«بۇگىندە جارعىلىق كاپيتالىنا 100 پايىز مەملەكەت يەلىك ەتكەن «قازگەواقپارات» رەسپۋبليكالىق گەولوگيالىق اقپارات ورتالىعى» جشس-ءنى «قر ۇلتتىق گەولوگيالىق قىزمەتى» اكتسيونەرلىك قوعامى ەتىپ قايتا قۇرۋدى ۇيىمداستىرۋ جۇمىستارى ءجۇرىپ جاتىر. كەلەسى كەزەڭدە وعان «قازگەولوگيا» ۇلتتىق گەولوگيالىق بارلاۋ كومپانياسى» اق-نى قوسۋ جوسپارلانعان», دەدى ول ورتالىق كوممۋنيكاتسيالار قىزمەتىندە وتكەن بريفينگتە.
ونىڭ سوزىنشە, «قازگەواقپارات» رگاو» جشس مەن «قازگەولوگيا» اق-نى بىرىكتىرۋ شەشىمى ۇلىبريتانيا, كانادا, فينليانديا سياقتى ەلدەردىڭ گەولوگياداعى تاجىريبەسىن ەسكەرە وتىرىپ قابىلدانعان.
سونداي-اق جانات كارىباەۆ ۇلتتىق گەولوگيا قىزمەتىنىڭ نەگىزگى جۇمىس باعىتتارىن اتادى. ولار: - جەر قويناۋىن ۇتىمدى پايدالانۋ جانە مينەرالدىق-شيكىزات بازاسىن مولايتۋ سالاسىنداعى مەملەكەتتىك ساياساتتى ىسكە اسىرۋ;
- جەر قويناۋىنا گەولوگيالىق زەرتتەۋ جۇرگىزۋدى عىلىمي نەگىزدەۋ ماقساتىندا ەلدىڭ بەيىندىك جوعارى وقۋ ورىندارىمەن ءوزارا ءىس-قيمىل جاساۋ;
- پايدالى قازبالاردىڭ قيىن الىناتىن قورلارىن يگەرۋ ءۇشىن وزىق تەحنولوگيالاردى قولدانۋ, تسيفرلاندىرۋ, گەواقپاراتتىق جۇيەلەر جانە ءىرى تابىستى كومپانيالارمەن تاجىريبە الماسۋ;
- گەولوگيا سالاسىنداعى باعدارلامالار مەن ستراتەگيالاردى قالىپتاستىرۋ;
- سەرۆيستىك قىزمەتتەر;
- باستاپقى گەولوگيالىق اقپاراتتىڭ ساقتالۋىن قامتاماسىز ەتەتىن كەرن قويماسىن قالىپتاستىرۋ;
- حالىقارالىق اككرەديتاتسياسى بار زەرتحانالار اشۋ;
- گەولوگيالىق اقپاراتتى جيناۋ, ساقتاۋ, وڭدەۋ, جۇيەلەۋ جانە ۇسىنۋ ءۇشىن قوردا ساقتاۋ;
- ينۆەستيتسيالىق جوبالاردى ازىرلەپ, ومىرگە ەنگىزۋ;
- مەملەكەتتىك مونيتورينگ;
- «Kaznedra» بىرىڭعاي پلاتفورماسىندا بارلىق بيزنەس-پروتسەستەردى اۆتوماتتاندىرۋ.
