قازاقستان • 20 مامىر، 2022

ۇكىمەت 717 ينۆەستيتسيالىق جوبانىڭ پۋلىن قۇردى

20 رەت كورسەتىلدى

قر پرەمەر-ءمينيسترى ءاليحان سمايىلوۆ بۇگىن نۇر-سۇلتان قالاسىندا اشىلعان قازاقستاندىق وندىرۋشىلەردىڭ VI Ulttyq Ónim كورمەسىندە ۇكىمەت 717 ينۆەستيتسيالىق جوبانىڭ پۋلىن قۇرعانىن حابارلادى. ولاردىڭ 286-سى – 9،9 ترلن تەڭگە سوماسىنا يمپورتتى الماستىراتىن جوبالار، دەپ حابارلايدى Egemen.kz ۇكىمەتتىڭ رەسمي سايتىنا سىلتەمە جاساپ.

«بۇگىنگى تاڭدا ۇكىمەت كاسىپكەرلىكتى قولداۋ شارالارىن جۇزەگە اسىرىپ جاتىر. كەيىنگى 5 جىلدا شاعىن جانە ورتا بيزنەستىڭ ءجىو-دەگى ۇلەسى 27%-دان 35%-عا دەيىن ۇلعايدى»، دەدى پرەمەر-مينيستر كورمەنىڭ اشىلۋ سالتاناتىندا.

سونىمەن قاتار پرەمەر-مينيستر شاعىن جانە ميكروكاسىپكەرلىك سۋبەكتىلەرىنە تەكسەرۋ جۇرگىزۋگە مەملەكەت باسشىسى جاريالاعان موراتوري ەلىمىزدە بيزنەس ەركىندىگىن قامتاماسىز ەتۋگە وڭ اسەر ەتكەنىن اتاپ ءوتتى.

ءوندىرىستىڭ قايتا وڭدەۋ سالاسىنداعى يمپورتتىڭ وتكەن جىلى $38 ملرد بولعانىن ەسكەرسەك، كاسىپكەرلەر ءۇشىن ونى الماستىرۋ - كەلەشەگى زور باعىتتاردىڭ ءبىرى بولىپ وتىر.

«بۇل - ءبىزدىڭ وتاندىق وندىرۋشىلەرگە ءوز ءىسىن دامىتۋعا جانە جاڭا تاۋارلاردىڭ وندىرىسىنە ينۆەستيتسيالار باعىتتاۋ ءۇشىن ۇلكەن مۇمكىندىك بەرەدى. بۇگىندە ۇكىمەت 717 ينۆەستيتسيالىق جوبانىڭ پۋلىن قۇردى، ولاردىڭ 286-سى – 9،9 ترلن تەڭگە سوماسىنا يمپورتتى الماستىراتىن جوبالار»، دەدى ءاليحان سمايىلوۆ.

ۇكىمەت باسشىسى 2022 جىلى جالپى قۇنى 1،7 ترلن تەڭگە بولاتىن 165 جوبانى ىسكە اسىرۋ جوسپارلانعانىن اتاپ ءوتتى. وسىنداي ءار جوبانىڭ اينالاسىندا شاعىن جانە ورتا بيزنەس كومپانيالارىنىڭ بەلدەۋى داميتىن بولادى.

سونداي-اق بيزنەسكە اكىمشىلىك جۇكتەمەنى تومەندەتۋگە مۇمكىندىك بەرەتىن كاسىپكەرلىك سالاسىنداعى رەتتەۋشىلىك ساياسات جونىندەگى زاڭ قابىلداندى. ۇكىمەت بيزنەس جۇرگىزۋ جانە نارىقتاعى مونوپوليالاردى جويۋ ءۇشىن باسەكەلەستىك اياسىن كەڭەيتۋ جۇمىستارىن جالعاستىرىپ جاتىر. وتاندىق كومپانيالاردىڭ كۆازيمەملەكەتتىك سەكتوردىڭ ساتىپ الۋىنا قول جەتكىزۋدى جەڭىلدەتۋ باعىتىندا بەلسەندى جۇمىس جۇرگىزۋدە.

«مەملەكەت باسشىسى اتاپ وتكەندەي، بيلىك پەن بيزنەستىڭ سىندارلى ءوزارا ءىس-قيمىلى الەۋمەتتىك-ەكونوميكالىق تۇراقتىلىقتىڭ نەگىزىن قۇرايدى. وسى باعىتتا ۇكىمەت كاسىپكەرلەردى مەملەكەتتىك قولداۋ شارالارىنىڭ تيىمدىلىگى مەن اشىقتىعىن ارتتىرۋ بويىنشا جۇمىستى بەلسەندى تۇردە جالعاستىراتىن بولادى»، دەدى ءاليحان سمايىلوۆ.

اشىلۋ راسىمىنەن كەيىن پرەمەر-مينيستر كورمە زالىندا بولىپ، وتاندىق تاۋار وندىرۋشىلەردىڭ ستەندتەرىمەن تانىستى. بيىل Ulttyq Ónim كورمەسىنە «دامۋ» كاسىپكەرلىكتى دامىتۋ قورى («بايتەرەك» حولدينگىنىڭ ەنشىلەس ۇيىمى) ارقىلى مەملەكەتتىك قولداۋ العان وتاندىق ميكرو، شاعىن جانە ورتا بيزنەستىڭ 350-دەن استام وكىلى قاتىسادى.

سونىمەن قاتار كورمەگە كەلۋشىلەرگە «حالىق تاڭداۋى» دەگۋستاتسيالىق كونكۋرسى، جەتەكشى وتاندىق وندىرۋشىلەردىڭ ايەلدەر جانە ەرلەر كيىمدەرىنىڭ توپتامالارىنىڭ كورسەتىلىمى ۇيىمداستىرىلادى. كورمە اياسىندا كاسىپكەرلەرگە فرانچايزينگتىك كومپانيالاردىڭ فورۋمى، ىسكەرلىك كەلىسسوزدەر مەن ءارتۇرلى شەبەرلىك سىنىپتارى ۇيىمداستىرىلادى، وندا بەلگىلى كاسىپكەرلەر بىلىمدەرى مەن تاجىريبەلەرىمەن بولىسەدى.

سوڭعى جاڭالىقتار

دوللار باعامى ءوستى

قارجى • بۇگىن، 16:12

ۇقساس جاڭالىقتار