان سايىن شىڭداي ءتۇستى.
تالاي بايراقتى باسەكەدە دەس بەرمەگەن ۇجىمنىڭ ەل نامىسىن قورعاپ جۇرگەن جاس بالۋانى, ەركىن جانە گرەك-ريم كۇرەسىنەن 3 دۇركىن ەل چەمپيونى الديار بالتاشەۆ برازيليادا وتكەن سۋرداليمپيادادا قولا جۇلدەنى قانجىعاسىنا بايلاپ, كوك تۋىمىزدى تاعى ءبىر جەلبىرەتىپ, سوڭىنان ەرگەن ءىنى-قارىنداستارىن قاناتتاندىردى, ەل مەرەيىن اسىردى.
بالالاردىڭ سالاماتتى ءومىر سالتىن جەتىلدىرۋ, ولاردىڭ جازعى دەمالىستارىن دۇرىس باعىتتا وتكىزىپ تانىم-قابىلەتتەرىن شىڭداۋ ماقساتىندا بالالاردى قورعاۋ كۇنى زەرەندى اۋدانىندا ورنالاسقان Bolashaq سارايى جانىنداعى «سۇڭقار» ساۋىقتىرۋ كەشەنىندە جازعى لاگەردىڭ اشىلۋى بالالار جىلىنداعى ەرەكشە باستاما بولماق. لاگەردە بالالار ءۇشىن دەمالىس-ساۋىقتىرۋ شارالارى عانا ەمەس, سونىمەن قاتار شىعارماشىلىق, عىلىمي جانە تەحنيكا باعىتىندا ىزدەنۋلەرىنە, قوسىمشا ءبىلىم الۋلارىنا بارلىق جاعداي جاسالماق.
بالالاردى قورعاۋ كۇنى مەن كەڭەس وداعىنىڭ باتىرى, جەرلەسىمىز تالعات بيگەلدينوۆتىڭ 100 جىلدىعىنا وراي ارنايى وتەتىن ءىت باعىتىنداعى اۆيامودەلدەۋ جوباسى تىڭ سەرپىلىس بەرىپ, وڭ كوزقاراس قالىپتاستىراتىنىنا كامىل سەنەمىز. ال «جاس عالىمداردىڭ زەرتتەۋلەرى» اتتى عىلىمي-پراكتيكالىق كونفەرەنتسيا ارامىزدان كوپتەگەن ويى ۇشقىر, زەرەك, ينتەللەكتۋالدى جاس عالىمداردىڭ شىعۋىنا نەگىز بولارى انىق.
ءبىزدىڭ ۇجىم از ۋاقىتتىڭ ىشىندە ۇلتتىق رۋحتى جاس ۇرپاقتىڭ بويىنا ءسىڭىرىپ, قازاقستاندىق پاتريوتيزم ارقىلى ءبىلىم الۋعا جەتەلەيتىن, ولاردى جاۋاپتى دا ءبىلىمدى, ورەسى بيىك, مادەنيەتتى, ۇيلەسىمدى ازامات ەتىپ قالىپتاستىرۋعا جاعداي جاسايتىن ورىنعا اينالىپ وتىر.
ايناگۇل بالتاشەۆا,
Bolashaq سارايىنىڭ باسشىسى
كوكشەتاۋ
