ءماجىلىس دەپۋتاتتارى ەلنۇر بەيسەنباەۆ پەن ءمادي احمەتوۆتىڭ الماتى قالاسىنداعى ەلىمىزدەگى جەتەكشى جوعارى وقۋ ورىنداردىڭ ءبىرى قازاق باس ساۋلەت-قۇرىلىس اكادەمياسىنىڭ ۇجىمى جانە ستۋدەنتتەرىمەن كەزدەسۋى كەزىندە وسىنداي ويلار ايتىلدى. كەزدەسۋ كەزىندە دەپۋتاتتار مەملەكەت باسشىسى ۇسىنعان ساياسي رەفورمالار, كونستيتۋتسياعا ەنگىزىلگەن تۇزەتۋلەر تۋرالى جان-جاقتى ءتۇسىندىرىپ ءوتتى.
«كونستيتۋتسيا – كەز كەلگەن مەملەكەتتىڭ ىرگەتاسى. قازىرگى قوعامدا وزگەرىستەر ۇلكەن سۇرانىسقا يە. رەفەرەندۋم وتەتىن كۇنگە از عانا ۋاقىت قالدى. ءاربىر ازامات ەل دامۋىنىڭ جاڭا كەزەڭىن قالىپتاستىرۋعا قاتىسىپ, ۇلەسىن قوسۋعا مۇمكىندىك تۋدى», دەدى ەلنۇر بەيسەنباەۆ. ە.بەيسەنباەۆ ستۋدەنتتەردىڭ سۇراقتارىنا جاۋاپ بەرە كەلە, بۇگىندە قوعامدا قىزۋ تالقىلانىپ جۇرگەن ساياسي رەفورمالار كوپتەگەن جىل بويى قالىپتاسقان قوعامنىڭ سۇرانىسىنان تۋىنداعان اۋقىمدى رەفورمالار بولىپ تابىلاتىنىن اتاپ ءوتتى.
ءوز كەزەگىندە Amanat پارتياسىنىڭ مۇشەلەرى ءاربىر قازاقستاندىقتىڭ الدىندا ماڭىزدى شەشىم قابىلداۋ مىندەتى تۇرعانىن اتاپ ءوتتى. «قازىر ەلىمىزدىڭ بارلىق ءوڭىرى مەن ەلدى مەكەنىندە مەملەكەتىمىزدىڭ باستى قۇجاتىنا تۇزەتۋلەر ەنگىزۋگە قاتىستى اۋقىمدى اقپاراتتىق-ءتۇسىندىرۋ جۇمىستارى جۇرگىزىلۋدە. ءبىز الماتىلىق جاستارمەن كەزدەسۋدە ولاردىڭ رەفەرەندۋمعا دەگەن قىزىعۋشىلىعى جوعارى ەكەنىن بايقادىق. سەبەبى ءىس-شارالاردا كوپتەگەن وزەكتى تاقىرىپ كوتەرىلىپ, ستۋدەنتتەر سۇراقتار قويىپ, ءوز پىكىرلەرىن اشىق ءبىلدىردى. ەل پرەزيدەنتى ۇسىنعان نەگىزگى رەفورمالار ولاردىڭ قوعامدىق-ساياسي بولاشاعىنا دەگەن سەنىمىن نىعايتۋدا», دەدى دەپۋتات ءمادي احمەتوۆ.
كەزدەسۋ سوڭىندا قاتىسۋشىلاردىڭ كوپشىلىگى كونستيتۋتسيالىق تۇزەتۋلەر جوباسى بويىنشا ەل تۇرعىندارىنىڭ جالپىعا بىردەي داۋىس بەرۋى بىرلىگىمىزدى ارتتىرادى دەگەن ورتاق پىكىرگە كەلدى.
الماتى
