ادەبيەت • 18 مامىر، 2022

كۇيەۋىنىڭ كىتابىن ساتقان ايەل

114 رەت كورسەتىلدى

«كەل، بالام، كىتاپ الشى، ساعان ارزان بەرەمىن»، دەگەن قارت ايەل كىسىنىڭ داۋىسى ءالى قۇلاعىمدا جاڭعىرىپ تۇر. الماتىنىڭ الدەبىر كوشەسىنىڭ قيىلىسىنان ءوتىپ بارا جاتقان مەن ونىڭ ءوتىنىشىن ورىنداپ، التى-جەتى كىتاپ ساتىپ الدىم.

سۋ تەگىن. كونە كىتاپتاردى ەسكى كىلەمگە جايىپ، كوشەدە ساتىپ تۇرعان بۇل كىسى مەيلى كىم كەلسە دە، قۇراق ۇشىپ قارسى الىپ، كىتاپتارىن ساتىپ جاتىر. «قازاقشا كىتاپتار بار ما؟»، دەپ سۇراپ ەدىم، «مۇندا بار»، دەپ ار جاعىندا تۇرعان جا­شىكتىڭ ىشىنەن الىپ شىقتى. ىڭعاي جاقسى كىتاپتار ەكەن. ءبارىن الدىم. كەتىپ بارا جات­قانىمدا، ول كىسى مەنى قاي­تا شا­قىرىپ، «بالام، ساعان سات­قان كىتاپتار جولداسىمنىڭ جي­ناعان كىتاپتارى ەدى، كوزى تىرى­سىندە پايدالانعان، ەكى جىل بۇرىن قايتىس بولعان، بالالارىم ورىسشا مىنەزدى بولىپ ءوستى، كىتاپ دەگەنگە ولار مۇلدە قىزىقپايدى، ءتىپتى اكەسىنىڭ جازىپ-سىزعان دۇنيەسىنە دە كوز قىرلارىن سالمايدى. ايت­پاقشى، مەنىڭ جولداسىم جازۋشى كىسى»، دەپ بىرەۋ-مىرەۋ ەستىپ قويا ما دەگەندەي اينالاسىنا الاق-جۇلاق ەتىپ قارا­دى. سوسىن مەنىمەن قوشتاسىپ، كىتاپتارىنا قاراي كەتتى. «مەنىڭ جولداسىم جازۋشى»، دەگەن سوزىنە سەلك ەتتىم، قولى­ما ۇستاپ تۇرعان كىتاپتاردىڭ العاشقى بەتتەرىن پاراقتاي باستادىم. مۇمكىن ءبىر جەرىنە اتى-ءجونىن جازعان شىعار دەگەن وي جەتەلەدى. ەش­تەڭە تاپپادىم. ەكى-ءۇش كىتاپقا الدەكىمنىڭ ەسىمى جازى­لىپتى، بىراق ونى كوررەكتور قارىنداشپەن ءوشىرىپ تاس­تاپتى. «كۇيەۋىنىڭ كىتاپتارىن نەگە ساتادى؟»، دەگەن ۇلى سۇ­راق كوكىرەگىمدى تىرنالاپ بارا جاتتى. سوسىن ويىما «با­لا­لارىم ورىسشا ءوستى»، دەگەن ءسوزى تۇسە كەتتى. ارينە، ورىسشا سوي­لەيتىن ۇرپاققا قازاقتىڭ قۇن­دىلىعىنىڭ تۇككە كەرەگى جوق ەكەنى وسى ەكەن عوي دەگەن تۇجىرىم مەن ۇرەي الدىمنان سوپاڭ ەتىپ شىعا كەلدى. جەلە جورتىپ قىزىم وقيتىن مەكتەپكە باردىم. وقۋشىلار ۇيلەرىنە قايتىپ بارا جاتىر. انادايدا توعىز-ون جاسار قىز بالا اكەسىمەن ورىسشا سويلە­سىپ بارادى. كەنەت كوز الدىما الگىندە عانا مەن كىتابىن ساتىپ العان جازۋشى «ەلەستەدى». كىم بىلەدى،  ول دا كەزىندە بالالارىن مەكتەپتەن الىپ قايتاردا وسىلاي وزگە تىلدە سويلەسىپ بارا جاتقان شىعار؟! 

اراعا اي سالىپ، سول كوشەگە الدەبىر جۇمىسپەن بارا قال­دىم. بىراق كۇيەۋىنىڭ كىتابىن سات­قان الگى كىسىنى كەزدەستىرمەدىم، مۇمكىن، مارقۇم جازۋشىنىڭ جيعان كىتاپتارى تاۋسىلعان بولار؟    

 

سوڭعى جاڭالىقتار

الماتىدا تروللەيبۋس ورتەندى

وقيعا • 24 ماۋسىم، 2022

تۇركپا-نىڭ اتاۋى وزگەرەدى

پارلامەنت • 24 ماۋسىم، 2022

ۇقساس جاڭالىقتار