«بيزنەس پەن مەملەكەت مۇددەسى اراسىنداعى تەپە-تەڭدىك قاتاڭ ساقتالۋى ءتيىس. ول ءۇشىن كەلەسى قادامداردى جاساۋ كەرەك. ءبىرىنشى, باقىلاۋشى ورگاندار قىزمەتىنىڭ رەپرەسسيۆتىك سيپاتىن تومەندەتۋ جونىندەگى جۇيەلى شارالار تالاپ ەتىلەدى. نەگىزسىز قۋدالاۋ, قۇقىق قورعاۋ ورگاندارىنىڭ قىسىمى ءالى دە بار دەگەن كوپتەگەن دابىل قاعىلىپ جاتىر», دەدى پرەزيدەنت.
ونىڭ ايتۋىنشا, كەيىنگى بەس ايدا پروكۋرورلار 100 مىڭعا جۋىق كاسىپكەردىڭ قۇقىعىن قورعاعان. بۇل - تۇتاس 2021 جىلعى كورسەتكىشپەن شامالاس. اتالعان فاكتىلەر تەرگەۋ ورگاندارىنىڭ بيزنەستى قىلمىستىق قۋدالاۋعا يتەرمەلەيتىنىن بىلدىرەدى.
«باس پروكۋراتۋرا كاسىپكەرلىك سۋبەكتىلەرىنە قاتىستى باقىلاۋ-قاداعالاۋ جانە اسىرەسە تەرگەۋ ارەكەتتەرىن زاڭسىز جۇرگىزۋ فاكتىلەرىنە جول بەرمەۋدى قاتاڭ باقىلاۋى قاجەت. كاسىپكەرلەردى كۇدىكتى رەتىندە تانۋ تاجىريبەسى دە كەڭ تارالعان, ال ءىس جۇزىندە بۇل - جاي عانا م ۇلىكتىك داۋلار. قازىرگى ۋاقىتتا كەز كەلگەن تىركەلگەن ءوتىنىش اۆتوماتتى تۇردە قىلمىستىق ءىس قوزعاۋدى بىلدىرەدى. بۇل كاسىپكەردىڭ قىزمەتىن توقتاتادى, ينۆەستيتسيالاردى تەجەيدى, ىسكەرلىك بەدەلگە نۇقسان كەلتىرەدى. سونىمەن قاتار سوتقا دەيىنگى تەرگەۋ ۇزاققا سوزىلۋى مۇمكىن. بۇل - كەزدەيسوقتىق ەمەس, قۇقىق قورعاۋ ورگاندارىنىڭ تەرىس پيعىلدى قىزمەتكەرلەرىنىڭ مۇددەلەرى ءۇشىن جۇمىس ىستەيتىن جۇيە. مۇنداي مىسالدار از ەمەس», دەيدى قاسىم-جومارت توقاەۆ.
پرەزيدەنت قۇقىق قورعاۋ ورگاندارى ەڭ الدىمەن, الاياقتىق فاكتىلەرىن اشۋعا, قاراجاتتى جىلىستاتۋ, زاڭسىز قولما-قول اقشاعا اينالدىرۋ, قارجى پيراميدالارىن قۇرۋ ماسەلەلەرىنە باسا ءمان بەرۋى كەرەكتىگىن ايتتى. سونداي-اق كولەڭكەلى ەكونوميكامەن باتىل كۇرەسۋ قاجەتتىگىن ەسكەرتتى.
ء«بىز ازاماتتىق تەكسەرۋشىلەردىڭ قىزمەتىن قاتاڭ رەتتەدىك. تاۋەكەلدەردى باسقارۋ جۇيەسى, تەكسەرۋ پاراقتارى, پروفيلاكتيكالىق باقىلاۋ ەنگىزىلدى. نەلىكتەن بۇل قۇقىق قورعاۋ ورگاندارىنا قاتىستى جاسالمايدى؟», دەدى مەملەكەت باسشىسى.
