القالى جيىننىڭ اشىلۋىنا تۇركى مەملەكەتتەر ۇيىمىنىڭ باس حاتشىسى باعدات امىرەەۆ, حالىقارالىق تۇركى اكادەمياسىنىڭ پرەزيدەنتى دارحان قىدىرالى, تۇركيا ۇلتتىق ءبىلىم ءمينيسترىنىڭ ورىنباسارى پەتەك اشكار, سونداي-اق مۇشە مەملەكەتتتەردىڭ وكىلدەرى, ءبىلىم جانە عىلىم سالاسىنىڭ ۇزدىك ماماندارى مەن ساراپشىلارى قاتىستى.
16-18 مامىر ارالىعىندا وتكەن باسقوسۋدا حالىقارالىق تۇركى اكادەمياسى ازىرلەگەن ورتاق گەوگرافيا, ورتاق ادەبيەت, ورتاق تاريح وقۋلىقتارى تانىستىرىلدى. تۇركى ەلدەرىنىڭ ورتا مەكتەپتەرىندە وقىتىلاتىن كىتاپتاردىڭ سوڭعى نۇسقالارى ساراپشىلاردىڭ تالقىسىنان ءوتىپ, بىرەگەي نۇسقاسى قابىلداندى.
كونفەرەنتسيانىڭ اشىلۋ سالتاناتىندا تۇركيا ءبىلىم ءمينيسترىنىڭ ورىنباسارى پەتەك اشكار «ورتاق تۇركى تاريحى» ءدارىسى 2018-2019 وقۋ جىلىنان باستاپ باستاۋىش ءبىلىم بەرۋ مەكەمەلەرىنىڭ اپتالىق كەستەسىنە ەنگىزىلگەنىن اتاپ ءوتتى. سوعان سايكەس, 8-سىنىپ وقۋشىلارى ونى تاڭداۋ ءپان رەتىندە وقي الادى.
مينيستر ورىنباسارى كەلتىرگەن دەرەكتەرگە سۇيەنسەك, 2018-2019 وقۋ جىلىندا شامامەن 30 مىڭ, 2019-2020 وقۋ جىلىندا شامامەن 38 مىڭعا جۋىق وقۋشى «ورتاق تۇركى تاريحىن» تاڭداعان. 2020-2021 وقۋ جىلىندا شامامەن 48 مىڭ, 2021-2022 وقۋ جىلىندا شامامەن 49 مىڭ بالا اتالعان ءپاندى وقۋعا شەشىم قابىلداعان.
پەتەك اشكاردىڭ ايتۋىنشا, كەلەسى وقۋ جىلىنان باستاپ ءپاندى ورتا مەكتەپ دەڭگەيىندە وقىتۋعا شەشىم قابىلدانعان. سونىمەن قاتار ورتا ءبىلىم بەرۋ ۇيىمدارىندا قولدانىلاتىن اپتالىق ساباق كەستەلەرىنە «ورتاق تۇرىك تاريحى» پانگە قوسىمشا «تۇرىك الەمى گەوگرافياسى» جانە «ورتاق تۇرىك ادەبيەتى» پاندەرى قوسىلعان. ونى 9-شى سىنىپ وقۋشىلارى ەلەكتيۆتى ءپان رەتىندە وقىماق. بۇدان بولەك, 2022-2023 وقۋ جىلدان باستاپ 10 جانە 11 سىنىپتار كەستەسىنە قوسىلادى.
ءمينيستردىڭ ورىنباسارى پەتەك اشكار چالىستاي كونفەرەنتسيا ناتيجەسىندە قابىلداناتىن شەشىمدەر تۇركى الەمى جاستاردىڭ ءبىلىمدى, تابىستى, ىلىمىمەن بولىسەتىن, ورتاقشىل, ءوزىن-ءوزى تانىعان, مادەني قۇندىلىقتاردى قۇرمەتتەيتىن ادام بولىپ وسۋىنە زور ۇلەس قوساتىنىن اتاپ ءوتتى.
سپيكەر ءسوز سوڭىندا حالىقارالىق تۇركى اكادەمياسى ازىرلەگەن ورتاق گەوگرافيا, ورتاق ادەبيەت, ورتاق تاريح وقۋلىقتارى 2022-2023 جىلدان باستاپ مۇشە مەملەكەتتەردە وقىتىلا باستايتىنىنا سەنىم ءبىلدىردى.
حالىقارالىق تۇركى اكادەمياسىنىڭ پرەزيدەنتى دارحان قىدىرالى وسىنداي وقۋلىقتار ارقىلى ورتاق تاريحىمىزدى, ادەبيەتىمىزدى, گەوگرافيامىزدى ۇيرەتۋمەن شەكتەلمەيتىنىمىزدى جەتكىزدى.
« ۇلى كوشباسشى مۇستافا كەمال اتاتۇرىك ء«تىل – كوپىر, تاريح – كوپىر» دەپ ايتقانداي, ءبىز تۇرىك الەمىندە كوپىر سالىپ جاتىرمىز. مەنىڭ ويىمشا, بۇل كوپىردىڭ ىرگەسى بەرىك بولۋى كەرەك. ورتاق وقۋلىقتار جوباسى 2012 جىلى مەملەكەت باسشىلارىمىزدىڭ تاپسىرماسىمەن باستالدى. ورتاق تۇركى تاريحى رەتىندە باستالعان جوبا ورتاق تۇركى ادەبيەتى جانە تۇركى الەمى گەوگرافياسى وقۋلىقتارىنا جالعاستى.
ورتاق مادەنيەتىمىزدى, گەوگرافيامىزدى, ورتاق كەڭىستىكتى, تاريحىمىزدى جانە ورتاق وتكەنىمىزدى ءتۇسىنۋ تۇرعىسىنان ادەبيەتتىڭ ەرەكشە ماڭىزى بار. بۇل وقۋلىقتار ەشبىر ەلدىڭ تاريحى, گەوگرافياسى, ادەبيەتى ەمەس. ءار ەلدىڭ ءوز وقۋلىقتارى بار. مۇنداعى ماقسات – ورتاق تۇسىنىك قالىپتاستىرۋ», دەدى د.قىدىرالى.
